តាមរយៈការសិក្សាស្រាវជ្រាវបានបង្ហាញថា នារីៗភាគច្រើនសុទ្ធតែស្រលាញ់សក់ប៉ុន្តែនារីតិចតួចបំផុតដែលពេញចិត្តជាមួយនឹងសក់របស់ខ្លួន។ ការសិក្សាពីនារីៗបានបង្ហាញឱ្យដឹងថា ជាង៨០%អះអាងថាសក់ស្អាតគឺជាផ្នែកមួយដែលអាចជួយឱ្យពួកគេស្អាតជាងមុននិងមានភាពជឿជាក់លើខ្លួនឯងខ្លាំងជាងមុន។ ដូចនេះសម្រាប់នារីៗដែលកំពុងមានបញ្ហាសក់ដូចជា ស្ងួត បែកចុង ឬឆេះ ពួកគេអាចសាកល្បងវិធីសាស្រ្តខាងក្រោមដើម្បីធ្វើឱ្យសក់ស្អាតឡើងវិញបានដើម្បីបង្កើនសម្រស់និងភាពជឿជាក់។

តាមរយៈការសម្ភាសជាមួយកញ្ញា សែន ពិភារ បានប្រាប់ក្រុមការងារHealthy Cambodiaយើងពីអាថ៌កំបាំងពីការថែរក្សាសក់ថា តាមរយៈបទពិសោធន៏របស់កញ្ញាផ្ទាល់ បញ្ហាសក់ស្ងួត ខូចខ្លាំងគឺបណ្តាលមកពីការប្តូរពណ៌សក់ញឹកញ៉ាប់ លេងម៉ូតសក់ច្រើន កិបកៀបច្រើនជាដើម ឯអ្នកខ្លះទៀតគឺគាត់ជ្រើសរើសសាប៊ូកក់សក់ខុសពីសុខភាពស្បែកក្បាលនិងសរសៃរសក់របស់គាត់។

កញ្ញាសូមណែនាំឱ្យអ្នកដែលមានបញ្ហាខាងលើនេះ អាចជ្រើសរើសយកប្រភេទសាប៊ូកក់សក់ដែលមានសារធាតុសំណើមខ្ពស់។ ព្រោះសាប៊ូនីមួយៗមានឯកទេសនិងតួនាទីខុសៗគ្នា ដូចនេះចូរសួរអ្នកលក់រកសាប៊ូណាដែលផ្តល់សំណើមខ្ពស់ ជៀសវាងយកប៉ះសាប៊ូដែលមានសារធាតុធ្វើឱ្យសក់កាន់តែស្ងួតថែមដូចជា សាប៊ូដែលមានសារធាតុខ្ងីឬសារធាតុត្រជាក់។ សាប៊ូដែលមានសារធាតុខ្ញីធ្វើឱ្យស្បែកក្បាលក្តៅ ផុយសក់ ឯសារធាតុត្រជាក់មានជាតិកាត់ខ្លាំង បើសក់ស្ងួតហើយប្រើសាប៊ូមានជាតិកាត់និងកាន់តែស្ងួតលើសដើម។

ការរើសសាប៊ូកក់សក់ដែលត្រូវនឹងស្បែកក្បាលជួយឱ្យសក់ស្រស់ស្អាតបានជាង៧០ភាគរយឯណោះ។ កញ្ញាក៏បានបន្ថែមទៀតថា ចំពោះអ្នកដែលមានសក់ស្ងួតកញ្ញាសូមណែនាំឱ្យគប្បីប្រើសាប៊ូកក់សក់ជាឈុត គួរមានទាំងសាប៊ូកក់សក់ ក្រែមបន្ទន់សក់ និងប្រេងលាបសក់ដើម្បីជួយឱ្យសក់មានទម្ងន់រលោងឡើងវិញ ព្រោះសាប៊ូតែមួយមុខមិនអាចជួយបំពេញសំណើមឱ្យសក់បានទេ។

ការថែទាំតាមការជ្រើសរើសសាប៊ូកក់សក់ធ្វើឱ្យសក់ស្អាតហើយ ប៉ុន្តែអ្នកដែលចង់មានសក់ស្អាតក៏គួរតែថែទាំពីខាងក្នុងដូចគ្នា ដូចជាការញ៉ាំបន្លែឱ្យបានគ្រប់គ្រាន់ រើសយកបន្លែផ្លែឈើណាដែលជួយដល់សរសៃសក់ ញ៉ាំទឹកឱ្យបានគ្រប់ គេងឱ្យបានគ្រប់ ហើយជាពិសេសនោះគឺ កាត់បន្ថយការគិតច្រើននិងស្រ្តេស។ ការមើលថែសុខភាពផ្លូវចិត្ត ផ្លូវកាយ របបអាហារក៏អាចជួយឱ្យយើងមានសម្រស់ស្អាតផងដែរ។

គួររម្លឹកផងដែរថា កញ្ញា សែន ពិភារ គឺជាម្ចាស់ក្រុមហ៊ុនសុក្រិត្យ និងពិភារ ខសមេធិក ដែលជាអ្នកឯកទេសនាំចូលសាប៊ូកក់សក់ ភារ ព្រីមៀម ដែលមានរូបមន្តពីប្រទេសកាណាដា។ កញ្ញាក៏ជានារីមួយរូបដែលធ្លាប់មានសក់ខូចខ្លាំង ប៉ុន្តែដោយសារតែសេចក្តីស្រលាញ់សក់កញ្ញាក៏បានយកចិត្តទុកដាក់ថែទាំសក់រហូតទទួលបានសក់ស្រស់ស្អាតវិញ និងអាចបើកក្រុមហ៊ុននាំចូលសាប៊ូកក់សក់តែម្តង៕

អត្ថបទដោយ៖ អឿ​ ស្រីហួយ