ស្រ្តីគ្រប់រូបថែសម្រស់ដូចជា ស្បែកមុខ​​ ដងខ្លួន សក់ ក្រចក...ជាដើម តែមានចាប់អារម្មណ៍ពីការមើលថែសុខភាពស្បូនរបស់អ្នកទេ? តាមពិតទៅស្រ្តីគួរតែយកចិត្តទុកដាក់ឱ្យបានច្រើន ពីព្រោះថាស្បូនបើមានជំងឺអាចបង្កគ្រោះថ្នាក់ដល់ជីវិតបាន​ ងាយប្រឈមជំងឺដូចជា រីកស្បូន ស្រុតស្បូន មហារីកមាត់ស្បូន ឆ្លងរោគដូចជារលាកស្បូន ធ្លាក់ស រមាស់​ សុទ្ធសឹងជាជំងឺដែលអាចកើតប្រសិនណាមិនយកចិត្តទុកដាក់ថែទាំ ជាពិសេសបញ្ហារីកស្បូន ដែលស្រ្តីភាគច្រើនជួបប្រទះ។

ជាការពិតណាស់ ដើម្បីការបង្ការគ្រោះថ្នាក់ដល់ជីវិតបានទាក់ទងនឹងបញ្ហារីកស្បូនស្រ្តីត្រូវដឹងពីវិធីការពារ រោគសញ្ញា មូលហេតុដែលនាំឱ្យស្បូនរីក។ ដោយយោងតាមរយៈគេហទំព័រmayoclinicបានបញ្ជាក់ឱ្យដឹងថារោគសញ្ញាស្បូនរីកមានដូចជា៖

-ឈឺចាប់ពេលរួមភេទ

-ឈឺខ្នង

-ប៉ោងទ្វារមាស ស្បូនរីកអាចធ្លាក់មកក្រៅទ្វារមាស

-ពិបាកក្នុងការដើរ

-ពិបាកបត់ជើងតូច។

មូលហេតុនាំឱ្យស្បូនរីក៖ ចំពោះមូលហេតុដែលនាំឱ្យស្បូនរីកគឺដោយសារការខ្សោយជាលិកាឆ្អឹងអាងត្រគាគដែលមកពីកត្តាជាច្រនដូចជា

-សម្រាកកូនដោយធម្មជាតិច្រើ​នដង (ទម្ងន់កូនធំ)

-ស្រ្តីមានអាយុច្រើន

-លើសទម្ង​ន់

-កម្រិតអរម៉ូនអ៊ឹស្ត្រូសែនទាបបន្ទាប់ពីអស់រដូវ

-លើករបស់របរធ្ងន់ៗជាប្រចាំ

-ក្អករុំារ៉ៃ ជក់បារី

-ទល់លាមករុំារ៉ៃ។

វិធីការពារស្បូនរីក៖

-ព្យាយាមកុំឱ្យទល់លាមកញឹកញាប់

-ព្យាយាមគ្រប់គ្រងការក្អក

-ចៀសវាងលើករបស់ធ្ងន់ៗ

-ញុំាបន្លែ គេង ផឹកទឹកឱ្យបានគ្រប់គ្រាន់

-ព្យាយាមរក្សាទម្ងន់កុំឱ្យលើសធាត់ពេក ស្គមពេក។

មួយវិញទៀត ការហាត់ប្រាណក៏អាចជួយឱ្យស្បូនរបស់ស្រ្តីរឹងមាំ មានសុខភាពល្អមិនងាយខ្សោយ រីកធ្លាក់ ឬស្រុតស្បូនឡើងមក​។លំហាត់ប្រាណទាំង៣នេះ ជួយឱ្យស្បូនរឹងមាំបញ្ចៀសជំងឺ មានដូចជា៖

១ squat ៖ ឈរឱ្យត្រង់ហើយដាក់កែងជើងឱ្យស្មើរនឹងស្មារ ញែកចុងជើងចេញក្រៅ១៥ដឺក្រេ ស្រូបខ្យល់ចូល ហើយបិតដង្ហើម ប្រឹងក្បាលពោះ ចាប់ផ្ដើមទម្លាក់គូទចុះ​ ធ្វើយ៉ាងណាកុំឱ្យជង្គង់លើសចុងជើង ងើបឱ្យត្រង់ឱ្យវិញ ហើយផ្លុំខ្យល់ចេញតាមមាត់។ ធ្វើឱ្យបាន១០ដង ក្នុងមួយជុំ អាចធ្វើបាន៥ជុំក្នុង១ថ្ងៃ។

២ bridge exercise ៖ ផ្តេកខ្លួន បញ្ឈរជង្គង់ ដាក់ដៃឱ្យស្របខ្លួន ហើយលើខ្លួនឡើងជាបន្ទាត់ត្រង់ពីជង្គង់ដេញមកក្បាល ធ្វើ១០ដងក្នុង១ជុំ ឬ៣ទៅ៨នាទីក្នុង១ថ្ងៃ។

៣ Kegels ៖ គេងដាក់ខ្លួនឱ្យត្រង់ ហើយលើកជង្គង់ឡើង យកដៃសងខាងទាញជង្គង់ឱ្យផ្អៀងមករកពោះ ធ្វើឱ្យបាន៣ទៅ៥នាទី រហូតដល់មានអារម្មណ៍ថាតឹងសាច់ដុំ ហើយដាក់ជើងចុះធម្មតាវិញ៕

អត្ថបទដោយ៖ប៉ែត ធីតា