សព្វថ្ងៃនេះ មានហាងបាយជាច្រើនរាងស្ងាត់ភ្ញៀវ ព្រោះតែសេដ្ឋកិច្ចរាងពិបាក ហើយអ្នកធ្វើការ និងអ្នករកស៊ីមួយចំនួនក៏មានធ្លាក់ចំណូលធ្លាក់តាមហ្នឹងដែរ។ អ៊ីចឹងហើយការចំណាយលុយក៏មានកម្រិតក្នុងការហូបតាមហាងបាយ។ ខ្ញុំមកសៀមរាប មានហាងបាយមួយលក់ខ្លាំង មានចំណូលច្រើន គាត់បើកហាងបាយជិត ២០ឆ្នាំហើយ គឺហាងបាយហៃណាំ ហើយគាត់បាននិយាយថា “ហាងអាហារខ្ញុំអាចឈរជើងបានមិនមែនត្រឹមអាហារឆ្ងាញ់ទេ គឺធ្វើឱ្យចិត្តភ្ញៀវឆ្ងាញ់ថែមទៀត បានហាងយើងមិនខ្វះភ្ញៀវទេ។ ពេលហាងយើងទាក់បេះដូងភ្ញៀវរួចហើយ ភ្ញៀវមិនងាយទៅកន្លែងផ្សេងទេ”។ នៅខាងក្រោយនេះជារូបមន្តទាក់បេះដូងឱ្យនៅជាមួយហាង៖
១. ពិសេសជាងគេ៖ ម្ចាស់ហាងបាយ ហៃណាំ បាននិយាយថា ហាងខ្លាំង មិនមែនមានចំណុចពិសេសច្រើនទេ មានតែចំណុចពិសេសមួយបានហើយ។ ដូចជាយើងមានបេះដូងស្មោះត្រង់ចំពោះគ្រួសារតែមួយ ច្បាស់ណាស់គ្រួសារយើងនឹងមានក្តីសុខ។ សូម្បីតែភ្ញៀវក៏ដូចគ្នាដែរ។ ហាងបាយហៃណាំរបស់ខ្ញុំមានចំណុចពិសេសជាងគេគឺបាយរសជាតិក្លិនសាច់មាន់ និងរសជាតិស៊ុបជូតិចៗ តែឈ្ងុយ”។ ពេលខ្ញុំចូលហួបបាយនៅហាងហៃណាំ អ្វីដែលខ្ញុំជាប់ចិត្តមុនដំបូងគេហើយនិយាយប្រាប់ក្រុមការងារថាឆ្ងាញ់នោះ គឺបាយហ្នឹងឯង។ បាយរសជាតិសាច់មាន់ សូម្បីតែអ្នកជាច្រើនទៀតដែលបានហូបហើយ ខ្ញុំសួរក៏មានចម្លើយដូចគ្នាដែរគឺបាយឆ្ងាញ់។ ម្ចាស់ហាងបាននិយាយដោយស្នាមញញឹមថា បាយរបស់ខ្ញុំ ហូបបាយទទេក៏ឆ្ងាញ់ក៏មានកម្លាំងដែរ។ ព្រោះវាមានរសជាតិក្នុងសាច់បាយជាមួយស៊ុបសាច់ ទោះបីភ្ញៀវហូបច្រើនក៏ទ្រលន់ដែរ។ សូម្បីតែតារាល្បីៗ ច្រើន ឱ្យតែមកកម្មវិធីសៀបរាម ដឹងតែមកហូបបាយខាងខ្ញុំហើយ។ ព្រោះបាយនិងទឹកស៊ុបហូបទៅ រសជាតិស៊ីគ្នាណាស់គឺឆ្ងាញ់។ នេះជារូបមន្តមួយ។
