ពេលថ្មីនេះ ទោះបីមានបញ្ហាស្រូវក៏ដោយ គង់តែមានដំណោះស្រាយជូនប្រជាកសិករដែរ។ តាមក្រសួងព័ត៌មានបានចុះផ្សាយថា តាមលោកស្រី ឃី មុនី អគ្គនាយិការងក្រុមហ៊ុននាំចេញអង្ករ Amru Rice (Cambodia )CO.,LTD បានអោយដឹងថាគិតមកដល់ថ្ងៃទី១១ ខែវិច្ឆិកានេះ ក្រុមហ៊ុនបានទិញស្រូវពីកសិករបានចំនួន១៥០០០តោនហើយ បន្ទាប់ពីបានប្រមូលទិញអស់រយៈពេល១៦ថ្ងៃកន្លងមកនេះ។
ហើយលោកស្រី ឃី មុនី បានប្រាប់ក្រុមការងារអេបក្រសួងព័ត៌មានបន្ថែមថា ក្រុមហ៊ុនមានផែនការទិញស្រូវពីកសិករខ្មែរពី៣ម៉ឺន៥សែនទៅ៤ម៉ឺនតោននិងអាចលើសពីផែនការនេះរហូតអស់ស្រូវក្នុងអំឡុងពេលប្រមូលផលស្រូវវស្សាឆ្នាំនេះ។ ហើយលោកស្រីក៏បានអរគុណដល់រាជរដ្ឋាភិបាលដែលបានទំលាក់ទុនបង្វិលដល់បណ្តាក្រុមហ៊ុននិងរោងម៉ាស៊ីនក្នុងស្រុកដើម្បីមានលទ្ធភាពបង្កើនបរិមាណទិញស្រូវស្តុកទុកពេលនេះ។
បើតាមក្រុមហ៊ុននាំចេញអង្ករ Amru Rice (Cambodia) CO.,LTDបានអោយដឹងថា សាខាទាំង៣របស់ក្រុមហ៊ុននេះ ដែលមានទីតាំងនៅខេត្តធំៗទាំង៣ មានផែនការទិញស្រូវ៣ដងទៅតាមរដូវកាលច្រូតកាត់ស្រូវប្រាំងនិងវស្សាសរុបយ៉ាងតិច១២ម៉ឺន-១៥ម៉ឺនតោនក្នុងមួយឆ្នាំ៕