បើអ្នកខូចតម្រងនោមនោះ វាសនាជីវិតរស់នៅរបស់អ្នកច្បាស់ជារស់នៅដោយការលាងឈាមជាមិនខានឡើយ។ ហើយវាធ្វើឱ្យរាងកាយរបស់អ្នកកើនជាតិពុលទ្វេដងផងដែរ។ មានសំណួរមួយថា តើអ្នកពិសារទឹកនៅពេលណាល្អសម្រាប់តម្រងនោមកុំឱ្យខូចទៅថ្ងៃអនាគត? យោងតាមវេជ្ជបណ្ឌិត Tra Anh Duy ជាអ្នកជំនាញសុខភាពតម្រងនោមបានលើកឡើងថា ការទទួលទានទឹកគ្រប់គ្រាន់ជួយឱ្យតម្រងនោមមានដំណើរការយ៉ាងល្អដើម្បីការពារជំងឺដូចជាគ្រួសក្នុងតម្រងនោម រលាកផ្លូវបង្ហូរទឹកនោម និងខ្សោយតម្រងនោមជាដើម។
ហើយគាត់បានបន្តថា ពេលវេលាដ៏ល្អបំផុតដើម្បីពិសារទឹកសម្រាប់ថែសុខភាពតម្រងនោមកុំឱ្យខូចទាំងវ័យក្មេងគឺនៅពេលព្រឹកជាពេលអ្នកភ្ញាក់ពីគេងនេះឯង។ ព្រោះថាការពិសារទឹកមួយកែវធំបន្ទាប់ពីភ្ញាក់ពីគេងជួយជម្រុញដល់តម្រងនោមបញ្ចេញទឹកនោមចោល និងជួយដល់ដំណើរការកម្ចាត់ជាតិពុលផងដែរ។ ព្រឹកពិសារទឹកមួយកែវធំនោះ វាសនាតម្រងរបស់អ្នកគ្មានថ្ងៃខូចនោះទេព្រោះទឹកជួយលាងជាតិពុល។
នៅទាន់អស់នោះទេ! ការពិសារទឹកមុនពេលញ៉ាំអាហារក៏ជួយឱ្យប្រព័ន្ធរំលាយអាហារដំណើរការល្អ និងកាត់បន្ថយសម្ពាធលើតម្រងនោមយ៉ាងល្អ។ នៅដំណាក់កាលមួយទៀតគឺពិសារទឹកបន្តិចបន្តួចមុនពេលចូលគេងអាចជួយឱ្យតម្រងនោមរបស់អ្នកបន្តច្រោះកាកសំណល់នៅពេលអ្នកគេង ប៉ុន្តែអ្នកមិនគួរពិសារទឹកច្រើនពេកនោះទេ កុំឱ្យសម្ពាធលើតម្រងនោមហើយងើបនោមនៅពេលយប់ថែមទៀត។
សម្រាប់តម្រូវការតម្រងនោមក្នុងមួយថ្ងៃចន្លោះពី៣ទៅ៥លីត្រតាមរាងកាយ និងគីឡូផងដែរ។ ចំពោះមនុស្សស្រីត្រូវការជាតិទឹកជិត ៣លីត្រ និងមនុស្សប្រុសគឺជិត ៤លីត្រ រួមទាំងទឹកពីអាហារ និងភេសជ្ជៈផងដែរ។ ការសិក្សាមួយឆ្នាំ២០១២ នៅក្នុង American Journal of Nephrology បានបង្ហាញថា ទឹកនោមពណ៌លឿងស្រាលជាសញ្ញាបញ្ជាក់ពីរាងកាយរបស់អ្នកមានជាតិទឹកគ្រប់គ្រាន់ហើយ នៅក្នុងខណៈដែលទឹកនោមរបស់អ្នកឡើងលឿងខ្លាំងអាចជាសញ្ញាបញ្ជាក់ថារាងកាយរបស់អ្នកកំពុងខ្បះជាតិទឹកហើយ៕ អត្ថបទដោយ៖ ទ្រ សុភាព