ស្រ្តីពេលមានផ្ទៃពោះ ពិតជាទទួលអារម្មណ៍មួយពិបាកក្នុង ឈរ អង្គុយ ឱន ជាពិសេសគឺពិបាកក្នុងការគេងតែម្ដង ដោយសារពោះកាន់តែធំទៅៗពីមួយថ្ងៃទៅមួយថ្ងៃរាល់សកម្មភាពទាំងអស់ខាងលើអាចពិបាកក្នុងការធ្វើ។ អ៊ីចឹងម៉ាក់ៗមានដឹងអត់ គួរគេងបែបណាដើម្បីឱ្យខ្លួនឯងមានអារម្មណ៍ថាស្រួលក្នុងខ្លួនផង មានសុវត្ថិភាពដល់កូនក្នុងផ្ទៃ រួមទាំងមិនប៉ះពាល់ដល់កូននៅក្នុងផ្ទៃដូចគ្នា?

ផ្សារភ្ជាប់និងរបៀបដែលម៉ាក់ៗពពោះគួរដឹង ក្រុមការងារចាបបៃតងចង់ចែករំលែក វិធីគេងខ្លះៗ តាមរយៈចំនួនខែដែលម៉ាក់ៗពពោះ ដើម្បីឱ្យការគេងមានប្រសិទ្ធភាព រួមទាំងមានសុវត្ថិភាពដល់ទារកនៅក្នុងផ្ទៃកំពុងតែលូតលាស់ ។

១.ពរពោះត្រីមាសទី១៖ ជាធម្មតា​ការពពោះដំបូងរបស់ស្រ្តី ទំហំពោះមិនទាន់ធំនោះទេ ជាហេតុនាំឱ្យស្រ្តីអាចគេងធ្វើចលនាបានដូចធម្មតា មិនមានជាការប៉ះ កល់ពោះដូចការពពោះច្រើនខែបន្ទាប់នោះទេ ។

២.ចាប់ពីត្រីមាសទី២ទៅ៖ កាលណាចូលដល់ត្រីមាសទី២ឡើងទៅហើយស្រ្តីត្រូវប្រុងប្រយ័ត្នជាមួយអាប្បកិរិយា ក្នុងការគេងជាប្រចាំថ្ងៃ ពីព្រោះថា ទំហំពោះចា​ប់ផ្ដើមធំ បើចេះតែគេងរើស គេងពោបតាមចិត្តនោះទេ គឺមានរបៀបគេងត្រឹមត្រូវ ។ តាមរយៈប្រភព whattoexpect បាននិយាយថា ស្រ្ដីអាចគេងផ្អៀងទៅខាងឆ្វេងបាន ។​ការគេងបែបនេះជួយឱ្យលំហូរឈាមនិងសារធាតុចិញ្ចឹមផ្សេងៗ រត់ទៅកាន់សុកដើម្បីចិញ្ចឹមទារកមានតុល្យភាព រួមទាំងជួយធ្វើឱ្យស្រ្តីមិនបង្កជាអាការហើមកដៃ ហើមកជើង។ ដើម្បីជួយឱ្យបានភាពងាយស្រួលក្នុងការគេងផ្អៀង ស្រ្តីអាចយកខ្នើយកល់នៅខាងក្រោយចង្កេះ ឬក៏ពីខាងមុខក្បែរពោះ។

៣.ស្រ្តីគេងឱ្យគ្រប់៖ ម៉ាក់ៗពេលពពោះកូន ត្រូវគេងឱ្យបានគ្រប់គ្រាន់ ព្រោះការគេងគ្រប់គឺជួយដល់ការលូតលាស់របស់កូនក្នុងផ្ទៃបានល្អប្រសើរ ។ មួយវិញទៀតម៉ាក់ៗកុំព្យាយាមស្រ្តេសច្រើន ព្រោះអាចបង្កជាបញ្ហាគេងលែងលក់ បើកាលណាម៉ាក់មានបញ្ហាគេងហើយ សុខភាពអាចទ្រុឌទ្រោម បង្កជាជំងឺលើសឈាមពេលមានគត៌ ទារកខ្សោយការលូតលាស់ (ទម្ងន់ទាប)។

គូសបញ្ជាក់ឱ្យដឹងថាប្រសិនណាម៉ាក់ៗដែលកំពុងតែពពោះ ចង់គេងស្រួលខ្លួន ចង់ដឹងពីរបៀបគេងមិនបង្កជាហេតុគ្រោះថ្នាក់ដល់ទារកនៅក្នុងផ្ទៃ ត្រូវដឹងពីរៀបគេងតាមរយៈពេលនៃការពពោះឱ្យបានត្រឹមត្រូវ និងព្យាយាមគេងរាល់ថ្ងៃឱ្យបានគ្រប់ ចៀសវាង មានបញ្ហាលើសឈាម ទារកខ្វះទម្ងន់ឡើងមក និងព្យាយាមពិនិត្យសុខភាពរាល់ខែឱ្យបានទៀងទាត់៕

អត្ថបទដោយ៖ ប៉ែត ធីតា