១. នោមញឹកញាប់ ឬស្រេកទឹកខ្លាំងខុសធម្មតា៖ វាកើតឡើងដោយសារជាតិស្ករលើសត្រូវបានបញ្ចេញតាមទឹកនោម ហើយជាតិទឹកក្នុងរាងកាយក៏ត្រូវបានទាញចេញជាមួយគ្នាដែរ ធ្វើឱ្យរាងកាយយើងបាត់បង់ជាតិទឹក។ ពេលនោះនឹងធ្វើឱ្យយើងស្រេកទឹកខ្លាំង ផឹកទឹកច្រើន ហើយក៏ធ្វើឱ្យនោមច្រើនដូចគ្នាដែរ។ ស្ថានភាពបែបនេះហៅថា polyuria។

២. ឃ្លានខ្លាំង ឬញុំាច្រើនខុសធម្មតា៖ វាកើតឡើងព្រោះរាងកាយមិនអាចប្រើជាតិស្ករដែលមានស្រាប់ក្នុងឈាមសម្រាប់ផលិតថាមពលបាន ដោយសារកង្វះអាំងស៊ុយលីន ឬកោសិកាឆ្លើយតបមិនល្អចំពោះអាំងស៊ុយលីន។ ដូច្នេះរាងកាយនឹងបញ្ចេញសញ្ញាឱ្យឃ្លាន ដើម្បីស្វែងរកថាមពលបន្ថែម។ ប៉ុន្តែជាតិស្ករពីអាហារថ្មីៗក៏នៅតែមិនអាចប្រើបាន ដូច្នេះវានាំឱ្យឃ្លានរហូត ប៉ុន្តែស្រកគីឡូរលឿនខុសធម្មតា។

៣. អស់កម្លាំង និងខ្សោយ៖ នៅពេលជាតិស្ករមិនអាចចូលក្នុងកោសិកាដើម្បីផ្គត់ផ្គង់ថាមពលបាន ឬត្រូវបានបញ្ចេញតាមទឹកនោម វាធ្វើឱ្យរាងកាយមិនមានថាមពលគ្រប់គ្រាន់ ហើយនាំឱ្យមានអារម្មណ៍ធុញ ហត់នឿយ អស់កម្លាំង។ រាងកាយនឹងចាប់ផ្តើមប្រើសាច់ដុំ និងខ្លាញ់ជាជម្រើសដើម្បីផលិតថាមពល ប៉ុន្តែវាក៏នាំឱ្យស្រកទម្ងន់យ៉ាងឆាប់រហ័សផងដែរ។

៤. បញ្ហាស្បែក៖ នៅពេលកម្រិតស្ករខ្ពស់ ស្បែកអាចស្ងួត ងាយរមាស់ និងងាយឆ្លងមេរោគ។ ពេលមានរបួសមិនងាយជា។ ហើយជាតិស្ករខ្ពស់ធ្វើឱ្យប្រព័ន្ធភាពស៊ាំចុះថយ ងាយឆ្លងមេរោគជាពិសេសផ្លូវទឹកនោម ផ្លូវដង្ហើម និងស្បែក។

៥. ស្រវាំងភ្នែក៖ វាកើតឡើងដោយសារការប្រមូលជាតិទឹកនៅក្នុងភ្នែក ឬការផ្លាស់ប្តូររូបរាងនៃកែវភ្នែក។ ជាធម្មតា វាជារឿងបណ្ដោះអាសន្ន ហើយអាចត្រឡប់មកធម្មតាវិញពេលជាតិស្ករត្រូវបានគ្រប់គ្រង។ ប៉ុន្តែបើសិនជាស្ថានភាពនេះបន្តយូរ វាអាចធ្វើឱ្យខូចសរសៃឈាមតូចៗនៅក្នុងភ្នែក បណ្តាលឱ្យមានជំងឺ Diabetic Retinopathy ឬក៏ធ្វើឱ្យមើលលែងឃើញតែម្ដង។

ការលើសជាតិស្ករខ្ពស់រយៈពេលយូរបើមិនយកចិត្តទុកដាក់ទេ អាចប៉ះពាល់ដល់សរសៃប្រសាទ បណ្តាលឱ្យមានអារម្មណ៍ ស្ពឹកដៃជើង។ ស្ថានភាពនេះហៅថា Diabetic Neuropathy ដែលជាផលវិបាកមួយនៃជំងឺទឹកនោមផ្អែម។ ការខូចសរសៃប្រសាទក៏អាចប៉ះពាល់ដល់ប្រព័ន្ធសរសៃនៅក្នុងប្រដាប់ភេទ បណ្តាលឱ្យមានបញ្ហាផ្លូវភេទ ឬអសមត្ថភាពផ្លូវភេទសម្រាប់បុរស និងការថយចុះនៃសមត្ថភាពបង្កកំណើតសម្រាប់ស្ត្រី។ ដូច្នេះបើអ្នកសង្កេតឃើញខ្លួនឯងមានសញ្ញាទាំងនេះគួរតែទៅពិនិត្យជាតិស្ករក្នុងឈាមជាបន្ទាន់។ ជៀសវាងហួសពេលមិនអាចគ្រប់គ្រងបាន ត្រឹមត្រូវ អាចបង្កទៅជាជំងឺទឹកនោមផ្អែម និងធ្វើឱ្យខូចសរីរាង្គសំខាន់ៗផ្សេងទៀត៕

អត្ថបទដោយ៖ សារួ