ភ្នំពេញ៖ មូលនិធិចែករំលែកសង្គ្រោះជីវិតសកលនៃសាធារណៈរដ្ឋកូរ៉េ (Global Life Sharing Korea – GLSK) ចាប់តាំងពីឆ្នាំ ២០២២ មកដល់បច្ចុប្បន្ន មូលនិធិបានផ្តល់ជំនួយសប្បុរសធម៌ចំនួន ១២ លើក មានតម្លៃសរុប ១៦,៥០០,១៣៦.៩៣ ដុល្លារអាមេរិក ដើម្បីជួយឧត្ថម្ភដល់ប្រជាពលរដ្ឋក្រីក្រមានជីវភាពខ្វះខាត និង ជនភៀសសឹកពីការឈ្លានពានពីសំណាក់កងទ័ពថៃ និងកងទ័ពជួរមុខខ្មែរយើងផងដែរ ។
ជំនួយនេះរួមមានថ្នាំពេទ្យ ស្បៀងអាហារ និងសម្ភារៈប្រើប្រាស់ប្រចាំថ្ងៃ ដែលត្រូវបានចែកចាយទៅតាមរាជធានីភ្នំពេញ និងខេត្តសំខាន់ៗចំនួន ១៣ រួមមាន៖ កណ្តាល កំពង់ស្ពឺ ឧត្តរមានជ័យ បន្ទាយមានជ័យ កំពង់ចាម ត្បូងឃ្មុំ បាត់ដំបង ពោធិ៍សាត់ ព្រៃវែង ស្វាយរៀង ព្រះវិហារ សៀមរាប និងស្ទឹងត្រែង។
ឯកឧត្តម សុខ សំណាង ជាជំនួយការសម្តេចប្រធានព្រឹទ្ធសភា ក្នុងនាមតំណាងអោយ មូលនិធិ GLSK និងជាប្រធានកិត្តិយសនៃ សមាគមគ្រូពេទ្យព្យាបាលដោយចលនាកម្ពុជា
ជាតំណាងភាគីកម្ពុជាដែលទទួលអំណោយ បានថ្លែងអំណរគុណថា៖ “ក្នុងនាមជាតំណាងប្រជាពលរដ្ឋកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅចំពោះមូលនិធិ GLSK នៃសាធារណៈរដ្ឋកូរ៉េ ដែលបានយកចិត្តទុកដាក់ និងជួយសង្គ្រោះប្រជាពលរដ្ឋកម្ពុជាដែលកំពុងប្រឈមនឹងបញ្ហាជីវភាព។ ជំនួយនេះជាការគាំទ្រដ៏សំខាន់ ដែលអាចបង្កើនទឹកចិត្តដល់ប្រជាពលរដ្ឋ និងកងទ័ពជួរមុខក្នុងការពារមាតុភូមិ។”
បន្ថែមពីលើនេះ ឯកឧត្តម ក៏សូមថ្លែងអំណរគុណដល់លោក MIN BYONG JANG នាយកគ្រប់គ្រងអគារ PGCT ដែលតែងតែជួយសម្របសម្រួលការងារមូនិធិកូរ៉េ ក៏ដូចជាផ្តល់ទីតាំងសម្រាប់ទំនាក់ទំនង ប្រជុំកិច្ចការសប្បុរសធម៌នេះ ដែលផ្តល់ភាពងាយស្រួលរវាងភាគីកម្ពុជា និងកូរ៉េដើម្បីសហប្រត្តិបត្តិការការងារ ផ្តល់នូវផលប្រយោជន៍ជាច្រើនដល់ប្រជាជនខ្មែរយើង។
តាមការចុះពិនិត្យ និងការវាយតម្លៃរបស់អាជ្ញាធរមូលដ្ឋាន ជំនួយរបស់ GLSK បានមានអត្ថប្រយោជន៍ចំពោះប្រជាពលរដ្ឋជាក់ស្តែង ជាពិសេសគ្រួសារក្រីក្រ និងជនរងគ្រោះតាមតំបន់ជនបទ។
មូលនិធិ GLSK បានបញ្ជាក់ថា នឹងបន្តកិច្ចសហការជាមួយភាគីពាក់ព័ន្ធនៅកម្ពុជា ដើម្បីពង្រឹងកម្មវិធីជំនួយមនុស្សធម៌ និងគាំទ្រការអភិវឌ្ឍសង្គមជាតិ។
