និយាយទៅរឿងប្តីប្រពន្ធរស់នៅជាមួយគ្នា នាំឱ្យមានវិបត្តិផ្លូវចិត្តនោះ គឺចាប់ផ្តើមចេញពីរឿងតូចៗ និងការមិនស្តាប់គ្នា។ បើអ្នកមិនចាប់អារម្មណ៍ និងមិនព្យាយាមដោះស្រាយទេ វានឹងក្លាយជាជំងឺមហារីកផ្លូវចិត្តរវាងប្តីនិងប្រពន្ធមិនខានទេ។ ដើម្បីបញ្ជាក់ឱ្យបានច្បាស់នោះ ខ្ញុំសុំលើករឿងជីវិតពិតរបស់ប្រធានាធិបតីអាមេរិកម្នាក់ គឺ អាប្រាហាម លិងខូលន៍ ដែលទ្រាំរស់នៅជាមួយភរិយាគ្រាំចិត្តអស់ពេល ២៣ឆ្នាំឯណោះ។

លោក Dale Carnegie ជាចិត្តវិទ្យាបាននិពន្ធសាច់រឿងគ្រួសាររបស់លោក អាប្រាហាម លិងខូលន៍ ថា រយៈពេល ២៣ឆ្នាំចុងក្រោយជីវិតលោក គឺជីវិតរស់នៅក្នុងការគ្រាំគ្រាផ្លូវចិត្ត និងគ្មានក្តីសុខនោះទេ។ ដោយសារតែប្រពន្ធរបស់គាត់តែងស្តីបន្ទោស រអ៊ូរទាំ និងរិះគន់លោក លិងខូលន៍ថា ជាមនុស្សខ្នងគម ដំណើរមិនសមសួន ពេលទៅណាម្តងៗ ធ្វើយោកៗ លើកជើងខ្ពស់ៗ ធ្វើអ្វីក៏មិនទំនង ហើយប្រពន្ធធ្វើត្រាប់តាមកាយវិការលិងខូលន៍ ដើម្បីចំអកឡកឡឺយថែមទៀត។ ប្រពន្ធគាត់រអ៊ូពីស្លឹកត្រចៀកធំៗ​ មានច្រមុះវៀច បបូរមាត់ធ្លាក់ កាយវិការដូចមនុស្សប្រគ្រីវ ដៃ ជើងធំៗ និងក្បាលតូចជ្រុលពេកជាដើម។

លើសពីនេះ នៅពេលព្រឹកមួយ លិងខូលន៍ និងភរិយាកំពុងតែបរិភោគអាហារពេលព្រឹកជាមួយគ្នា ស្រាប់តែគាត់ធ្វើឲ្យភរិយាខឹងច្រឡោត តែរឿងនោះគ្មាននរណាចាំបានថា ជារឿងអ្វីនោះទេ គ្រាន់តែដឹងថា ភរិយារបស់គាត់ខឹងច្រឡោត ក៏ជះកាហ្វេក្ដៅដាក់ចំពីមុខលោក លឹងខូលន៍ រួមទាំងមានមនុស្សជាច្រើននៅទីនោះ។ គាត់មានអារម្មណ៍ខ្មាស់អៀន... រហូតម្ចាស់ផ្ទះជួលយកកន្សែងពោះគោជ្រលក់ទឹកមកជូតមុខ និងសម្លៀកបំពាក់ឱ្យ។

នេះគ្រាន់តែជារឿងមួយ បញ្ជាក់ដល់យើងទាំងអស់គ្នាដឹងថា បើជីវិតប្តីប្រពន្ធ ចេះតែចាប់កំហុសគ្នា ចេះតែបន្ទោសដៀលត្មះគ្នា ចេះរអ៊ូរទាំសន្សំរឿងតូចៗ ដាក់គ្នា វាធ្វើឱ្យអាពាហ៍ពិពាហ៍គូស្នេហ៍ចាប់ផ្តើមអស់ក្តីស្រឡាញ់ និងក៏អានឈានជើងដល់ការលែងលះគ្នាផងដែរ។ ហើយប្តីប្រពន្ធចាប់ផ្តើមផ្លាស់ប្តូរមនោសញ្ចេតនា និងអាកប្បកិរិយាដែលធ្លាប់ស្រឡាញ់គ្នា ក៏បាត់បង់ដែរ។ ហេតុនេះ បើលោកអ្នកចង់រក្សាជីវិតគ្រួសារឱ្យមានសុភមង្គលនោះអ្នកត្រូវគោរពគោលការណ៍មួយនេះ កុំធ្វើជាមនុស្សរអ៊ូរទាំ សន្សំរឿង ត្រូវចេះស្តាប់គ្នាដោយការបើកចិត្ត៕

អត្ថបទដោយ៖ ទ្រ សុភាព