១. ផ្លែប៊ឺរ៖ ផ្លែបឺរត្រូវបានទទួលស្គាល់ថាជាផ្លែឈើដែលមានគុណភាពខ្ពស់ក្នុងការជួយសម្រកគីឡូ ប៉ុន្តែបើអ្នកញ៉ាំវាច្រើនពេកអាចធ្វើឱ្យចំនួនកាឡូរីលើស។ នៅក្នុងផ្លែប៊ឺ 100 ក្រាមមាន 160 កាឡូរី ស្មើនឹងកាឡូរីនៅក្នុងសាច់ ហើយខ្លាញ់អាចឡើងដល់ 15% ។ ដូច្នេះហើយអ្នកដែលចង់សម្រកទម្ងន់មិនគួរញ៉ាំផ្លែបឺរច្រើនពេកទេ។ ដើម្បីញុំាផ្លែប៊ឺរ ឱ្យទទួលបានប្រសិទ្ធភាភល្អ គួរញ៉ាំផ្លែបឺរមួយទៅពីរផ្លែក្នុងមួយសប្តាហ៍។ ដោយកាត់វាស្តើងៗ ហើយផ្សំវាជាមួយបន្លែដែលមានកាឡូរីទាប និងអាហារសម្បូរប្រូតេអ៊ីន ដូចជាសាឡាត់ និងត្រសក់ ។

២. ផ្លែឈើនិងបន្លែស្ងួត៖ ទោះបីវាមានរសជាតិឆ្ងាញ់ ក្រអូប និងងាយញ៉ាំ តែពេលស្ងួតវាបាត់បង់ជាតិសរសៃ និងជាតិទឹក ប៉ុន្តែកាឡូរីវិញកើនឡើងខ្លាំង។ មួយដុំតូចៗក៏មានកាឡូរីច្រើនជាងផ្លែស្រស់មួយចំណែកធំ។ អ្នកមួយចំនួនចូលចិត្តញ៉ាំ ដោយសារវាឆ្ងាញ់ និងងាយស្រួលញ៉ាំ ប៉ុន្តែត្រូវដឹងថាវាមានកាឡូរីច្រើន ហើយរារាំងដល់ការសម្រកទម្ងន់របស់អ្នក។ 

៣. សាឡាត់៖ សាឡាត់ ត្រូវបានគេជឿថាជាអាហារល្អបំផុតសម្រាអ្នកចង់សម្រកទម្ងន់ ហើយវាបែបនេះពិតមែន ប៉ុន្តែបញ្ហានៅត្រង់ថាគ្រឿងដែលអ្នកលាយជាមួយសាឡាត់មុននឹងញ៉ាំដូចជា ទឹកម៉ាយ៉ូណេស ប្រសិនបើដាក់ច្រើនពេក សាឡាត់ 100 ក្រាមអាចឡើងដល់ 400–500 កាឡូរី។ នេះធ្វើឱ្យមនុស្សជាច្រើនស្មានថាខ្លួនកំពុង “ញ៉ាំអាហារសុខភាព” ប៉ុន្តែអ្នកកំពុងញ៉ាំអាហារដែលមានកាឡូរីខ្ពស់អាចធ្វើឱ្យឡើងគីឡូខ្លាំង។ 

៤. ញ៉ាំនំបុ័ងស្រូវសាលីទាំងមូល៖ ទោះបីស្រូវសាលីពិតជាល្អ សម្បូរជាតិសរសៃ និងជួយឱ្យឆាប់ឆ្អែត តែផលិតផលជាច្រើននៅលើទីផ្សារ គ្រាន់តែបន្ថែមម្សៅស្រូវសាលីតិចៗ ហើយបន្ថែមម្សៅស ស្ករ ប្រេង និងសារធាតុបន្ថែមផ្សេងៗ ដើម្បីឱ្យមានរសជាតិឆ្ងាញ់ប៉ុណ្ណោះ។ នំបុ័ងបែបនេះមានផ្ទុកកាឡូរីប្រហែល 250–300 ក្នុង 100 ក្រាម ហើយមានសន្ទស្សន៍ glycemic ខ្ពស់ ដែលធ្វើឱ្យជាតិស្ករកើនឡើងលឿន និងធ្លាក់ចុះលឿន បណ្តាលឱ្យឃ្លានរហ័ស និងញ៉ាំច្រើនជាងមុន។

អាហារដែលមើលទៅដូចជាអាហារសុខភាព មិនមានន័យថាល្អសម្រាប់ការសម្រកទម្ងន់គ្រប់ពេលទេ។ សំខាន់គឺត្រូវយល់ពីរបៀបប្រើប្រាស់ បរិមាណ និងគ្រឿងផ្សំដែលបន្ថែមចូលទៅក្នុងអាហារនោះ។ ប្រសិនបើអ្នកចង់សម្រេចគោលដៅក្នុងការសម្រកទម្ងន់ អ្នកគួរតែយកចិត្តទុកដាក់លើចំណុចគ្រប់យ៉ាង ពិនិត្យមើលស្ថិតិកាឡូរី និងជ្រើសរើសរបបអាហារដែលមានតុល្យភាពសម្រាប់រាងកាយ៕

អត្ថបទដោយ៖ សារួ