ការស្រាវជ្រាវមួយដែលបានធ្វើលើមនុស្សពេញវ័យអាមេរិកជាង 46,000 នាក់ រយៈពេលជិត 10 ឆ្នាំ បង្ហាញថា អ្នកដែលផឹកកាហ្វេប្រហែល 1 ទៅ 2 ពែងក្នុងមួយថ្ងៃ មានហានិភ័យនៃការស្លាប់ទាបជាងអ្នកដែលមិនផឹកដល់ទៅ 14%។ លើសពីនេះ វាក៏រកឃើញថា ការផឹកកាហ្វេមួយពែងក្នុងមួយថ្ងៃអាចកាត់បន្ថយហានិភ័យនៃការស្លាប់ពីគ្រប់មូលហេតុបានដល់ទៅ 16%  ។ ជាពិសេសហានិភ័យនៃការស្លាប់ដោយសារជំងឺបេះដូងក៏ថយចុះពី 29% ទៅ 33% ផងដែរ។

យ៉ាងណាក៏ដោយ អត្ថប្រយោជន៍ទាំងនេះឃើញច្បាស់សម្រាប់តែអ្នកដែលផឹកកាហ្វេខ្មៅ និងកាហ្វេដែលមានជាតិស្ករតិចតែប៉ុណ្ណោះ។ វេជ្ជបណ្ឌិត Fang Fang Zhang ពីសាកលវិទ្យាល័យ Tufts សហរដ្ឋអាមេរិក បានពន្យល់ថា ការបន្ថែមស្ករ និងជាតិខ្លាញ់ឆ្អែតច្រើនពេកអាចបង្កើនកាឡូរី និងនាំឱ្យមានបញ្ហាសុខភាព ដូចជាជំងឺបេះដូង និងសរសៃឈាម។ ទោះបីជាការបន្ថែមបន្តិចមិនប៉ះពាល់អ្វីធ្ងន់ធ្ងរ យ៉ាងណាក៏គួរតែប្រុងប្រយ័ត្នកុំឱ្យលើសកម្រិតខ្លាំងពេក។ 

សារធាតុ polyphenols ដែលមានក្នុងកាហ្វេជាច្រើនជាភ្នាក់ងារប្រឆាំងអុកស៊ីតកម្ម ជួយកាត់បន្ថយការរលាក និងការខូចខាតដោយរ៉ាឌីកាល់សេរី។ ទោះបីជាការបន្ថែមស្ករ ឬជាតិខ្លាញ់ឆ្អែតមិនបំផ្លាញសារធាតុនេះ ក៏វាអាចជះឥទ្ធិពលអវិជ្ជមានលើសុខភាពទូទៅដែរ ប្រសិនបើប្រើច្រើនពេក។ អ្នកជំនាញក៏បានរកឃើញថា កម្រិតមធ្យមគឺល្អបំផុត ប្រសិនបើផឹកច្រើនជាង 2 ទៅ 3 ពែងក្នុងមួយថ្ងៃ អ្នកប្រហែលជាមិនទទួលបានអត្ថប្រយោជន៍អ្វីទេ តែបែរជាធ្វើឱ្យមានបញ្ហាដល់សុខភាពទៅវិញដូចជា ថប់បារម្ភ ចង្វាក់បេះដូងលោតលឿន និងសម្ពាធឈាមឡើងខ្ពស់ ជាដើម។ 

ដូច្នេះ ដើម្បីផឹកកាហ្វេឱ្យទទួលបានអត្ថប្រយោជន៍អ្នកត្រូវដឹងពីកម្រិត និងកំណត់ពេលផឹកឱ្យបានត្រឹមត្រូវ។ ពេលវេលាដែលល្អសម្រាប់ផឹកកាហ្វេពេលព្រឹកគឺចន្លោះម៉ោង 9:30–11:30 ប៉ុន្តែត្រូវចាំថាកុំផឹកពេលពោះទទេ ព្រោះវាអាចបង្កឱ្យមានការរលាកក្រពះបាន។ ពេលថ្ងៃត្រង់ គួរផឹកនៅម៉ោង 1–2 ក្រោយអាហារ ព្រោះបើអ្នករងចាំផឹកនៅម៉ោងនេះ នោះរាងកាយនឹងទទួលអត្ថប្រយោជន៍បានពេញលេញ។

ហើយចាប់ពីម៉ោង 2 រសៀលទៅ អ្នកមិនគួរផឹកកាហ្វេទេ ការផឹកកាហ្វេនៅពេលល្ងាចគឺជាមូលហេតុចម្បងមួយនៃការគេងមិនលក់ចង្វាក់បេះដូងលោតលឿន និងធ្វើឱ្យមានជំងឺថប់បារម្ភ។ នេះមានគ្រោះថ្នាក់ណាស់ ជាពិសេសសម្រាប់អ្នកដែលមានបញ្ហាសរសៃឈាមបេះដូង ឬជំងឺថប់បារម្ភ៕

អត្ថបទដោយ៖ សារួ