តាមរយៈការចុះផ្សាយរបស់ក្រសួងព័ត៌មាន នៅថ្ងៃទី២៧ ខែឧសភា ឆ្នាំ២០២២នេះ បានឱ្យដឹងថា លោកសាស្រ្តាចារ្យ ឃុន លាងឈុន នាយករងមន្ទីរពេទ្យជ័យវរ្ម័នទី៧បានជំរុញឱ្យគិលានុបដ្ឋាទាំងអស់ បើធ្វើជាពេទ្យ ត្រូវមានបេះដូងជាពេទ្យ មានន័យថា ធ្វើជាពេទ្យពេលមានអ្នកជំងឺមកជួបយើងឱ្យជួយសង្គ្រោះជីវិត គ្រូពេទ្យត្រូវតែធ្វើតួនាទីរបស់ខ្លួនឱ្យបានល្អ គឺសង្គ្រោះជីវិតមនុស្សឱ្យបានទាន់ពេលវេលា និង មើលថែប្រកបដោយវិជ្ជាជីវៈ មានក្រមសីលធម៌ល្អ។
ថ្លែងនៅក្នុងកិច្ចប្រជុំ បូកសរុបការងារប្រចាំឆ្នាំ២០២១ និងលើទិសដៅឆ្នាំ២០២២ របស់ គណៈគិលានុបដ្ឋាកម្ពុជា នៅខេត្តសៀមរាប នាព្រឹកថ្ងៃទី២៧ ខែឧសភា ឆ្នាំ២០២២ លោកសាស្រ្តាចារ្យ ឃុន លាងឈុន បានលើកឡើងថា នៅក្នុងអំឡុងនៃការរាតត្បាតខ្លាំង នៃមេរោគកូវីដ១៩ គិលានុបដ្ឋាបានចូលរួមប្រយុទ្ធប្រឆាំងយ៉ាងខ្លាំងក្លា និងនិយាយបានថា ក្រុមគ្រូពេទ្យ ជាវីរៈបុរសអាវស ឬកងទ័ពអាវស ដែលសកម្មភាពទាំងនេះ បានបង្ហាញឱ្យឃើញពីការ លះបង់គ្រប់បែបយ៉ាង ដើម្បីជួយសង្គ្រោះអាយុជីវិតរបស់ប្រជាជនកម្ពុជា បើទោះបីដឹងថាខ្លួនប្រឈមនឹងគ្រោះថ្នាក់គ្រប់ពេលក៏ដោយ ដែលកត្ដាទាំងនេះហើយហៅថា ធ្វើពេទ្យមានបេះ ដូងជាពេទ្យ។
លោកសាស្រ្ដាចារ្យបន្តថា បើទោះបីជាគិលានុបដ្ឋាមួយចំនួនធំ បានគោរព ក្រមសីលធម៌ ភាពសុច្ចរិត យុត្តិធម៌ ភក្តីភាព និងការមើលថែអ្នកជំងឺប្រកបដោយវិជ្ជាជីវៈក៏ពិតមែន ប៉ុន្តែក៏នៅមានគិលានុបដ្ឋាមួយចំនួនតូចនៅមិនទាន់អនុវត្តន៍ គោរពក្រមសីលធម៌បានល្អ ដែលធ្វើឱ្យមានការប៉ះពាល់ដល់វិស័យសុខាភិបាលយើងខ្លះដែរ។
លោកអនុបណ្ឌិត អ៊ុន សាន ប្រធានក្រុមប្រឹក្សាគណៈគិលានុបដ្ឋាជាតិបានមាន ប្រ សាសន៍ថា គណៈគិលានុបដ្ឋាកកម្ពុជាបង្កើតឡើង ក្នុងគោលបំណង គឺពង្រឹងការលើក កម្ពស់ សុខុមាលភាពជូនប្រជាពលរដ្ឋស្របតាមគោលនយោបាយជាតិកាត់បន្ថយបាតុភាពអវិជ្ជមានបណ្តាលមកពីការមិនគោរពឱ្យបានត្រឹមត្រូវនូវគោលការណ៍ ក្រមសីលធម៌វិជ្ជាជីវៈថែទាំ និង ដើម្បីការពារកិត្តិយស និងឥស្សរភាពរបស់វិជ្ជាជីវៈ។ លោកបានបញ្ជាក់ថា ការគោរពគោល ការណ៍ នេះ ដើម្បីធ្វើយ៉ាងណាឱ្យសម្រេចបានទិសដៅសំខាន់ៗក្នុងការអនុវត្ត ឱ្យស្របតាម ក្រម សីលធម៌ ផ្ដល់ការថែទាំព្យាបាលអ្នកជំងឺឱ្យមានគុណភាព។
លោកបានបន្ថែមថា គិលានុបដ្ឋាដែលប្រកបវិជ្ជាជីវៈថែទាំ ទាំងសេវាសាធារណៈ និងឯកជន ត្រូវតែគោរពកិច្ច ការរបស់ ខ្លួនដោយចុះបញ្ជិការ និងមានអាជ្ញាប័ណ្ណក្នុងការប្រកបវិជ្ជាជីវៈថែទាំ ស្របតាមព្រះរាជ ក្រម ស្តីពីការគ្រប់គ្រងអ្នកប្រកបវិជ្ជាជីវៈវិស័យសុខាភិបាល ដើម្បីជាប្រយោជន៍ក្នុង ការលើកកម្ពស់ វិជ្ជា ជីវៈថែទាំនៅកម្ពុជា។
ជាមួយគ្នានេះដែរ លោក អ៊ុន សាន បានអះអាងថា ឥឡូវនេះសម្រាប់មន្ទីរពេទ្យណា ដែលគិលានុបដ្ឋាគោរពក្រមសីលធម៌ ភាពសុច្ចរិតយុត្តិធម៌ និងភក្តីភាព និងការមើល ថែអ្នក ជំងឺប្រកបដោយវិជ្ជាជីវៈ និងទទួលបានការលើទឹកចិត្ត និងរង្វាន់ផងដែរ៕
