«ក្មេងមានអត្តចរិតល្អ ចេះគិតគូរ ដូចមនុស្សធំ» ឃ្លានេះ ប្រហែលអាចនឹងធ្លាប់ឮច្រើន ហើយក៏មានអ្នកជួបផ្ទាល់ដែរ បន្ទាប់ពីឃើញក្មេងចេះគួរសម យល់អ្វីគួរធ្វើមិនគួរធ្វើ ចេះណែនាំជួយមនុស្សនៅក្បែរ។ អត្តចរិតក្មេងបែបនេះ ចាស់ៗច្រើនតែហៅថា ក្មេងមានអំណោយទាន។ ការបង្រៀនកូនឱ្យក្លាយជាក្មេងដែលចេះទទួលខុសត្រូវ អាចគ្រប់គ្រងជីវិតខ្លួនឯងបានល្អ អ្នកគួររៀនសូត្រតាមពីអ្នកគ្រូពេទ្យ សុខ សុផាន់ណាវី ឯកទេសជំងឺទូទៅ និងជាភរិយាវេជ្ជបណ្ឌិត មិញ ចាន់ភក្តី បានណែនាំវិធីសាស្ត្រមួយចំនួនដូចជា៖
តាមអ្នកគ្រូពេទ្យ សុខ សុផាន់ណាវី បានចែករំលែកបទពិសោធន៍ចិញ្ចឹមកូនផ្ទាល់ខ្លួនឱ្យដឹងថា ដើម្បីក្មេងធំលូតលាស់មកមានអត្តចរិតល្អ ចេះគោរពចាស់ទុំ គឺបង្រៀនក្មេងឱ្យមានទំនួលខុសត្រូវ មានវិន័យពីតូចឱ្យហើយ។ បងជឿលើការរងឥទ្ធិពលពីឪពុកម្តាយ បង្កើតទម្លាប់កូនធ្វើអ្វីដោយខ្លួនឯង និងការណែនាំកូនដោយសន្តិវិធី មិនប្រើប្រាស់សម្តីគ្រោតគ្រាតពិបាកស្តាប់ឡើយ។ ជាក់ស្តែងកូនបងផ្ទាល់តាំងពីតូចមកម្ល៉េះ បង និងស្វាមី ខំអប់រំណាស់ ដើម្បីឱ្យកូនក្លាយជាក្មេងមានវិន័យក្នុងខ្លួន នៅក្នុងផ្ទះគោរពច្បាប់គ្រួសារ ទៅសាលាគោរពច្បាស់សាលាបន្ថែម។
តាមអ្នកគ្រូពេទ្យ សុខ សុផាន់ណាវី បានលើកឡើងថា យើងត្រូវចេះកំណត់ច្បាប់ក្នុងផ្ទះច្បាស់លាស់ ទើបកូនយើងមានទំនួលខុសត្រូវតាមដែរ។ នៅក្នុងគ្រួសារបងមានទម្លាប់ល្អមួយដែលអនុវត្តន៍គ្រប់គ្នាមិនថា កូន ក្មួយ បង និងស្វាមីបងផ្ទាល់ទេ គឺត្រូវ កំណត់លើចំណីអាហារញុំា អត់សូវឱ្យញុំាអាហារណាសម្បូរទៅដោយសារជាតិផ្អែម ប្រៃ ខ្លាញ់ពេកទេ ម៉ោងគេងត្រូវគេង ម៉ោងលេងត្រូវមានកំណត់ ទម្លាប់បែបនេះក្នុងគ្រួសារយូរទៅគង់តែក្លាយជាទម្លាប់មិនខានទេ។ សម្រាប់កូនបងវិន័យក្នុងផ្ទះទោះមិនប្រាប់គាត់ក៏គាត់មានទម្លាប់ធ្វើដែរ គាត់ដឹងម៉ោងរៀន ម៉ោងសម្រាក និងអាហារណាគួរញុំាតិចអាហារណាគួរញុំាច្រើនល្អសម្រាប់សុខភាព។
ហើយអ្នកគ្រូបានលើកបន្ថែមថា ប្រសិនជាសួរថា តើមានកត្តាអ្វីជំរុញឱ្យគាត់ទម្លាប់បែបនេះ? វិន័យគ្រួសារកើតជាទម្លាប់ និងមួយទៀតគាត់ឃើញឧទាហរណ៍ជាក់ស្តែង ដោយសារសា្វមីបងបើកគ្លីនិកផ្ទាល់ខ្លួនជួបអ្នកជំងឺច្រើន ពេលគាត់ឃើញផ្ទាល់ភ្នែកបែបនេះ ក្មេងច្បាស់ជាដឹងខ្លួនឯង ប្រាប់បន្ថែមតិចតួចគាត់ចាំតែម្តង។ ចំណុចនេះ ពេលគាត់ទៅសាលា ឬជួបប្អូនៗដែលឃើញញុំាអាហារណាមិនសូវល្អ សម្បូរជាតិស្ករ គាត់ថែមទាំងណែនាំគេកុំឱ្យហូបច្រើនថែមទៀត។ ការបង្រៀនកូនមានវិន័យ កូននឹងមានទំនួលខុសត្រូវហើយ។
ត្រូវបង្រៀនកូនឱ្យចេះទទួលខុសត្រូវលើការងារតូចៗ។ ហើយអ្នកគ្រូ សុផាន់ណាវី បានលើកឡើងថា កុំអាងពាក្យថា ក្មេងគាត់មិនអាចធ្វើអ្វីបានទេ បងមិនគិតអញ្ចឹងទេ យើងជាឪពុកម្តាយគួរចាប់ផ្តើមជាមួយការបណ្តុះទំនួលខុសត្រូវតូចៗឱ្យកូនធ្វើជាប្រចាំថ្ងៃ ដូចជារៀបរបស់របរលេងផ្ទាល់ខ្លួន សម្រាមត្រូវយកទៅចោលក្នុងធុងសម្រាម ទៅរៀនត្រូវរៀបចំខ្លួនស្លៀកពាក់ខ្លួនឯង រៀបចំសៀវភៅដាក់កាតាប កាន់ឥវ៉ាន់ខ្លួនឯងពេលត្រូវទៅណាមកណា ...ជាដើម។ ទម្លាប់ទាំងនេះធ្វើឱ្យក្មេងចេះគិត និងដឹងថា គាត់ត្រូវទទួលខុសត្រូវលើការងារខ្លួនឯង មិនមែនចាំតែឪម្តាយរៀបចំឱ្យរហូតនោះទេ។
ដូច្នេះ! បើយើងជាឪពុកម្តាយ ធ្វើឱ្យគ្រប់សព្វឱ្យកូនពេក យូរៗទៅក្មេងនឹងក្លាយជាខ្ចិលតែម្តង។ ការដែលបង្រៀនគាត់មានទំនួលខុសត្រូវជាការងារផ្ទាល់ខ្លួននេះ វាល្អសម្រាប់ជីវិតពួកគាត់ទៅថ្ងៃមុខ បើទោះបីជាអត់មានឪពុកម្តាយនៅជិតគាត់ក៏មិនពិបាកដែរ។ លោកអ្នកចង់សួរអ្នកគ្រូពេទ្យ សុខ សុផាន់ណាវី សូមទាក់ទងតាម Sky Family Clinic និងតាមលេខទូរស័ព្ទ៖ 077 666 752 // 012 400 554 ៕ អត្ថបទដោយ៖ ទ្រ សុភាព
