មនុស្សដែលមានភាពតានតឹង និងសម្ពាធខ្លាំងពេកអាចបណ្តាលឱ្យគេគេងមិនលក់។ សញ្ញាទូទៅដែលមានភាពតានតឹងរួមមានការធ្លាក់ទឹកចិត្ត ឆាប់ខឹង និងគិតច្រើន បញ្ហាទាំងនេះញឹកញាប់មកពីកន្លែងធ្វើការនិងគ្រួសារ។ បញ្ហាទាំងនេះនាំឱ្យអ្នកជួបប្រទះការឈឺក្បាល ឈឺក្រពះ អស់កម្លាំង និងបាត់បង់ចំណង់អាហារ។ ការគ្រប់គ្រងភាពតានតឹងជួយឱ្យកែលម្អគុណភាពក្នុងការគេង អ្នកគួរធ្វើរឿងទាំង ៣នេះ៖
១. អ្នកធ្វើសមាធិមុនចូលគេង ធ្វើឱ្យចិត្តស្ងប់ និងគេងលក់ស្រួល។ បញ្ហាការគេងរបស់មនុស្ស គឺមកពីចិត្ត និងអារម្មណ៍របស់ពួកគេមានការគិតលើរឿងច្រើនពេក វាធ្វើមានបញ្ហាប៉ះពាល់ដល់ដំណេក។ ហើយក៏មានតាមអ្នកស្រាវជ្រាវជនជាតិអាមេរិកម្នាក់បាននិយាយថា បើមនុស្សគិតរឿងតែមួយ ក្នុងពេលចូលដំណេក ក៏អាចឱ្យគេគេងលក់បានដែរ តែបញ្ហាមកពីគេមានសម្ពាធផ្លូវអារម្មណ៍គិតច្រើន ការធ្វើសមាធិជាវិធីល្អបំផុត។
២. នៅក្នុងរយៈពេលមួយម៉ោងនេះ អ្នកគួរយកពេលហ្នឹងមកអានសៀវភៅ និងស្ដាប់វីដេអូចំណេះដឹងដើម្បីសម្រួលខួរក្បាលរបស់អ្នកស្ងប់មុនចូលគេងហើយមានអារម្មណ៍រីករាយ។ ជាពិសេសគ្រាន់តែអានបានតែ៣នាទីក៏ដេកលក់បាត់ក៏មានដែរ។ សម្រាប់ទម្លាប់អានសៀវភៅជាពេលវេលាដែលអាចធ្វើឱ្យយើងនៅជាមួយខ្លួនឯងដោយគ្មានការរំខាន ព្រមទាំងស្ងប់អារម្មណ៍ឱ្យអ្នកឆាប់គេងលឿន។ ការស្តាប់វីដេអូចំណេះដឹង មើលកម្មវិធីអប់រំ និងស្តាប់ Podcast នាំឱ្យយើងមានគំនិតច្រើន មានការសម្រេចចិត្តបានល្អ។ អ្នកមានចំណេះដឹងនាំឱ្យគេអាចបញ្ជាលើគំនិតឱ្យខួរក្បាលស្ងប់ ដើម្បីគេងលក់លឿន។ នេះជាអត្ថប្រយោជន៍ការអានសៀវភៅ។
៣. បិទឧបករណ៍អេឡិចត្រូនិក៖ ពន្លឺពណ៌ខៀវចេញពីទូរស័ព្ទ និងថេប្លេតរបស់អ្នកជាកត្តារំខានដល់ការផលិតអ័រម៉ូន Melatonin ដែលគ្រប់គ្រងនាឡិកាលើជីវសាស្រ្តក្នុងការគេងរបស់អ្នក។ ទម្លាប់ប្រើប្រាស់ទូរស័ព្ទមុនពេលចូលគេងបង្កើនអារម្មណ៍សម្រាកមិនល្អប៉ុន្មានទេ ព្រោះវាអាចមានព័ត៌មានអវិជ្ជមាន។ អ្នកគួរតែបិទឧបករណ៍អេឡិចត្រូនិកយ៉ាងហោចណាស់មួយម៉ោងមុនពេលចូលគេង ដើម្បីឱ្យអារម្មណ៍ស្ងប់៕ អត្ថបទដោយ៖ ទ្រ សុភាព