ពេលខ្លះយើងគិតថា ការដាច់សរសៃឈាមមានតែចំពោះមនុស្សធំ និងមនុស្សចាស់តែប៉ុណ្ណោះ ប៉ុន្តែឪពុកម្តាយគួរតែមានការប្រុងប្រយ័ត្នចំពោះកូនរបស់ខ្លួន កុំឱ្យមានអារម្មណ៍ស្តាយក្រោយ។ មានក្មេងស្រីអាយុ ៨ឆ្នាំនៅវៀតណាម បន្ទាប់ពីងូតទឹករួច ស្រាប់តែប្រកាច់ហើយក៏ទៅមន្ទីរពេទ្យសង្គ្រោះបន្ទាន់ បានពិនិត្យរកឃើញថា ក្មេងស្រីម្នាក់នេះបានដាច់សរសៃឈាមខួរក្បាល។
តាមលោកវេជ្ជបណ្ឌិត Nguyen Thanh Trung ជាអ្នកជំនាញជំងឺដាច់សរសៃឈាមខួរក្បាលនៅមន្ទីរពេទ្យទូទៅ Phu Tho បានលើកឡើងថា ជំងឺដាច់សរសៃឈាមខួរក្បាលកើតឡើងនៅពេលលំហូរឈាមទៅកាន់ខួរក្បាលត្រូវបានស្ទុះដោយសរសៃរួមតូចឬកត្តាខ្លាញ់ក្នុងសរសៃឈាមច្រើន នាំឱ្យលំហូរឈាមមិនអាចបញ្ចូលទៅកាន់កោសិកាខួរក្បាល ក៏ធ្វើកោសិកាខួរក្បាលរងផលប៉ះពាល់ស្លាប់ ឬពិការាងកាយផ្នែកណាមួយផងដែរ។
វេជ្ជបណ្ឌិតបានបន្តថា ការដាច់សរសៃឈាមខួរក្បាលមនុស្សពេញវ័យជារឿយៗ មានសញ្ញាដំបូងធម្មតាយើងអាចសម្គាល់បានយ៉ាងងាយស្រួលដូចជាមាត់វៀក និយាយមិនច្បាស់ និងរាងឈឺក្បាលច្រើនដង។ ប៉ុន្តែចំពោះកុមារមានភាពស្រពិចស្រពិល ប៉ុន្តែសញ្ញាសម្គាល់មួយចំនួនអាចតាមដានមានដូចជា ការប្រកាច់ ការបាត់បង់ស្មារតីរយៈពេលខ្លី និងសកម្មភាពប្លែកៗ។ មានសញ្ញាផ្សេងទៀតដូចជា កុមារចេះតែត្អូញត្អែរពីការឈឺក្បាលច្រើនដងក្នុងមួយថ្ងៃ យំឥតឈប់ឈរអមដោយក្អួត ប្រកាច់សន្លប់ និងមាត់វៀកពេលញ៉ាំអាហារ និងផឹកទឹក។ ហើយក្មេងមិនអាចចាប់របស់របរធម្មតាបានខុសពីធម្មតា ដើរអូសជើងម្ខាង ឬមានសំលេងចម្លែកៗនៅក្នុងក្បាល ហើយមានទឹកមុខឆាប់ប្រែពណ៌ស្វាយនៅពេលធ្វើចលនាដោយខ្លួនឯង។ នេះជាសញ្ញាឪពុកម្តាយត្រូវប្រុងប្រយ័ត្នចំពោះកូនរបស់ខ្លួន៕ អត្ថបទដោយ៖ ទ្រ សុភាព