វេជ្ជបណ្ឌិត Lee Wai Peng និងវេជ្ជបណ្ឌិត Lim Siew Kuan មកពីមជ្ឈមណ្ឌល Solis Breast Care បានពន្យល់ថា ស្ត្រីអាចតាមដានសុខភាពសុដន់របស់ខ្លួនដោយការសង្កេតរាងកាយ និងការផ្លាស់ប្តូរផ្សេងៗដែលអាចកើតឡើងដូចជា៖ ការឈឺចាប់ បើការឈឺនេះនៅផ្នែកខាងលើឬខាងក្រៅនៃសុដន់ជារឿងធម្មតាក្នុងអំឡុងពេលអ័រម៉ូនប្រែប្រួលពេលមករដូវ។ ប៉ុន្តែបើមានការឈឺចាប់ខុសធម្មតា ក្នុងពេលមិនមករដូវឬបន្តឈឺបន្ទាប់ពីមករដូវហើយ ទោះឈឺតិចតួចក៏គួរតែយកចិត្តទុកដាក់ដែរ។

រឿងសំខាន់មួយទៀតគឺការស្ទាបរកដុំសាច់តូចៗ។ អ្នកឯកទេស គួច ម៉េងលី បានណែនាំឱ្យស្ទាបសុដន់ពេលងូតទឹកឬពេលគេង ដោយលើកដៃមួយឡើង ហើយប្រើដៃម្ខាងទៀតស្ទាបជុំវិញតំបន់ក្លៀករហូតដល់សុដន់ទាំងមូល។ វាជាវិធីដ៏សាមញ្ញក្នុងការសម្គាល់ថា តើមានដុំសាច់ ឬដុំពកខុសប្រក្រតីកើតឡើងឬអត់។ ទោះបីជាករណីខ្លះដុំសាច់មិនមែនជាមហារីកក៏ដោយ ការធ្វើរោគវិនិច្ឆ័យឱ្យច្បាស់នៅពេលឃើញភាពមិនធម្មតាគឺជារឿងចាំបាច់ ព្រោះដុំសាច់ខ្លះអាចវិវត្តទៅជាមហារីកបាន។

លើសពីនេះ ការប្រែប្រួលទំហំសុដន់មិនស្មើគ្នា ពណ៍ស្បែកសុដន់ប្រែទៅជាក្រហម ឬហើមខុសធម្មតា។ ហើយក្នុងករណីមានទឹករំអិល ឬរាវចេញពីសុដន់ សម្រាប់ស្ត្រីដែលមិនបានបំបៅដោះកូនទៀតនោះ ជារឿងដែលមិនគួរមើលរំលងឡើយ ពិសេសបើទឹករាវមានពណ៌ប្លែក ឬបង្កឱ្យមានដំបៅជាប់លើសុដន់។ ដូចគ្នានេះផងដែរ ការយារធ្លាក់ខ្លាំងរបស់សុដន់ ឬកើតឡើងក្នុងលក្ខណៈមិនធម្មតា និងការកើតដុំពកតូចៗលើស្បែកជុំវិញសុដន់ដែលមានការហើម ឬឈឺ ក៏ជាសញ្ញាដែលគួរតែប្រយ័ត្នផងដែរ។ 

វេជ្ជបណ្ឌិត Lim Siew Kuan បានណែនាំថា ពេលវេលាល្អបំផុតសម្រាប់ការត្រួតពិនិត្យសុដន់ដោយខ្លួនឯងគឺចន្លោះពី ៧ ទៅ ១០ ថ្ងៃបន្ទាប់ពីមករដូវ។ ក្នុងពេលនេះ អ័រម៉ូននឹងធ្វើឱ្យសុដន់មានសភាពធម្មតាឡើងវិញ ធ្វើឱ្យការសង្កេតភាពមិនប្រក្រតីកាន់តែងាយស្រួល។ បើសិននៅក្នុងចន្លោះពេលនេះ ស្ត្រីសង្កេតឃើញការប្រែប្រួលណាមួយដែលមិនត្រឡប់ទៅដូចដើមវិញ ត្រូវតែទៅជួបវេជ្ជបណ្ឌិតជំនាញឱ្យបានឆាប់រហ័ស ដើម្បីពិនិត្យ និងធ្វើរោគវិនិច្ឆ័យឱ្យបានច្បាស់លាស់។

ការយកចិត្តទុកដាក់លើសុខភាពសុដន់ជាប្រចាំ គឺជាជំហានសាមញ្ញ ប៉ុន្តែមានតម្លៃខ្លាំងក្នុងការការពារកុំឱ្យជំងឺមហារីកកើតឡើង ឬសង្កេតឃើញវាឱ្យបានឆាប់។ ស្ត្រីវ័យចាប់ពី ២០ ឆ្នាំឡើងទៅគួរតែធ្វើរឿងនេះ ព្រោះជាផ្នែកមួយនៃការថែរក្សាសុខភាពប្រចាំថ្ងៃរបស់ខ្លួន៕

អត្ថបទដោយ៖ សារួ