ឪពុកម្តាយតែងស្រឡាញ់កូន តែងបារម្ភ និងខ្វាល់ខ្វាយពីកូនគ្រប់ពេល។ មានពេលខ្លះ ឪពុកម្តាយធ្វើឱ្យការស្រឡាញ់ ការព្រួយបារម្ភខ្វាល់ខ្វាយពីកូននោះ ក្លាយជាសមា្ពធខ្លះ មកពីកូនធ្វើអ្វីមួយមិនដូចចិត្តឪពុកម្តាយ។ បើតាមការស្រាវជ្រាវចិត្តវិទ្យាបានបង្ហាញថា ទង្វើទាំង ២នេះរបស់ឪពុកម្តាយធ្វើឱ្យកូនឆាប់ភ័យខ្លាចគេ គ្មានទំនុកចិត្តលើខ្លួនឯងនិងមិនក្លាហានក្នុងជីវិត៖
១.ប្រៀបធៀបជាមួយកូនគេដទៃ៖ ឪពុកម្តាយទោះបីជាប្រៀបធៀបកូនគេនិងកូនខ្លួន ដើម្បីជាជំរុញទឹកចិត្តឱ្យកូនពូកែដូចកូនគេក្តី។ ដូច្នេះការប្រៀបធៀបមួយចំនួននេះនឹងអាចធ្វើឱ្យកូនអ្នកមានអារម្មណ៍ថាអន់ជាងមុន ធ្វើឱ្យពួកគេមានអារម្មណ៍មិនពេញចិត្តខ្លួនឯង គិតថាខ្លួនឯងគ្មានទេពកោសល្យពីកំណើត ពិតជាមិនអាចជោគជ័យក្នុងជីវិតជាដើម។ ហេតុនេះឪពុកម្តាយគួរឱ្យតម្លៃលើភាពជាបុគ្គលរបស់ពួកគេ ជាជាងការប្រៀបធៀបពួកគេទៅនឹងកូនអ្នកដទៃ ដើម្បីជំរុញពួកគេឱ្យមានទំនុកចិត្ត និងលើកទឹកចិត្តពួកគេឱ្យចេះទទួលយកចំណុចពិសេសរបស់ខ្លួនឯង ដើម្បីពង្រឹងភាពជោគជ័យក្នុងជីវិត។
២.ការពារកំហុសកូនជ្រុលពេក៖ ការការពារកូនហួសហេតុជាសញ្ញាមួយ ដែលឪពុកម្តាយកំពុងផ្តល់អារម្មណ៍សុវត្ថិភាព ដល់កូនរបស់អ្នកដោយអចេតនាថាកូនតែងធ្វើត្រូវគ្រប់កាលៈទេសៈ ហើយពួកគេមិនគួរជួបបញ្ហាក្នុងជីវិតនោះទេ ពោលគឹកាន់ជើងកូនជ្រុលពេក។ ដូច្នេះកូនជំទង់ របស់អ្នកនឹងបាត់ឱកាសក្នុងការយល់ដឹងអំពីសារៈសំខាន់ក្នុងការប្រឈមមុខនឹងបញ្ហាជីវិត ហើយរៀនពីកំហុសរបស់ពួកគេផ្ទាល់។
យើងជាឪពុកម្តាយមានបំណងល្អបំផុតចំពោះកូនក៏ដោយ ក៏អាកប្បកិរិយាមួយចំនួនដែលអាចប៉ះពាល់ដោយប្រយោលដល់អនាគតកូនៗ ជាពិសេសនៅពេលពួកគេកំពុងមានវ័យជំទង់តែម្តង។ ដូច្នេះឪពុកម្តាយឬអាណាព្យាបាលគួរតែអាចកាត់បន្ថយបន្តិចម្តងៗ ហើយអនុញ្ញាតឱ្យកូនៗរបស់លោកអ្នក លូតលាស់តាមអាយុនិងធម្មជាតិនៃកុមារ កុំបង្ខំឱ្យពួកគេធ្វើជាមនុស្សធំលឿនពេក៕ អត្ថបទដោយ៖ ទ្រ សុភាព