រដូវត្រជាក់ចូលមកដល់ រាងកាយយើងអាចនឹងជួបបញ្ហាច្រើនដូចជា ផ្ដាសាយ ឈឺបំពង់ក ឬអស់កម្លាំង ដោយសារតែសីតុណ្ហភាពធ្លាក់ចុះ ប្រព័ន្ធភាពសុំាក៏ងាយនឹងចុះខ្សោយដែរ។ តាមរយៈការទទួលទានបន្លែសម្បូរវីតាមីន និងសារធាតុប្រឆាំងអុកស៊ីតកម្ម អាចជួយពង្រឹងរបាំងការពាររាងកាយ ធ្វើឱ្យយើងប្រឆាំងនឹងមេរោគ និងសារធាតុបង្ករលាកបានល្អជាងមុន។ ក្នុងចំណោមបន្លែជាច្រើន បន្លែ ៤ មុខនេះល្អបំផុតសម្រាប់ការថែរក្សាសុខភាពនៅរដូវត្រជាក់៖
១. ផ្កាខាត់ណាខៀវ ឬ ប្រូខូលី៖ បន្លែមួយមុខនេះសម្បូរវីតាមីន C ដែលជួយកសាងកម្លាំងប្រព័ន្ធភាពស៊ាំ។ វីតាមីន C ជួយឱ្យកោសិកាព្យាបាលខ្លួន និងធ្វើការប្រឆាំងនឹងមេរោគបានយ៉ាងសកម្ម។ លើសពីនេះ ប្រូខូលី ក៏មានសារធាតុ sulforaphane ដែលត្រូវបានស្រាវជ្រាវរួចហើយថាមានលក្ខណៈប្រឆាំងអុកស៊ីតកម្មខ្លាំង អាចជួយកាត់បន្ថយការរលាកក្នុងរាងកាយ និងធ្វើឱ្យប្រព័ន្ធភាពស៊ាំសកម្មជាងមុន។
២. ស្ពៃខ្មៅ៖ ស្ពៃខ្មៅ គឺជាបន្លែដែលសម្បូរទៅដោយសារធាតុចិញ្ចឹមជាច្រើនប្រភេទ ដូចជា beta carotene វីតាមីន K ជាតិដែក និង folate។ សារធាតុទាំងនេះជួយរាងកាយរក្សាសុខភាពឈាម បង្កើនកម្លាំងកោសិកា និងជួយដល់ប្រព័ន្ធភាពស៊ាំ។ ក្នុងរដូវត្រជាក់ រាងកាយយើងតែងតែជួបនឹងភាពតានតឹងអុកស៊ីតកម្មកើនឡើង ហើយ lutein និង zeaxanthin ដែលមានក្នុង ស្ពៃខ្មៅ អាចជួយការពារកោសិកាពីការខូចខាតនេះ។ ការទទួលទាន ស្ពៃខ្មៅ ជាទៀងទាត់ជួយបន្ថែមកម្លាំង បន្ថយភាពអស់កម្លាំង និងជួយការពារការរលាកកម្រិតស្រាលយ៉ាងមានប្រសិទ្ធភាព។
៣. ខាត់ណា៖ ត្រូវបានគេចាត់ទុកថាជា “បន្លែអស្ចារ្យ” ដោយសារមាន polyphenol ច្រើនជាពិសេស quercetin និង kaempferol។ សារធាតុទាំងនេះត្រូវបានគេស្គាល់ថាជួយបង្កើនប្រព័ន្ធភាពស៊ាំ កាត់បន្ថយការរលាក និងជួយឱ្យរាងកាយប្រឆាំងនឹងជំងឺបានល្អ។ ក្នុងអាកាសធាតុត្រជាក់ដែលធ្វើឱ្យមនុស្សងាយផ្តាសាយ ញ៉ាំខាត់ណាជាទៀងទាត់អាចជួយកាត់បន្ថយហានិភ័យនៃជំងឺផ្តាសាយ និងជំងឺផ្លូវដង្ហើមបាន។
៤. ស្ពៃក្តោប៖ គឺជាបន្លែប្រពៃណីដែលមានទំនាក់ទំនងយ៉ាងជិតស្និទ្ធនឹងរដូវត្រជាក់ ព្រោះវាអាចលូតលាស់បានល្អនៅក្នុងអាកាសធាតុត្រជាក់។ ស្ពៃក្តោបមានវីតាមីន C វីតាមីន K និងជាតិសរសៃច្រើន ដែលជួយឱ្យប្រព័ន្ធរំលាយអាហារធ្វើការបានល្អ និងជួយបង្កើនចំណុចសមតុល្យក្នុងពោះវៀន។ ជាពិសេស glucosinolate ដែលមានក្នុងស្ពៃក្តោបជួយរាងកាយប្រឆាំងមេរោគ និងការរលាកដែលកើតឡើងជាញឹកញាប់ក្នុងរដូវត្រជាក់៕
អត្ថបទដោយ៖ សារួ