២. ម្ចាស់ញញឹម ចិត្តភ្ញៀវរីករាយ៖ ពេលយើងទៅហូបបាយនៅហាងណាមួយ ទោះបីម្ហូបឆ្ងាញ់ក៏ដោយ បើម្ចាស់ហាងមានផ្ទៃមុខស្អុយ ឬមួយខឹងហើយនោះ បាត់អារម្មណ៍ភ្ញៀវគឺអស់អារម្មណ៍ឆ្ងាញ់ហើយ។ ម្ចាស់ហាងបាយហៃណាំ គាត់បានលើកឡើងថា ស្នាមញញឹមរបស់ម្ចាស់ហាងជារឿងសំខាន់សម្រាប់ចិត្តភ្ញៀវ។ គេមកហូបបាយនៅហាងរបស់យើង ភ្ញៀវត្រូវការចំណុចពីរសំខាន់គឺ បាយកន្លែងយើងឆ្ងាញ់ និងទីពីរសំខាន់គឺ ឱ្យភ្ញៀវឆ្ងាញ់ចិត្តផងគឺចិត្តរីករាយហ្នឹងឯង។ ភ្លៀវត្រូវការរបស់ទាំងពីរយ៉ាងហ្នឹង ហើយយើងត្រូវការចំណូលមកវិញដែរ។ ហើយក៏គាត់បានបន្ថែមថា ខ្ញុំជឿថា ឱ្យតែម្ចាស់ហាងរីករាយ ភ្ញៀវក៏រីករាយដែរ។ ពេលខ្ញុំសួរសុខទុក្ខ ឬមួយនិយាយលេងជាមួយភ្ញៀវក៏ពួកគាត់មានអារម្មណ៍កក់ក្តៅពេលហូបបាយរួចពីហាងយយើងដែរ”។ នេះជាចំណុចទាក់ចិត្តភ្ញៀវ។
៣. សេវាកម្មលឿនរហ័ស៖ ម្ចាងហាងបាយហៃណាំ បានលើកឡើងថា យើងជាលក់ មិនលក់ផ្តល់សេវាកម្មយូរឱ្យភ្ញៀវនោះទេ។ ភ្ញៀវពេលគាត់ចូលមកដល់ហាងយើងហើយគឺគាត់មានអារម្មណ៍ឃ្លាន បើយើងប្រើពេលយូរនោះ ភ្ញៀវចាប់ផ្តើមានអារម្មណ៍មួម៉ៅជាមិនខានឡើយ។ ដូច្នេះហើយ ខ្ញុំកាប់សាច់ និងរៀបចំរបស់ផ្សេងៗ ឱ្យលឿនបំផុត ឱ្យភ្ញៀវមានអារម្មណ៍ថា សេវាកម្មយើងលឿនមែន ហើយបូកជាមួយម្ហូបឆ្ងាញ់ ភ្ញៀវជាប់ចិត្តនៅហាងយើងជាមិនខានទេ។ ព្រោះពេលខ្ញុំទៅដើរលេង ហើយចូលហាងបាយណាមួយ ក៏មិនសូវជាចូលចិត្តរងចាំយូរដែរ។ អារម្មណ៍ចាំយូរមួយនេះហើយ ធ្វើឱ្យខ្ញុំគិតថា ខ្ញុំព្យាត្រូវយាមធ្វើឱ្យភ្ញៀវរបស់ខ្ញុំបានហូបអាហារឱ្យលឿនបំផុត។ ពេលខ្លះចំណុចតូចតូចៗ ទេ បើយើងជាម្ចាស់មើលរំលងហើយ ច្បាស់ជាដាច់ភ្ញៀវលែងចូលហូបជាមិនខានឡើយ។
ដូច្នេះហើយ ម្ចាស់ហាងគួរតែមានសិល្បពិសេសដូចជាហាងហៃណាំដែរដើម្បីលក់ដាច់ដូចជាគាត់។ ទោះបីពេលឥឡូវសេដ្ឋកិច្ចរាងពិបាកក៏ដោយ ក៏ហាងហៃណាំលក់ក្នុងមួយថ្ងៃ ២០០ចានជាងដែរជាថ្ងៃធម្មតា។ ពេលអ្នកពេលរៀនសូត្រទាំងបីចំណុចនេះយកទៅច្នៃចូលហាងរបស់លោកអ្នក ហាងរបស់អ្នកនឹងមានភ្ញៀវចូលច្រើនជាមិនខានឡើយ៕ អត្ថបទដោយ៖ ទ្រ សុភាព
នេះជាលេខទូរស័ព្ទម្ចាស់ហាងបាយហៃណាំ សំណាង ៖ ០៨១ ៣៨៨ ៨២៥ និង099 266 646