ឈឺបត់ជើងតូចហើយតែមិនព្រមទៅនោម ផឹកទឹកតិចពេក ឬច្រើនពេក ញ៉ាំប្រៃ ឬផ្អែមពេក ខ្ជិលហាត់ប្រាណ ជក់បារី ផឹកស្រាច្រើនជ្រុល សុទ្ធសឹងជាទម្លាប់បំផ្លាញតម្រងនោម ធ្វើឲ្យមុខងារតម្រងនោមចុះខ្សោយខ្លាំងដែលយើងគ្រប់គ្នាច្រើនតែមើលរំលង។ នេះបើយោងតាមការចុះផ្សាយរបស់វែបសាយ Vnexpress ។ ខណៈខាងក្រោមនេះគឺជាទម្លាប់សាមញ្ញទាំង៥ អាចបំផ្លាញតម្រងនោមរបស់យើងដោយមិនដឹងខ្លួន។
១. ទប់នោម៖ មិនបញ្ចេញទឹកនោមឲ្យអស់ពីប្លោកនោមឲ្យទាន់ពេលវេលា គឺជាមូលហេតុចម្បងមួយនៃបញ្ហាតម្រងនោម។ ប្រសិនបើយើងឧស្សាហ៍ទប់នោម បាក់តេរីនឹងចាប់ផ្ដើមកើនឡើងទ្វេដង។ ចុងក្រោយ វាអាចបណ្ដាលឲ្យមានផលវិបាកធ្ងន់ធ្ងរ ដូចជាការឆ្លងមេរោគ និងការនោមទាស់។
២. ផឹកទឹកមិនគ្រប់គ្រាន់៖ ការផឹកទឹកច្រើន ឬតិចពេក មិនល្អសម្រាប់តម្រងនោមនោះទេ។ យោងតាមលោកវេជ្ជបណ្ឌិត Hien ការផឹកទឹកច្រើនពេកនឹងដាក់សម្ពាធលើតម្រងនោម ដែលអាចបណ្តាលឱ្យ hyponatremia ឬហៅថាការស្រវឹងទឹក។ នៅពេលដែលបរិមាណទឹកច្រើនត្រូវបានប្រើប្រាស់ក្នុងរយៈពេលដ៏ខ្លី តម្រងនោមមិនអាចបញ្ចេញសារធាតុរាវគ្រប់គ្រាន់ដើម្បីច្រោះ និងបញ្ចេញទឹកបានត្រឹមត្រូវនោះទេ។ Hyponatremia អាចនាំឱ្យមានការឈឺក្បាល ព្រិលភ្នែក ប្រកាច់ ហើមខួរក្បាល និងអាចស្លាប់បាន ។
ការផឹកទឹកតិចពេកធ្វើឱ្យតម្រងនោមមិនមានទឹកគ្រប់គ្រាន់ក្នុងការកន្ត្រាក់ និងរុញសូដ្យូម និងកាកសំណល់ និងជាតិពុលចេញមកក្រៅ ដែលធ្វើឱ្យមេរោគមិនអាចបំបែក និងកកកុញនៅក្នុងខ្លួន ដែលជាហេតុបង្កើនហានិភ័យនៃក្រួសក្នុងតម្រងនោម និងជាតិពុលក្នុងតម្រងនោម។
៣. ញ៉ាំប្រៃ និងផ្អែមពេក៖ ការទទួលទានអំបិលច្រើនធ្វើឱ្យសម្ពាធឈាមឡើងខ្ពស់ រំខានដល់មុខងារចម្រោះឈាមក្នុងតម្រងនោម ។ សម្ពាធកើនឡើងនៃឈាមនៅពេលដែលវាហូរតាមសរសៃឈាមនៅក្នុងក្រពេញអាចបំផ្លាញសរសៃឈាមតូចៗនៅក្នុង nephron អង្គភាពរចនាសម្ព័ន្ធនៃតម្រងនោម។ យោងតាមការណែនាំរបស់ WHO មនុស្សម្នាក់ៗគួរទទួលទានអំបិលតិចជាង ៥g ក្នុងមួយថ្ងៃ។
