តាមលោកវេជ្ជបណ្ឌិត ឈាង ស៊ីដេត ឯកទេសថ្លើម ក្រពះពោះវៀន និងឬសដូងបាត នៃមន្ទីរពេទ្យ EKIP Medical Centre អេគីប មេឌីខល បានលើកឡើងថា អ្នកមានទម្លាប់ផឹកស្រាមួយអាទិត្យត្រឹមតែពីរទៅបីដង មិនត្រឹមតែប៉ះពាល់ក្រពះពោះវៀននោះទេ វាប៉ះដល់ថ្លើម និងសរសៃឈាមថែមទៀត។ ដោយសារមនុស្សសព្វថ្ងៃនេះ រវល់ច្រើនគ្មានពេលហាត់ប្រាណបញ្ចេញញើស បញ្ចេញជាតិពុលធ្វើឱ្យសុខភាពចុះខ្សោយម្តងបន្តិចៗ ដោយអត់ដឹងខ្លួននោះទេ”។ ដើម្បីការពារថ្លើម និងតម្រងនោមចេញពីជាតិពុល អ្នកគួរពិសារភេសជ្ជៈ ៣នេះពេលព្រឹក៖
១. ពិសារទឹកពេលព្រឹក ពេលអ្នកផឹកទឹកមួយកែវជួយរក្សាជាតិនៅក្នុងទឹកនោមឱ្យថ្លាជាមួយការបញ្ចេញចោលកាកសំណល់និងជាតិពុលពីតម្រងនោមឱ្យមានសុខភាពល្អ។ តាមវេជ្ជបណ្ឌិត Kerry Willis មានប្រសាសន៍ថា ការផឹកទឹកឱ្យបានគ្រប់គ្រាន់ក្នុងមួយថ្ងៃជាមធ្យោបាយដ៏ល្អជួយកាត់បន្ថយហានិភ័យគ្រួសក្នុងតម្រងនោមបានពាក់កណ្តាល។ ការផឹកទឹកច្រើនពេលព្រឹក និងពេលថ្ងៃនោះ នេះជាយុទ្ធសាស្ត្រលាងជាតិពុលចេញពីថ្លើមនិងតម្រងនោមឱ្យមានសុខភាពល្អ។
២. ពិសារកាហ្វេពេលព្រឹកក៏ជួយថ្លើមដែរ៖ ការពិសារកាហ្វេចាប់ពី ៣ ទៅ ៤ពែងក្នុងមួយថ្ងៃជួយកាត់បន្ថយការវិវត្ត និងអត្រាស្លាប់ដោយសារជំងឺថ្លើមរ៉ាំរ៉ៃបានយ៉ាងមានប្រសិទ្ធភាពខ្ពស់។ តាមគេហទំព័រ Healthy បានចុះផ្សាយពីមនុស្សចូលរួមច្រើនជាង ៤សែននាក់បានបញ្ជាក់ថា អ្នកពិសារកាហ្វេពីរពែងក្នុង ១ថ្ងៃជួយបន្ថយការប្រឈមនឹងជំងឺក្រិនថ្លើមបាន ៤៤%ឯណោះ។
៣. តែស្លឹកគ្រៃឆុងផឹកពេលព្រឹកពិតជាមានប្រយោជន៍ជួយការពារនិងកាត់បន្ថយជំងឺមហារីកសុដន់ ជាពិសេសការពារជំងឺមហារីកថ្លើមដោយសារមានសារធាតុមានក្នុងស្លឹកគ្រៃគឺ citral នេះបើយោងតាមរយៈការសិក្សាចេញពីមន្ទីរពិសោធន៍។ សម្រាប់តែស្លឹកគ្រៃក៏មានប្រយោជន៍ជួយដល់ការបន្សាបជាតិពុលចេញពីតម្រងនោម និងធ្វើឱ្យតម្រងនោមសកម្មមុខងារជាងមុន និងសុខភាពល្អជាងមុនដែរ។
ដូច្នេះហើយ! ពេលព្រឹកអ្នកពិសារភេសជ្ជៈទាំង ៣នេះ ជួយថ្លើម និងតម្រងនោមមានសុខភាពល្អ។ បើអ្នកបន្ថែមទម្លាប់ផ្សេងទៀតដូចជាការហាត់ប្រាណ គេងឱ្យបានគ្រប់គ្រាន់ និងជៀសវាងភេសជ្ជៈគ្រឿនស្រវឹងឬភេសជ្ជៈផ្អែមៗ ជាដើមនោះ ច្បាស់ណាស់! សុខភាពថ្លើម និងតម្រងនោមកាន់តែគ្មានជាតិពុលច្រើននោះទេ។ ពេលអ្នកមានទម្លាប់ល្អ អ្នកគ្មានថ្ងៃឈឺនោះទេ៕ អត្ថបទដោយ៖ ទ្រ សុភាព
