ជាជោគជ័យបំផុតរបស់កីឡាការិនី ស៊ន សៀវម៉ី ជូនជាតិមាតុភូមិទាំងមូល ដែលមានឱកាសក្លាយជាវីរការិនីឆ្នើមតំណាងឱ្យមុខមាត់ប្រទេសកម្ពុជា។ រឿងដែលរឹតតែពិសេស លើសពីក្ដីរំភើប គឺភាពជោគជ័យមួយនេះ បានទទួលការសាទរយ៉ាងក្រាស់ក្រៃពីសំណាក់មនុស្សជុំវិញខ្លួន ជាពិសេសមនុស្សជាទីស្រឡាញ់។

តួរយ៉ាង ក្រោយពីកីឡាការិនី ស៊ន សៀវម៉ី បានទទួលជ័យជម្នះលើការប្រកួតប្រភេទកីឡា តៃក្វាន់ដូ ក្នុងមហាព្រឹត្តិការណ៍ស៊ីហ្គេមលើកទី៣២ ដោយបានផ្ទួលកីឡាការិនីមកពីប្រទេសឡាវ ទទួលបានមេដាយមាសជូនកម្ពុជា អ្នកនាងបានកាន់ទង់ជាតិ រត់សំដៅទៅពរកូនស្រីដោយក្ដីរំភើប។ រូបភាពដ៏មានអត្ថន័យមួយនោះ ហាក់បីដូចជាចង់បង្ហាញឱ្យកូនស្រីឃើញថា “អ្នកម្តាយរូបនេះ ធ្វើបានហើយ លើកមុខមាត់គ្រួសារបានហើយ បើកបង្ហាញពីមុខមាត់ប្រទេសជាតិទាំងមូលទៅកាន់ពិភពលោកបានហើយ”។

ផ្សារភ្ជាប់ជាមួយក្ដីរំភើបនេះ ស្វាមីរបស់អ្នកនាង ស៊ន សៀវម៉ី បានបង្ហើរសារខ្លីក្នុងគណនីផ្ទាល់ខ្លួន ដោយភ្ជាប់ជាមួយរូបភាពដែលភរិយាឱបកូនស្រី ថា “សង្ឃឹមថារូបភាពនេះអាចទុកជាការចងចាំមួយសម្រាប់កូន អ្នកម្ដាយរបស់កូនជាមោទនភាពសម្រាប់ប្រទេសជាតិនិងកិត្ដិយសណាស់សម្រាប់ក្រុមគ្រួសាររបស់យើង។ ទោះលំបាក ឈឺចាប់ នឿយហត់ប៉ុនណាក៏គាត់តស៊ូមិនឈប់និងមិនដែលរអ៊ូឡើយ ចឹងបើថ្ងៃក្រោយពេលដែរកូនលំបាកបំផុត កូនត្រូវតែរឹងមាំងដូចម្ដាយរបស់កូន។ អបអរសាទរអូនសម្រាប់ជ័យជំនះមួយនេះ រីករាយទិវាម្ដាយពិភពលោក”។

សារយ៉ាងខ្លីតែរយលានអត្ថន័យមួយនេះ បានធ្វើឱ្យអ្នកគាំទ្រជាច្រើនពិតជារំជួលចិត្ត និងរំភើបចិត្តជំនួស វីវការិនី ស៊ន សៀម៉ី ណាស់។ កាលពី២ថ្ងៃ មុនការប្រកួតមកដល់ ស្វាមី របស់អ្នកនាង ក៏បានសរសេរសារលើកទឹកចិត្តភរិយាផងដែរថា “សល់តែ២ថ្ងៃទៀតទេ ជាថ្ងៃដែរគាត់ត្រូវឡើងប្រកួតយកមេដៃហើយក៏ជាថ្ងៃដែរខ្ញុំនិងគ្រួសារមានមោទនភាពបំផុត។ គាត់លំបាកហើយដែរខិតខំខ្លាំងណាស់ដើម្បីយកកិត្ដិយសជូនជាតិ ទាំងដែរជើងធ្លាប់មានរបួសធន់ធ្ងរហើយក៏នៅតែព្យាយាមហាត់ព្រឹក ថ្ងៃ គាត់នៅតែបន្ដ។”

នេះស្តែងឱ្យឃើញថា កម្លាំងចិត្ត ការលើកទឹក ការគាំទ្រពីមនុស្សដែលខ្លួនស្រឡាញ់ វាពិតជាកត្តាលីករដ៏ធំមួយ ដែលអាចធ្វើឱ្យដៃគូអាចសម្រេចក្ដីស្រមៃរបស់ខ្លួនបាន។ ចូរធ្វើជាកម្លាំងចិត្ត ជាអ្នកគាំទ្រ ជាមិត្ត ជាអ្នកប្រឹក្សាដល់ដៃគូទៅវិញទៅមកនោះ អ្នកនឹងអាចកាន់ដៃគ្នាសម្រេចគោលដៅរួមមួយបាន៕

អត្ថបទដោយ៖ Senghong