បច្ចុប្បន្ននេះមិនថាក្មេង ឬចាស់នោះទេ មួយថ្ងៃបើមិនបានផឹកមួយកំប៉ុងនៅមិនសុខឡើង ហើយអ្នកខ្លះទៀត ដើម្បីលុបបំបាត់ការងងុយគេង ពួកគេតែងតែទិញភេសជ្ជៈប៉ូវកម្លាំង។ តើការទទួលទានភេសជ្ជៈផ្អែមញឹកញាប់បង្កគ្រោះថ្នាក់អ្វីទេ?

បើយោងតាមប្រភព HealthLine បានឱ្យដឹងផងដែរថា ភេសជ្ជៈមានជាតិស្ករអាចបង្កើនហានិភ័យនៃជំងឺបេះដូង។ នៅក្នុងនោះដែរការទទួលទានស្ករជាយូរអាចបង្កឱ្យមានហានិភ័យជំងឺបេះដូង និងបង្កឱ្យជាតិស្ករក្នុងឈាមកើនឡើងខ្ពស់។

មិនតែប៉ុណ្ណោះទេ បើយោងតាមប្រភព WebMD បានបញ្ជាក់ឱ្យដឹងថា ការទទួលទានជាតិស្ករមួយ ឬពីរកំប៉ុងក្នុងមួយថ្ងៃអាចបង្កើនហានិភ័យកើតជំងឺទឹកនោមផ្អែមប្រភេទទី២ ប្រមាណជា២០%។ ជាមួយគ្នានេះដែរ ការទទទួលទានជាតិស្ករក៏បង្កឱ្យសម្ពាធឈាមឡើងខ្ពស់ កូលេស្ដេរ៉ុលឡើងខ្ពស់ និងបង្កឱ្យលើសជាតិខ្លាញ់។ ជាពិសេសការញុំាជាតិស្ករច្រើនបង្កើនហានិភ័យកើតជំងឺមហារីកលំពែង។

បើយោងតាមការលើកឡើងរបស់ វេជ្ជបណ្ឌិតគួច ម៉េងលី បានមានប្រសាសន៍ថា ម្ហូបទាំងអស់ដែលអ្នកតែងញុំាដូចជា ជាតិស្ករ ទឹកក្រឡុក ទឹកសេរ៉ូ និងគ្រឿងកំប៉ុងៗផ្សេងៗទៀតសុទ្ធតែមានជាតិស្ករមិនតិចស្លាបព្រានោះទេ ដែលបែបនឹងសុទ្ធតែជារូបមន្តទៅកើតទឹកនោមផ្អែម កើតរោគធាត់ កើតរោគបេះដូង ហើយកើតរោគស្ទ្រេស។

ចំណែកឯនៅក្នុងប្រទេសកម្ពុជាក៏កំពុងមានការពេញនិយមញុំាគ្រឿងកំប៉ុងជាខ្លាំង ជាពិសេសក្មេងៗតែម្ដង។ ទន្ទឹមនឹងគ្នានេះដែរ លោកវេជ្ជបណ្ឌិត ហៃ ឡូត​ មានមុខងារជាប្រធានផ្នែក ជំងឺកុមារ នៅមន្ទីរពេទ្យបង្អែកសម្ដេចឪសម្ដេចម៉ែបានលើកឡើងថា កត្តាប្រឈមលើក្មេងមួយចំនួនដែលបណ្ដាលមកពីការទទួលទាននូវគ្រឿងកំប៉ុងមានជាតិផ្អែមលើសលប់ដែលអាចបណ្ដាលឱ្យក្មេងងាយនឹងលើសទម្ងន់ ឬធាត់។ មិនតែប៉ុណ្ណោះក្មេងក៏ងាយទទួលរងនូវជំងឺទឹកនោមផ្អែមប្រភេទទី២ ហើយក្មេងក៏ងាយក្នុងការកើតជំងឺបេះដូង ប្រសិនបើគាត់ញុំាអាហារផ្អែមច្រើនពេក។

ដូច្នេះអ្នកគួរតែផ្លាស់ប្ដូរទម្លាប់ផឹកភេសជ្ជៈផ្អែម ភេសជ្ជៈប៉ូវកម្លាំង មកផឹកទឹក ឬផឹកទឹកផ្លែឈើស្រស់ ដើម្បីការពារសុខភាពពីជំងឺនានាដែលយើងពុំអាចមើលឃើញនឹងភ្នែកនោះទេ៕