ប្រាថ្នារស់រានមានជីវិតឱ្យបានយូរអង្វែងជាមួយមនុស្សដែលយើងស្រលាញ់ បានបំពេញកិច្ចការងារដោយក្តីរីករាយ សន្តិភាពផ្លូវចិត្តក៏នឹងនរនោះចាត់ទុកថាជារឿងសំណាងមួយទៅហើយ។ យើងមិនអាចដឹងថារឿងរ៉ាវមួយណាដែលស្ថិតនៅក្នុងសកម្មភាពប្រចាំ បានធ្វើអោយយើងរងនូវការប៉ះដល់ជីវិតនោះទេ ក៏ប៉ុន្តែយើងខ្លួនឯងនេះហើយត្រូវឧស្សាហ៍ពិនិត្យមើល សុខភាពផ្លូវកាយ ផ្លូវចិត្តជាប្រចាំ។
១.របបអាហារត្រឹមត្រូវ៖ យោងតាមប្រភព middleeastmedicalportal បានចុះផ្សាយថា ចូរអ្នកកាត់បន្ថយអាហារបំពង អាហារកែច្នៃ អាហារដែលមានផ្ទុកនូវសារធាតុរក្សាទុកបានយូរ ព្រោះអាហារបែបនេះ ញ៉ាំច្រើននាំស្រ្តេស នាំបញ្ហាផ្លូវចិត្ត។ អ្នកគួរមកញ៉ាំប្រូតេអ៊ីនបានគ្រប់គ្រាន់ដើម្បីដាស់ផ្លូវចិត្តឱ្យមានថាមពល។ ចូរញ៉ាំអាហារមានដូចជាសាច់គ្មានខ្លាញ់ ត្រី ស៊ុត ឈីស គ្រាប់ធញ្ញជាតិ និងបន្លែស្រស់ពណ៌បៃតង ព្រោះវាមានជាតិអាស៊ីដអាមីណូជាសារធាតុជួយបង្កើនសមត្ថភាពខួរក្បាលក្នុងការគ្រប់គ្រងគំនិត និងអារម្មណ៍បានស្ងប់។
២.បណ្តុះគំនិតវិជ្ជមាន៖ ការគិតបែបវិជ្ជមានជាការគិតរឿងល្អៗ ដើម្បីចិត្តដើរចេញពីអវិជ្ជមាន។ ពេលអ្នកមានទម្លាប់គិតវិជ្ជមាន ចិត្តអ្នកកាន់តែរឹងមាំកាន់តែមានវិធីដោះបញ្ហាដែរ។ តាមលោក James Clear ជាអ្នកនិពន្ធសៀវភៅ Atomic Habits បានលើកឡើងថា ស្វែងយល់យ៉ាងស៊ីជម្រៅអំពីមូលហេតុដែល អ្នកមានទម្លាប់គិតវិជ្ជមានជាបុគ្គលមានចិត្តខ្លាំងព្រមស្គាល់ការពិតជាក់ស្តែងដើម្បីធ្វើការកែប្រែស្ថានភាពឱ្យល្អប្រសើរឡើង។ អ្នកគិតវិជ្ជមានបែបនេះជាមូលដ្ឋានគ្រឹះផ្លូវចិត្តមនុស្សម្នាក់ៗ ដើម្បីលុបបំបាត់ទម្លាប់គិតអវិជ្ជមានសម្រាប់ជីវិត”។
៣. ហាត់ប្រាណដោះអារម្មណ៍ភាពតានតឹង៖ អ្នកធ្វើលំហាត់ប្រាណច្រើនតែមានសុខភាពរាងកាយនិងផ្លូវចិត្តរឹងមាំ។ មិនថាគេហាត់ប្រភេទកីឡា ការដើរ ការរត់ ហាត់យូហ្គា(YOGA) និងលើកទម្ងន់(GYM)នោះ។ តាមវេជ្ជបណ្ឌិត David Clancy នៃសកលវិទ្យាល័យ Lancaster បានពន្យល់ថា អ្នកធ្វើលំហាត់ប្រាណជួយសម្អាត Senescent ជាកោសិកាបង្កើននៃល្បឿនភាពចាស់ បង្កើតស្រ្តេស បញ្ចេញជាតិពុលតាមរយៈផ្នែកផ្សេងៗ នៃរាងកាយ។ ពេលនៅក្នុងខ្លួនអ្នកគ្មានជាតិពុលនោះ អ្នកក៏ចាប់ផ្តើមមានអារម្មណ៍ស្រស់ស្រាយដែរ។
ដូចនេះ! ជាចុងក្រោយនេះអ្នកត្រូវចាំថាគ្មានរបស់ណាដែលមានតម្លៃស្មើរនឹងជីវិតយើងទេ ចូរប្រុងប្រយ័ត្នឱ្យបានខ្ពស់នូវសុខភាពរាងកាយ ថែរក្សាឱ្យបានល្អបំផុតគឺសន្តិភាពផ្លូវចិត្ត៕ អត្ថបទដោយ៖ ជុំ សុដាឡែន