អាហារជាវត្ថុចាំបាច់បំផុតដែលរាងកាយមិនអាចខ្វះបាន។ ចំណីអាហារមានគុណប្រយោជន៍ជួយដល់រាងកាយ ហើយវាក៏អាចបំផ្លាញរាងកាយនិងសុខភាពរបស់អ្នកបានដូចគ្នា នៅពេលដែលអ្នកជ្រើសរើសអាហារមិនបានត្រឹមត្រូវ។ បញ្ហាដែលមនុស្សជាច្រើនជួបប្រទះនាពេលបច្ចុប្បន្ន សម្ពាធពីមជ្ឈដ្ឋានខាងក្រៅផង ទទួលទានអាហារមិនល្អច្រើនផង បានធ្វើឱ្យសុខភាពផ្លូវចិត្តកាន់តែខ្សោយចុះ បង្កើតជាភាពតានតឹង ថប់អារម្មណ៍ អ្នកខ្លះទៀតឈានដល់ដំណាក់កាលបាក់ទឹកចិត្ត រួមទាំងសមត្ថភាពខួរក្បាលធ្លាក់ចុះផងដែរ។

បើអ្នកចង់ឱ្យផ្លូវចិត្ត និងខួរក្បាលរបស់អ្នកប្រសើរឡើងវិញបាន រឿងដែលអ្នកត្រូវធ្វើជាចាំបាច់គឺរើសរបបអាហារដែលផ្ដល់ប្រយោជន៍ដល់សុខភាព។ ខាងក្រោមនេះជាអាហារមួយចំនួន ដែលអាចប៉ូវទាំងផ្លូវចិត្តនិងខួរក្បាលរបស់អ្នកឱ្យប្រសើរឡើងមកវិញបាន ដែលដកស្រង់ចេញពីការចែករំលែករបស់គេហទំព័រ Healthshots។

១ ផ្លែប័រ៖ ជាផ្លែឈើមួយប្រភេទដែលមានអត្ថប្រយោជន៍មហាសាលសម្រាប់សុខភាព។ ក្នុងផ្លែប័រ មានអាស៊ីតខ្លាញ់ monounsaturated ដែលអាចបន្ថយសម្ពាធឈាមឡើងខ្ពស់ និងកាត់បន្ថយហានិភ័យនៃការថយចុះការចងចាំផងដែរ។ ផ្លែប័រសម្បូរទៅដោយវីតាមីនដូចជា វីតាមីន K និង folate ដែលជួយបង្កើនការចងចាំ ធ្វើឱ្យមុខងារខួរក្បាលប្រសើរឡើង ហើយសំខាន់បំផុតគឺកាត់បន្ថយហានិភ័យនៃជំងឺដាច់សរសៃឈាមខួរក្បាលបាន។

២ យ៉ាអ៊ួរ៖ ក្នុងយ៉ាអ៊ួរ មានផ្ទុកដោយប្រូបាយអូទិចជាប្រភេទបាក់តេរីល្អ ដែលមាននាទីជួយសម្រួលដល់ពោះវៀន ការរំលាយអាហារ និងល្អសម្រាប់ខួរក្បាលផងដែរ។ ដោយសារវាមានផ្ទុកម៉ាញ៉េស្យូម និងប៉ូតាស្យូម អាចជួយបង្កើនអុកស៊ីហ្សែនក្នុងខួរក្បាលផងដែរ។ មិនតែប៉ុណ្ណោះ វាក៏អាចជួយបង្កើនអ័រម៉ូនរីករាយ ដែលជាហេតុជួយកាត់បន្ថយភាពតានតឹង ជួយបន្ធូរអារម្មណ៍បានទៀតផង។

៣ សូកូឡាខ្មៅ៖ កាកាវដែលគេយកមកធ្វើជាសូកូឡាខ្មៅ មានសមត្ថភាពជួយសម្រួលដល់ផ្លូវចិត្តបានយ៉ាងល្អ។ ក្រៅពីនេះ សូកូឡាខ្មៅសម្បូរទៅដោយសារធាតុប្រឆាំងអុកស៊ីតកម្មដូចជា flavonoids ដែលជួយបង្កើនការចងចាំ។ វាមានផ្ទុកសារធាតុ N-acylethanolamines ដែលជម្រុញ serotonin និងជួយឱ្យមានអារម្មណ៍ល្អបាន។

៤ បន្លែស្លឹកបៃតង៖ បន្លែបៃតងស្ទើរគ្រប់ប្រភេទ មានវីតាមីនសំខាន់ដែលល្អបំផុតដែលជួយឱ្យខួរក្បាលមានសុខភាពល្អ។ ហេតុនេះ អ្នកមិនគួររំលងក្នុងការបន្ថែមបន្លៃតៃបងក្នុងរបបអាហារប្រចាំថ្ងៃរបស់អ្នកនោះទេ៕

អត្ថបទដោយ៖ Senghong