ពេលព្រឹក ជាពេលដែលរាងកាយនិងខួរក្បាលកំពុងត្រៀមខ្លួនសម្រាប់ការចាប់ផ្តើមថ្មី។ តាមការណែនាំរបស់អ្នកជំនាញលោក Arthur Brooks ដែលជាសាស្រ្តាចារ្យ បង្រៀនថ្នាក់អំពីការគ្រប់គ្រងសុភមង្គលនៅ Harvard និងជាអ្នកនិពន្ធជួរមុខ បានបង្ហាញថា ការរៀបចំទំម្លាប់ពេលព្រឹកឱ្យបានត្រឹមត្រូវ នឹងធ្វើឱ្យយើងទទួលបានារម្មណ៍ល្អ មានថាមពលក្នុងខ្លួន និងមានសុភមង្គលក្នុងជីវិត។ ហើយខាងក្រោមនេះគឺជាទម្លាប់តូចៗចំនួន ៥ ដែលអ្នកអាចអនុវត្តបាន៖
១. ត្រូវភ្ញាក់ពីព្រលឹម៖ ព្រឹកមុនពេលព្រះអាទិត្យរះ គឺជាពេលស្ងប់ស្ងាត់ដែលយើងអាចផ្តោតលើខ្លួនឯង និងមានគំនិតវិជ្ជមាន។ ការស្រាវជ្រាវក៏បានបញ្ជាក់ដែលថា មនុស្សដែលភ្ញាក់លឿននៅមុនពេលព្រះអាទិត្យរះ មានភាពច្នៃប្រឌិត និងការចងចាំល្អជាងមនុស្សទូទៅ។
២. ធ្វើលំហាត់ប្រាណ៖ បន្ទាប់ពីភ្ញាក់ពីគេង ប្រហែល ១០ ទៅ ១៥ នាទី គួរចាប់ផ្តើមធ្វើសកម្មភាពរាងកាយ ដូចជាហាត់ប្រាណ ឬដើរលំហែ។ វាមិនត្រឹមតែបង្កើនកម្លាំងសាច់ដុំទេ ប៉ុន្តែជួយឱ្យខួរក្បាលដំណើរការលឿន និងបញ្ចេញអរម៉ូនរីករាយ ធ្វើឱ្យចិត្តស្រស់ថ្លា បំពេញការងារអ្វីក៏រលូន។
៣. ធ្វើសមាធិ៖ គួរចំណាយពេលខ្លះសម្រាប់ចិត្តវិញ្ញាណ ធ្វើសមាធិ អធិស្ឋាន ឬសរសេរកំណត់ហេតុអ្វីក៏បាន។ វាជួយឱ្យចិត្តស្ងប់ស្ងាត់ និងរៀបចំអារម្មណ៍សម្រាប់ថ្ងៃថ្មី។ លោក Brooks ថា ការសរសេរផ្ទាល់ពីអ្វីដែលយើងស្រលាញ់ អាចជួយបន្ថយស្ត្រេស និងធ្វើឱ្យអារម្មណ៍វិជ្ជមានកើនឡើងយ៉ាងច្បាស់។
៤. ញុំាអាហារពេលព្រឹកដែលមានប្រូតេអ៊ីនខ្ពស់៖ សម្រាប់អាហារពេលព្រឹក គួរជ្រើសរើសអាហារដែលមានប្រូតេអ៊ីនខ្ពស់ ដូចជា Greek yogurt ឬ ស៊ុត ជាមួយបន្លែ និងផ្លែឈើតិចៗ។ អាហារបែបនេះជួយឱ្យឆ្អែតយូរ និងមានថាមពលពេញមួយព្រឹក។
៥. កុំលេងទូរស័ព្ទភ្លាមៗ៖ ភ្ងាក់ពីគេងភ្លាមមិនគួរស្រវ៉ាកាន់ទូរស័ព្ទភ្លាមទេ ជំនួសវិញដោយចាប់ផ្តើមធ្វើការលើសកម្មភាពដែលតម្រូវឱ្យប្រើការគិតច្នៃប្រឌិត ឬការងារដែលសំខាន់សម្រាប់ថ្ងៃនោះ។ នៅពេលដែលអ្នកចាប់ផ្តើមថ្ងៃជាមួយថាមពលល្អៗ នោះការងាររបស់អ្នកនឹងមានប្រសិទ្ធភាព និងអារម្មណ៍រីករាយច្រើនជាងមុន។
យ៉ាងណាក៏ដោយ លោក Brooks ណែនាំថា មិនចាំបាច់ធ្វើតាមទម្លាប់ទាំងនេះដូចគាត់ទាំងស្រុងទេ។ តែអ្នកអាចកែប្រែទម្លាប់ឱ្យសមនឹងជីវិតផ្ទាល់ខ្លួនរបស់អ្នក។ អ្វីដែលសំខាន់គឺការរក្សាទម្លាប់មួយចំនួនដែលជួយឱ្យអ្នកមានសុខុមាលភាពផ្លូវចិត្ត ថាមពល និងអារម្មណ៍ល្អជារៀងរាល់ថ្ងៃ។ ពេលព្រឹកគឺជាចំណុចចាប់ផ្តើមនៃថ្ងៃថ្មី បើអ្នកចាប់ផ្តើមវាដោយថាមពលវិជ្ជមាន សេចក្ដីសុខ និងអារម្មណ៍ល្អៗ នោះទាំងថ្ងៃរបស់អ្នកក៏នឹងពោរពេញដោយសុភមង្គល៕
អត្ថបទដោយ៖ សារួ