ជំងឺខ្សោយតម្រងនោម(ក្រលៀន) គឺមានរោគសញ្ញាធ្វើឱ្យអ្នកជំងឺមានអាការដូចជា អស់កម្លាំង នោមញឹកញាប់ ឈឺពោះឬក្អួត អារម្មណ៍ច្របូលច្របល់ ឧស្សាហ៍ហើមដៃឬជើង រមួលសាច់ដុំ រមាស់ស្បែក និងមិនឃ្លានអាហារជាដើម។
បើតាមការបញ្ជាក់ពីកេហទំព័រ healthline បានឱ្យដឹងថា សម្រាប់អ្នកជំងឺខ្សោយតម្រងនោមរ៉ាំរ៉ៃ គឺតម្រូវឲ្យព្យាបាលតាមរយៈការលាងឈាម យ៉ាងហោចណាស់មួយសប្ដាហ៍ចំនួនពីរដង(Hemodialysis) ឬក៏អាចមានជម្រើសមួយផ្សេងទៀត គឺការផ្លាស់ប្ដូរតម្រងនោម ( Kidney Transplant ) ។ ស្របពេលជាមួយគ្នានេះ សម្រាប់អ្នកជំងឺខ្សោយតម្រងនោមរ៉ាំរ៉ៃមានការប្រតិកម្មជាមួយអាហារដែលផ្ទុកជាមួយជាតិប៉ូតាស្យូម និងជាតិរ៉ែខ្ពស់ ពីព្រោះកាលណាតម្រងនោមខ្សោយគឺវាមិនមានសត្ថភាពក្នុងការច្រោះជាតិព៉ូតាស្យូម និងជាតិរ៉ៃដែលលើសចេញពីរាងកាយបានទេ ដូច្នេះក្នុងរាងកាយរបស់មនុស្សម្នាក់កាលណាលើសជាតិមួយកម្រិតជាតិប៉ូតាស្យូម និងជាតិរ៉ៃខ្លាំងគឺធ្វើឱ្យមានអាការដូចជា ខ្សោយសាច់ដុំ អស់កម្លាំង និងមានបញ្ហាបេះដូងផងដែរ។ យ៉ាងណាមិញ អ្នកខ្សោយតម្រងនោមគួរជៀសវាងអាហារទាំង៦ប្រភេទដូចខាងក្រោម ៖
១. ផ្លែប័រ៖ ជាធម្មតាវាមានផ្ទុក ខ្លាញ់ល្អចំពោះសុខភាព មានជាតិសរសៃ និងសារធាតុប្រឆាំងអ៊ុកស៊ីតកម្ម ប៉ុន្តែវាក៏មានផ្ទុកប៉ូតាស្យូមខ្ពស់ ដោយផ្លែប៊រមួយមានផ្ទុកប៉ូតាស្យូម រហូតដល់ ៦៩០មីលីក្រាម ។
២. អាហារកំប៉ុង៖ ភាគច្រើនមានជាតិអំបិលខ្ពស់ និងមានបន្ថែមសារធាតុរក្សាទុកឲ្យបានយូរ ដែលធ្វើឲ្យសម្ពាធឈាមឡើងខ្ពស់ ពិបាកគ្រប់គ្រង ។
៣. ផ្លែចេក៖ ផ្លែចេកជាប្រភេទអាហារសរសៃដ៏ល្អចំពោះសុខភាព មានសារធាតុរ៉ែ វីតាមីន ប៉ុន្តែវាមានផ្ទុកប៉ូតាស្យូមខ្ពស់ ដែលអ្នកជំងឺខ្សោយតម្រងនោមរ៉ាំរ៉ៃគួរជៀសវាង ។
៤. ផ្លែក្រូច៖ ក្រៅពីមានផ្ទុកវីតាមីនC ផ្លែក្រូចក៏មានផ្ទុកប៉ូតាស្យូមខ្ពស់ ដែលផ្លែក្រូចមួយផ្លែ មានផ្ទុកប៉ូតាស្យូមរហូតដល់ ៣៣៣មីលីក្រាម ។
៥. ផ្លែប៉េងប៉ោះ៖ មានផ្ទុកប៉ូតាស្យូមខ្ពស់ដែលអ្នកជំងឺខ្សោយតម្រងនោមរ៉ាំរ៉ៃគួរជៀសវាង ដោយទឹកប៉េងប៉ោះមួយកែវមានផ្ទុកប៉ូតាស្យូមរហូតដល់ ៩០០មីលីក្រាម ។
៦. ដំឡូងបារាំង៖ មានផ្ទុកប៉ូតាស្យូមខ្ពស់ ដោយដំឡូងបារាំងទម្ងន់ ១៥៦ក្រាម មានផ្ទុកប៉ូតាស្យូមរហូតដល់ ៦១០មីលីក្រាម ៕
អត្ថបទដោយ៖ មឿន គន្ធា