យើងបានដឹងហើយថា ជនជាតិជប៉ុនតែងធ្វើកិច្ចការមានរបៀបរៀបរយ និងជាជនជាតិមានគំនិតច្នៃប្រឌិតថ្មីៗ ជាងគេក្នុងពិភពលោកននេះ។ យើងមកដឹងពីភាពអស្ចារ្យជនជាតិជប៉ុនមួយទៀតក្នុងថ្ងៃនេះ គឺការឈរតម្រង់ជួរគ្នាបានយូរដោយមានរបៀបបំផុត។ ហេតុអ្វីជនជាតិនេះ មានវប្បធម៌ឈរតម្រង់ជួរបានល្អយ៉ាងនេះ?

តាមសារព័ត៌មាន Questionjapanបានបញ្ជាក់ថា ជនជាតិ​ជប៉ុន​ពូកែ​ឈរតម្រង់​ជួរគ្នា​មិន​គួរ​ឱ្យ​ជឿសោះថា ពួកគេអាចចំណាយពេល ៤ទៅ៥ ម៉ោងក្នុងការឈររង់ចាំជាជួរយ៉ាងមានសណ្តាប់ធ្នាប់សម្រាប់ព្រឹត្តិការណ៍អ្វីមួយដោយគ្មានបង្កជាបញ្ហាអ្វីទេ មូលហេតុគឺមកពីជនជាតិនេះមានភាពអត់ធ្មត់ និងការតស៊ូខ្ពស់ ជាផ្នែកសំខាន់នៃការអប់រំរបស់ជនជាតិជប៉ុនផងដែរ។ កុមារគ្រប់រូបនៅទីនេះ ត្រូវបានបង្រៀនយ៉ាងប្រុងប្រយ័ត្នអំពីការលត់ដំខ្លួន និងការគោរពគ្នា។ ពួកគេយល់ថា ដើម្បីទទួលបានអ្វីមួយ ត្រូវរង់ចាំដោយភាពស្ងៀមស្ងាត់ និងអត់ធ្មត់ចំពោះវេនរបស់ខ្លួន។ មកមុន បម្រើមុន អ្នកមកក្រោយ បម្រើតាមក្រោយ គ្មានការរំខាន ឬការត្អូញត្អែរនោះទេ។

នៅប្រទេសជប៉ុន ការឈរតម្រង់ជួរមានរបៀបនេះ ជាវប្បធម៌មួយបានជ្រាបក្នុងបេះដូងជនជាតិជប៉ុនគ្រប់គ្នាដោយមានការណែនាំពីមនុស្សចាស់ៗ និងគ្រូបង្រៀនតាមសាលាថែមទៀត។ វាមិនមែនជារឿងចម្លែកអ្វីទេ ដែលឃើញមនុស្សនៅទីនេះតម្រង់ជួរទិញទំនិញ ឬសម្រាប់ព្រឹត្តិការណ៍ផ្សេងៗនោះ។ ខាង​ក្រោម​នេះ​ ជា​ឧទាហរណ៍​មួយ​ដែល​បង្ហាញ​ពី​របៀប​ដែល​ប្រជាជន​ជប៉ុន​​កំពុងតែឈរ​រង់ចាំ​ជា​ជួរ។ រូបភាព​នេះ​ត្រូវ​បាន​ថត​ក្នុង​សន្និបាត​បែប​កំប្លែង​មួយ​ដែល​មាន​ឈ្មោះ​ថា Comiket។

បើអ្នកមកប្រទេសជប៉ុន សូមចងចាំថា ការរុញ ឬបញ្ចេញសំឡេងខ្លាំងពេកពេលកំពុងតម្រង់ជួរគ្នានោះ វាជាអាកប្បកិរិយាឈ្លើយ មិនអាចទទួលយកបាននៅក្នុងប្រទេសជប៉ុនទេ។

នៅក្នុងឆ្នាំ ២០១១ ពិភពលោកមានការភ្ញាក់ផ្អើលជាថ្មីម្តងទៀតចំពោះរបៀបដែលប្រជាជនជប៉ុនមានវិន័យ និងរៀបចំបានល្អបន្ទាប់ពីទទួលរងការរញ្ជួយដីដ៏ធំ និងរលកយក្សស៊ូណាមិ។ សូម្បីតែនៅក្នុងពេលវេលាដ៏ងងឹតបំផុតក៏ដោយ ក៏ពួកគេនៅតែប្រកាន់ខ្ជាប់យ៉ាងតឹងរ៉ឹងចំពោះការតម្រង់ជួរគ្នា ដើម្បីទទួលបានអាហារ ទឹក និងឧបករណ៍សំខាន់ៗ។ ហើយគ្មានការលួចនោះទេ។ វាពិតជាអស្ចារ្យមែន ហើយធ្វើឱ្យពិភពលោក អត់សរសើរមិនបានមែន ដែលជាជនជាតិមួយដ៏ខ្លាំង៕

អត្ថបទដោយ៖ ទ្រ សុភាព