ការផ្លាស់ប្តូរការរស់នៅក្នុងរដូវរងា ដូចជា ការធ្វើចលនាតិច ការទទួលទានម្ហូបក្តៅមានជាតិខ្លាញ់ខ្ពស់ និងការរស់នៅក្នុងបរិយាកាសត្រជាក់ អាចធ្វើឱ្យជាតិស្ករឡើងចុះមិនទៀងទាត់។ ដូច្នេះ អ្នកជំនាញបានណែនាំឱ្យអ្នកជំងឺទឹកនោមផ្អែមអនុវត្តទម្លាប់ប្រចាំថ្ងៃទាំង ៥ នេះដើម្បីទប់ស្កាត់ហានិភ័យដែលកើតឡើង៖ 

១. រៀបចំរបបអាហារឱ្យល្អ៖ គួរជៀសវាងភេសជ្ជៈផ្អែម អាហារកែច្នៃ និងម្ហូបមានជាតិខ្លាញ់ខ្លាំង ព្រោះវាអាចធ្វើឱ្យជាតិស្ករឡើងខ្ពស់ក្នុងរយៈពេលខ្លី។ ជំនួសវិញគួរញុំាអាហារដែលសម្បូរជីវជាតិដូចជា បន្លែ ផ្លែឈើ គ្រាប់ធញ្ញជាតិ ត្រី និងខ្លាញ់ល្អៗដូចជា ប្រេងអូលីវ និងអាវ៉ាកាដូ។ អាហារទាំងនេះមានសារធាតុចិញ្ចឹមជួយឱ្យជាតិស្ករក្នុងឈាមថេរ និងជួយឱ្យរាងកាយឆ្លើយតបនឹងអាំងស៊ុយលីនបានល្អ។

២. ធ្វើលំហាត់ប្រាណឱ្យទៀងទាត់៖ ការធ្វើចលនាប្រចាំថ្ងៃដូចជា លំហាត់ស្រាលៗអាចជួយឱ្យឈាមរត់បានល្អ និងកាត់បន្ថយជាតិស្ករក្នុងឈាម។ អ្នកទាំងអស់គ្នាមិនចាំបាច់ហាត់ខ្លាំងពេកទេ ជាពិសេសក្នុងរដូវត្រជាក់ តែត្រូវធ្វើវាឱ្យទៀងទាត់ ព្រមទាំងសម្រាកឱ្យបានគ្រប់គ្រាន់នៅចន្លោះវគ្គនីមួយៗ ដើម្បីចៀសវាងអស់កម្លាំង ឬការបញ្ចេញជាតិស្ករច្រើនពេកដោយសារស្ត្រេសរាងកាយ។

៣. តាមដានកម្រិតជាតិស្ករជាប្រចាំ៖ គឺជាចំណុចដែលមិនអាចមើលរំលងបាន។ សមាគមជំងឺទឹកនោមផ្អែមអាមេរិកបានផ្តល់អនុសាសន៍ឱ្យពិនិត្យជាតិស្ការយ៉ាងហោចណាស់ ៤ ដងក្នុងមួយថ្ងៃ សម្រាប់អ្នកដែលស្ថិតក្នុងការគ្រប់គ្រងជំងឺបែបធ្ងន់ធ្ងរ ឬកំពុងប្តូររបបអាហារ។ 

៤. ការប្រើថ្នាំឱ្យបានត្រឹមត្រូវ៖ មនុស្សជាច្រើនចូលចិត្តកាត់បន្ថយដូសថ្នាំ ឬឈប់ប្រើដោយខ្លួនឯង ពិសេសនៅរដូវត្រជាក់ដែលគិតថារូបកាយប្រើស្ករច្រើនជាងមុន ហើយគិតថាគ្មានបញ្ហា។ តែមុនពេលធ្វើអ្វីទាំងអស់នេះ គួរតែពិគ្រោះជាមួយវេជ្ជបណ្ឌិតជាមុន។ ការបន្តប្រើថ្នាំទៀងទាត់ គឺជាគន្លឹះសំខាន់ក្នុងការទប់កម្រិតជាតិស្ករឱ្យមានស្ថេរភាព។

៥. គ្រប់គ្រងភាពតានតឹង៖ នៅពេលស្ត្រេស រាងកាយនឹងបង្ហូរអរម៉ូនដែលធ្វើឱ្យជាតិស្ករឡើងខ្ពស់។ ពេលខ្លះ ការគេងមិនគ្រប់គ្រាន់ក៏អាចធ្វើឱ្យរាងកាយមានភាពធន់នឹងអាំងស៊ុយលីន និងបង្កឱ្យជាតិស្ករឡើងខ្ពស់។ បន្ថែមពីនេះអ្នកគួរតែទៅពិនិត្យសុខភាពជាមួយគ្រូពេទ្យឱ្យបានជាប្រចាំដែរ៕ 

អត្ថបទដោយ៖ សារួ ​