នៅសហរដ្ឋអាមេរិក គេសិក្សារកឃើញថា ក្មេងអាយុក្រោម១៨ឆ្នាំ ប្រមាណ៦៣%កំពុងទទួលទានភេសជ្ជៈផ្អែមលើសលប់ ជាទូទៅភេសជ្ជៈដែលពួកគេទទួលទានគឺ ទឹកផ្លែកំប៉ុង ភេសជ្ជៈប៉ូវកម្លាំង កាហ្វេដាក់ស្ករច្រើន និងតែដាក់ស្ករច្រើន នេះបើយោងតាមការចុះផ្សាយរបស់ មជ្ឈមណ្ឌលគ្រប់គ្រង និងបង្ការជំងឺរបស់អាមេរិក(CDC)។

ជាមួយគ្នានេះដែរ គេបានសិក្សារកឃើញថា ផលប៉ះពាល់អវិជ្ជមាននៃភេសជ្ជៈផ្អែមបានបង្កឱ្យក្រុមមនុស្សងាយប្រឈមមុខកើតជំងឺទឹកនោមផ្អែម ខូចតម្រងនោម ជំងឺបេះដូង ជំងឺថ្លើម និងបង្កឱ្យឡើងគីឡូ។ បើយោងតាមការចេញផ្សាយរបស់ Cleveland Clinic បានណែនាំថា យុវជនគួរទទួលទានជាតិស្ករមិនឱ្យលើសពី៣៦ក្រាមនៅក្នុងមួយថ្ងៃ។ រីឯយុវតីគម្បីទទួលទានជាតិស្ករមិនឱ្យលើសពី២៥ក្រាមក្នុងមួយថ្ងៃ។

ជាមួយគ្នានេះគេហៈទំព័រ Verywellfit បានលើកឡើងថា ជាទូទៅប្រភេទគ្រឿងកំប៉ុង និងគ្រឿងផ្អែមមានផ្ទុកជាតិស្កររហូតដល់ទៅ ៣៩ក្រាម ដែលស្មើនឹង១០ស្លាបព្រាកាហ្វេឯណោះ ដែលវាជាបរិមាណផ្អែមលើសលប់ ដូច្នេះទើបវាងាយបង្កហានិភ័យឱ្យយុវវ័យកើតជំងឺច្រើនមុខផងដែរ។

បើនិយាយពីទំនៀមទម្លាប់របស់ជនជាតិខ្មែរយើងវិញគឺ ចូលចិត្តញុំាអាហារ ឬភេសជ្ជៈណាដែលមានរសជាតិផ្អែម ដិត និងហឹរ ដែល​បន្តរហូតមកដល់សតវត្សទី២១នេះ ប្រជាជានខ្មែរនៅតែបន្តវប្បធម៌ចូលចិត្ត ញុំាអាហាររសជាតិផ្អែម ដិត និងហឹរដដែល នេះបើយោងតាមការចុះផ្សាយរបស់ Welthungerhilfe នៅថ្ងៃទី១៨ ខែ០៨ ឆ្នាំ២០១៥។

បើងាកមកមើលក្មេងៗកម្ពុជាវិញក៏មានទម្លាប់ផឹកភេសជ្ជៈផ្អែម អាហារផ្អែម និងរបស់ផ្អែមផងដែរ ដែលជាហេតុបង្កឱ្យពួកគេងាយប្រឈមមុខកើតជំងឺកាច៤គឺ ជំងឺធាត់ ជំងឺបេះដូង ជំងឺខូចតម្រងនោម និងជំងឺទឹកនោមផ្អែមប្រភេទទី២។ បើយោងតាមប្រសាសន៍របស់ អ្នកឧកញ៉ាវេជ្ជបណ្ឌិត គួច ម៉េងលី ធ្លាប់បានលើកឡើងរួចមកហើយថា ម្ហូបទាំងអស់ដែលអ្នកតែងតែញុំាដូចជា អាហារសម្បូរជាតិស្ករ ទឹកក្រឡុក ទឹកសេរ៉ូ និងគ្រឿងកំប៉ុងនានា សុទ្ធតែមានជាតិស្ករមិនតិចស្លាបព្រានោះទេ ដែលបែបនឹងសុទ្ធតែជាផ្លូវនាំអ្នកឱ្យកើតជំងឺទឹកនោមផ្អែម កើតរោគធាត់ កើតរោគបេះដូង ហើយកើតរោគស្ត្រេសជាដើម។

នៅក្នុងនោះដែរ លោកស្រីវេជ្ជបណ្ឌិត កុសល កណិការ ឯកទេសរោគ​កុមារ សញ្ញាប័ត្រ​ពី​បារាំង ក៏ធ្លាប់បានបង្ហើបប្រាប់ចាបបៃតងផងដែរថា នៅពេលបុគ្គលណាមួយចូលចិត្តញុំាគ្រឿងកំប៉ុងច្រើននៅវ័យក្មេង វាមិនបញ្ចេញផលលំបាកនៃជំងឺបង្កឱ្យយើងឈឺក្នុងវ័យក្មេងនោះទេ ប៉ុន្តែនៅពេលបុគ្គលនោះមានវ័យចាប់ពី៣០ឆ្នាំឡើងទៅ ប្រាកដណាស់ពួកគេច្បាស់ជាចាប់ផ្ដើមចេញរោគសញ្ញានៃជំងឺមកភ្លាម ដែលមូលហេតុដែលអ្នកត្រូវដឹង។

ជាចុងក្រោយ យើងបានដឹងច្បាស់ហើយថា ប្រជាជនខ្មែរមានវប្បធម៌ចូលចិត្តញុំាគ្រឿងកំប៉ុង និងគ្រឿងផ្អែម ដែលជាហេតុធ្វើឱ្យពួកគេប្រឈមកើតជំងឺធាត់ ជំងឺបេះដូង និងជំងឺទឹកនោមផ្អែមជាដើម។ ដូច្នេះដើម្បីចៀសឱ្យឆ្ងាយពីជំងឺទាំងនេះទៅបាន លុះត្រាតែប្រជាជនខ្មែរយើងផ្អាកញុំាគ្រឿងកំប៉ុង និងគ្រឿងផ្អែម។ ដូច្នេះបើស្រលាញ់ជីវិតរបស់ខ្លួន ចូលអ្នកឈប់ផឹកភេសជ្ជៈផ្អែម ឬកាត់បន្ថយផង។

អត្ថបទដោយ៖ Daddy_Rath