បងប្អូនភ្លោះប្រុស ស្រីជនជាតិកាណាដា ២រូប បានបំបែកកំណត់ត្រាពិភពលោក Guinness World Records (GWR) ដែលត្រូវបានក្លាយជាកូនភ្លោះកើតមិនគ្រប់ខែក្មេងខ្ចីបំផុតប្រចាំពិភពលោក។ នេះបើយោងតាមការចុះផ្សាយរបស់សារព័ត៌មាន Newsinfo កាលពីថ្ងៃទៅ០៧ ខែមីនា ឆ្នាំ២០២៣។
Adiah និង Adrial Nadarajah ចាប់កំណើតនៅថ្ងៃទី០៤ ខែមីនា ឆ្នាំ២០២២ នៅអាយុគភ៌២២សប្តាហ៍ ឬ១២៦ថ្ងៃ បានបំបែកកំណត់ត្រា១ថ្ងៃ នៃកំណត់ត្រាមុនដែលបានកំណត់ក្នុងឆ្នាំ២០១៨ ដោយកូនភ្លោះជនជាតិអាមេរិក។
Adiah ដែលជាភេទស្រី មានទម្ងន់ត្រឹមតែ៣៣០ក្រាម (០.៧២ផោន) និងចំណែក Adrial Nadarajah ភេទប្រុស មានទម្ងន់ត្រឹមតែ៤២០ក្រាម (០.៩២ផោន) ពួកគេក៏ជាកូនភ្លោះដែលមានទម្ងន់ស្រាលបំផុតតាំងពីកំណើតមិនធ្លាប់មានផងដែរ។ នេះបើតាមការបញ្ជាក់របស់ Guinness World Records (GWR) នៅលើគេហទំព័ររបស់ខ្លួន។
ដកស្រង់សំដីឪពុក ម្តាយរបស់ទារក សៀវភៅយោងសម្រាប់កំណត់ត្រានៃសមិទ្ធិផលរបស់មនុស្ស និងពិភពធម្មជាតិ បាននិយាយថា កូនភ្លោះទាំងពីរត្រូវបានផ្តល់សញ្ញា ០% នៃឱកាសរស់រានមានជីវិតដោយគ្មានវេជ្ជបណ្ឌិតណាម្នាក់ហ៊ានអះអាងថាពួកគេមានជីវិតនោះឡើយ។
ម្តាយរបស់ពួកគេលោកស្រី Shakina Rajendram បានប្រាប់ GWR ថា "នៅពេលដែលខ្ញុំចូលសម្រាលកូន ទារកទាំងនោះត្រូវបានបដិសេធរាល់វិធានការទ្រទ្រង់ជីវិតនៅមន្ទីរពេទ្យដែលខ្ញុំត្រូវបានគេអនុញ្ញាតិឱ្យសម្រាក ហើយពួកគេស្ទើរតែស្លាប់បាត់ទៅហើយ"។ ខណៈមន្ទីរពេទ្យភាគច្រើនមិនព្យាយាមជួយសង្គ្រោះទារកដែលកើតមុន ២៤-២៦ សប្តាហ៍នោះទេ។
បន្ទាប់មក Rajendram ត្រូវបានបញ្ជូនទៅមន្ទីរពេទ្យមួយផ្សេងទៀត ដែលនឹងផ្តល់ការថែទាំទារកអាយុ ២២សប្តាហ៍។ យ៉ាងណាមិញប្រសិនបើកូនភ្លោះកើតមុនពេលនោះ មន្ទីរពេទ្យមិនជួយសង្គ្រោះពួកគេឡើយ។ ប៉ុន្តែជាភ័ព្វសំណាងល្អ ក្រោយពេលដែលនាងសន្លប់ក្នុងរយៈពេល១៥នាទី បន្ទាប់មកក៏ដឹងខ្លួនវិញ ហើយនាងក៏បានសម្រាលកូនភ្លោះទាំងពីរ។ រហូតមកទល់បច្ចុប្បន្ននេះទារកទាំង២ គឺមានសុខភាពល្អ ហើយមានការលូតលាស់ដូចក្មេងដទៃផ្សេងទៀតផងដែរ ៕
អត្ថបទដោយ៖ ស្រីណុច
