ចង់រស់ក្នុងជំងឺ ឬរស់ក្នុងសុខភាពល្អ? នេះជាជម្រើសរបស់អ្នក។ បញ្ហាមួយដែលប្រជាជនខ្មែររាងប្រឈមខ្លាំងគឺជំងឺទឹកនោមផ្អែម។ ដោយសារអ្នកមួយចំនួនចូលចិត្តហូបអាហារផ្អែមៗ ភេសជ្ជៈក៏ផ្អែម ហើយក៏ជាដើមហេតុលើសគីឡួដែរ។ ទម្លាប់ល្អនាំឱ្យសុខភាពអ្នកចៀសវាងពីជំងឺទឹកនោមផ្អែមបានយ៉ាងល្អ។ បើអ្នកចង់រស់នៅគ្មានជំងឺទឹកនោមផ្អែម អ្នកត្រូវមានទម្លាប់សាមញ្ញៗ នេះ៖
ទម្លាប់ទី១. ការហូបអាហារកែច្នៃ ឬអាហារមានរសជាតិផ្អែម ចូរអ្នកកាត់បន្ថយ ដើម្បីកាត់ជំងឺទឹកនោមផ្អែមចេញពីជីវិតរបស់អ្នក។ ការហូបអាហារមានប្រូតេអ៊ីនមានកម្រិតជាតិស្ករទាប ពិតជាជួយកាត់បន្ថយអត្រាកើតជំងឺទឹកនោមផ្អែម ឬការពារលើសជាតិស្ករក្នុងឈាមដោយសង្កត់ធ្ងន់ទៅលើអាហារមានជាតិខ្លាញ់ទាប ប្រូតេអ៊ីនរុក្ខជាតិដូចជាត្រី សាច់មាន់ តៅហ៊ូ និងសាច់គោជាដើម។ ហើយអ្នកអាចបន្ថែមអាហារបែបនេះ ដូចជាបន្លែ គ្រាប់ធញ្ញជាតិ គ្រាប់ផ្លែឈើ និងទឹកដោះគោមានជាតិខ្លាញ់ទាបជាប្រចាំថ្ងៃផងដែរ។
ទម្លាប់ទី២. សម្រាប់ទម្លាប់ទី២ នេះ អ្នកមិនអាចខ្វះបានទេ គឺការធ្វើលំហាត់ប្រាណ។ តាមគេហទំព័រ betterhealth បានចុះផ្សាយថា ការធ្វើលំហាត់ប្រាណសាមញ្ញៗ ដូចជារត់ ដើរ ហែលទឹក និងលើកទម្ងន់ ត្រឹមតែ ១០ទៅ២០នាទី នេះជាលំហាត់ប្រាណជួយកាត់បន្ថយជាតិស្ករ ជួយគ្រប់គ្រងការឡើងគីឡូ គ្រប់គ្រងសម្ពាធឈាម និងកូឡេស្តេរ៉ុលយ៉ាងល្អផងដែរ”។
ទម្លាប់ទី៣. កាត់ស្រ្តេស កាត់ជាតិស្ករ។ ពេលអ្នកស្រ្តេសខ្លាំងធ្វើឱ្យអ្នកអស់កម្លាំង ដើម្បីបញ្ចូលកម្លាំងឡើងវិញ អ្នកត្រូវការអាហារមានរសជាតិផ្អែមៗ ដើម្បីកើនថាមពល។ ព្រោះតែស្រ្តេសនាំឱ្យប៉ះពាល់ដល់កម្រិតអ័រម៉ូន ហើយធ្វើឲ្យរាងកាយផលិតអ័រម៉ូនកូទីសុលកើនជាតិស្ករជាងធម្មតា។ វិធីកាត់ស្រ្តេស អ្នកអាចហាត់ប្រាណ គេង ដើរលំហែរកាយ និងនិយាយគ្នាលេង ក៏វាជួយបន្ធូរអារម្មណ៍ស្រ្តេសដែរ។ ពេលអ្នកធ្វើសកម្មបែបនេះ ស្រ្តេសលែងរស់នៅក្នុងខួរក្បាលរបស់អ្នកហើយ។
ទម្លាប់៤. អ្នកត្រូវជៀសវាងថ្នាំជក់៖ យោងតាមមជ្ឈមណ្ឌលគ្រប់គ្រង និងបង្ការជំងឺ (CDC) ការជក់បារីបង្កើនហានិភ័យនៃការវិវត្តទៅជាជំងឺទឹកនោមផ្អែមពី៣០ទៅ៤០%។ សម្រាប់អ្នកដែលមានជំងឺទឹកនោមផ្អែមរួចហើយ ហានិភ័យខ្លាំងណាស់ សម្រាប់អ្នកជក់បារី។ ដូចនេះ អ្នកគួរជៀសវាង ឬបញ្ឃប់ការជក់បារីនេះទៅ អាណិតសុខភាពផង៕ អត្ថបទដោយ៖ ទ្រ សុភាព