ជាមួយគ្នាដែរការញ៉ាំផ្អែមពេកអាចនាំឱ្យកើតជំងឺទឹកនោមផ្អែម ធាត់ បង្កើនហានិភ័យនៃការខូចតម្រងនោម ។ ដោយសារតែកោសិកាក្នុងរាងកាយមិនអាចប្រើប្រាស់ជាតិស្ករ (គ្លុយកូស) ទាំងអស់ក្នុងឈាមបាន ជាតិស្ករក្នុងឈាមខ្ពស់នាំឱ្យខូចសរសៃឈាមក្នុងតម្រងនោម និងសរីរាង្គផ្សេងៗទៀត។
៤. ខ្ជិលហាត់ប្រាណ៖ លោកវេជ្ជបណ្ឌិត Hien បាននិយាយថា ការហាត់ប្រាណជួយសម្រួលដល់សម្ពាធឈាម និងធានាដល់សុខភាពតម្រងនោម។ ផ្ទុយទៅវិញការអង្គុយយូរដោយគ្មានចលនា នឹងហានិភ័យនៃជំងឺតម្រងនោមអាចកើនឡើង៣០%។ លំហាត់ប្រាណបានជួយបន្ថយសម្ពាធឈាម កូលេស្តេរ៉ុល និងទម្ងន់ខ្លួន គ្រប់គ្រងសារធាតុចិញ្ចឹមក្នុងខ្លួន។ ហើយវាក៏បានជួយកាត់បន្ថយហានិភ័យនៃជំងឺលើសឈាម ជំងឺបេះដូង និងជំងឺទឹកនោមផ្អែម។ ប្រសិនបើអ្នកអសកម្មក្នុងការហាត់ប្រាណ ឱកាសរបស់អ្នកក្នុងការកើតជំងឺទាំងនេះកាន់តែខ្ពស់ ដែលនាំទៅរកការកើនឡើងហានិភ័យនៃជំងឺតម្រងនោម។
៥. ជក់បារី ផឹកស្រាច្រើនជ្រុល៖ ការជក់បារីធ្វើឱ្យប៉ះពាល់ដល់តម្រងនោមដោយបង្កើនសម្ពាធឈាម និងចង្វាក់បេះដូង ធ្វើឱ្យមានភាពតានតឹងបន្ថែមលើតម្រងនោម។ ជាតិនីកូទីនក្នុងបារីក៏កាត់បន្ថយលំហូរឈាមទៅកាន់ក្រលៀន ធ្វើឱ្យសរសៃឈាមរួមតូច ខណៈពេលដែលសម្ពាធឈាមខ្ពស់គឺជាមូលហេតុចម្បងនៃជំងឺតម្រងនោម។
ការផឹកស្រាច្រើនជាប្រចាំនឹងធ្វើឲ្យកំហាប់ជាតិអាល់កុលក្នុងឈាមកើនឡើង តម្រងនោមត្រូវធ្វើការជាប្រចាំដើម្បីច្រោះឈាម ប៉ុន្តែពិបាកនឹងកំចាត់ជាតិពុលទាំងអស់ចេញ។ កត្តានេះអាចនាំឱ្យកើតជំងឺសរសៃប្រសាទស្រួចស្រាវ ឬរ៉ាំរ៉ៃ។ ទន្ទឹមនឹងនោះ ការទទួលទានគ្រឿងស្រវឹងច្រើនបង្កើនសម្ពាធឈាម និងបំផ្លាញតម្រងនោមផងដែរ។
ដោយឡែក វេជ្ជបណ្ឌិត ហង្ស តារា ធ្លាប់បានបញ្ជាក់ថា ប្រសិនជាយើងកំពុងតែមានជំងឺតម្រងនោមវានឹងមានការប្រែប្រួលតាមដំណាក់កាលវិវត្តទៅរកជំងឺតម្រងនោមរ៉ាំរ៉ៃមាន៥ដំណាក់កាល ប្រសិនបើយើងនៅតែបន្តផឹកស្រា ជក់បារី គេងមិនបានគ្រប់គ្រាន់។ ដូច្នេះអ្នកត្រូវយកចិត្តទុកដាក់ថែទាំ និងឆាប់ពិនិត្យឱ្យបានច្បាស់លាស់នៅពេលមានរោគសញ្ញា ជាពិសេសគួរកុំធ្វើទម្លាប់ដូចដែរចាបបៃតងបានរៀបរាប់ដូចខាងលើ ដែលវាអាចបំផ្លាញតម្រងនោមបានគ្រប់ពេល ៕
អត្ថបទដោយ៖ ស្រីណុច