ប្រមាត់ គឺជាសរីរាង្គដែលស្ថិតនៅក្រោម​ថ្លើម ហើយជាទូទៅទឹករបស់ប្រមាត់ត្រូវបានផលិតដោយថ្លើម និងត្រូវបានបញ្ជូនទៅកាន់ពោះវៀនតូចផ្ទាល់​ ដើម្បីចូលរួមក្នុងការរំលាយអាហារ។ មួយវិញទៀតប្រសិនបើ ប្រមាត់មានបញ្ហាវាអាចជះផលប៉ះពាល់ដល់រាងកាយដូចជា រាគ ចុក ​ទល់លាមក …ជាដើម។

យោងតាមការចែករំលែក​របស់ អ្នកឧកញ៉ាវេជ្ជបណ្ឌិត គួច​ ម៉េងលី ក្នុងបណ្ដាញសង្គមយូធូប​​បានឱ្យដឹងថា ប្រមាត់ជាភាសាអង់គ្លេសគេហៅថា Gallbladder ដោយប្រមាត់គឺតជាប់ទៅនឹងថ្លើម ហើយជាទូទៅមុននឹងឈានដល់ថ្នាក់ការវះកាត់ប្រមាត់ចេញមានកត្តាជាច្រើន ហើយប្រសិនណាជាមានការវះកាត់ក៏មិនមានបញ្ហាអ្វីខ្លាំងនោះទេ គ្រាន់តែឧស្សាហ៍មានអាការៈរាគ ចុកពោះ ទល់លាមក…ជាដើម។

លោកវេជ្ជបណ្ឌិតបានបន្ថែមទៀតថា ចំពោះរូបរាងរបស់ប្រមាត់គឺ​ ប្រហែលធំជាងមេដៃរបស់យើងបន្តិច តែប្រវែងរបស់វា​ធំល្មមប្រហែលជា៤​ថ្នាំងដៃរបស់យើង។​ តួនាទីរបស់ប្រមាត់ គឺចាំស្តុកទុកទឹកប្រមាត់ដែលផលិតចេញពីថ្លើម ហើយទឹកប្រមាត់នឹងត្រូវបានបញ្ជូនទៅពោះវៀនតូចផ្ទាល់ ដើម្បីជួយក្នុងការរំលាយអាហារ។ ជាពិសេស គឺជួយស្រូបយកជាតិខ្លាញ់ដែលមិនល្អចេញនៅពេលយើងញុំាអាហារ​ ក៏ដូចជាជញ្ជូនខ្លាញ់ល្អ​ និងប្រូតេអ៊ីនទៅក្នុងរាងកាយវិញបានយ៉ាងប្រសើរ។​

ជាធម្មតាខ្លាញ់ដែលមាននៅក្នុងប្រមាត់ គឺត្រូវបានសម្អាតដោយធម្មជាតិរបស់វាផ្ទាល់​​ ក៏ប៉ន្តែក៏មានកត្តាផ្សេងៗអាចធ្វើឱ្យថង់ប្រមាត់មានខ្លាញ់នៅក្នុងជាច្រើន ​យូរៗទៅបណ្ដាលឱ្យខ្លាញ់កកដុំ​ឱ្យនាំមានការកកស្ទះនៅទុយោរបស់ប្រ​មាត់ ក៏បណ្ដាលឱ្យមានគ្រួសនៅថង់ប្រមាត់ឡើងមក។

កត្តាគ្រួសក្នុងប្រមាត់ ធ្វើឱ្យមានអាការៈឈឺចុកខ្លាំងនៅក្នុងទ្រូង ធ្លាយទៅដល់ឆ្អឹងខ្នងខាងក្រោយ​ រាគ​ ក្អួត អស់កម្លាំង ក្ដៅខ្លួន លាមកមានពណ៌សភ្លឺ ទឹកនោមមានពណ៌ក្រម៉ៅ​ ព្រឺរងា និងជាសញ្ញាគ្រោះថ្នាក់ប្រសិនបើអាការៈមិនបាត់រយៈពេល៥ ម៉ោង គេអាចសន្និដ្ឋានបានថា ​ជាអាចមកពីបញ្ហាប្រមាត់។

ជួ​នកាលបញ្ហាប្រមាត់ មិនមែនមកពីគ្រួសក្នុងប្រមាត់តែមួយនោះទេ ​អាចមកពីមហារីក ដំបៅ ឬក៏មកពី​រលាកទុយោប្រមាត់ ​ហើយប្រសិនបើយើងមិនយកចិត្តទុកដាក់ក្នុងការព្យាបាលទេវាអាចធ្វើឱ្យ ទឹកប្រមាត់ធ្លាយកាលណាវាធ្លាយអាចប៉ះពាល់ទៅដល់សរីរាង្គផ្សេងៗជាច្រើននៅក្នុងរាងកាយ។ លោកវេជ្ជបណ្ឌិតបញ្ជាក់ទៀតថា អ្នកដែលវះកាត់ប្រមាត់ចេញ​ អាចមានអាការៈឧស្សាហ៍រាគ ទល់លាមកខុសធម្មតាអាចបញ្ចេញខ្យល់ញឹកព្រោះ អ្នកវះកាត់ប្រមាត់ងាយនឹងហើមពោះ ដោយសារជាទូទៅទឹកប្រមាត់ត្រូវបានបញ្ចេញពេលដែលរាងកាយយើងត្រូវការតែប៉ុណ្ណោះ តែពេលយើងវះកាត់យកវាចេញ​ ទឹកប្រមាត់នឹងនៅតែបញ្ចេញមកពីថ្លើមដដែល តែមិនកំណត់វាបញ្ចេញមករហូតតែម្ដង ជាហេតុធ្វើឱ្យមានអាការៈទាំងអស់នឹងឡើងមក។ ចំពោះការវះកាត់ប្រមាត់នេះផ្ទាល់មិនពិបាកដូចកាលពីមុនគឺត្រូវវះពោះដើម្បីវះកាត់នោះទេ គឺគេចោះប្រហោងមួយហើយដាក់ទុយោបាញ់ភ្លើង វះតោងយកថង់ប្រមាត់ចេញ។

ជាចុងក្រោយ អ្នកឧកញ៉ាវេជ្ជបណ្ឌិត គួច​ ម៉េងលី បានណែនាំថា ដើម្បីកុំឱ្យមានហានិភ័យនៃជំងឺនេះឡើងមក​គួរតែញុំាអាហារដែលមានជាតិសរសៃឱ្យបានច្រើន​ កាត់បន្ថយការញុំាអាហារណាដែលមានជាតិខ្លាញ់ និងមានជាតិកាបូអ៊ីដ្រាតច្រើន។ មួយវិញទៀតគួរតែព្យាយាមទៅពិនិត្យសុខភាពយ៉ាងតិច៦ខែម្ដង និងកុំព្យាយាមដូរពេទ្យក្នុងការព្យាបាលពេក ព្រោះវាអាចប៉ះពាល់ដល់អាយុជីវិត ហើយសម្រាប់ការយកប្រមាត់ចេញ វាមិនមានហានិភ័យអ្វីខ្លាំងនោះទេ។ មួយវិញទៀត ប្រសិនបើមានអាការៈចុកទ្រូង ចេះតែគិតថាជាបញ្ហាក្រពះសូមប្រយ័ត្ន វាអាចមកពីបញ្ហាគ្រួសក្នុងប្រមាត់ គួរតែទៅជួបពេទ្យដើម្បីធ្វើបញ្ជាក់ពីបញ្ហាជំងឺឱ្យបានច្បាស់លាស់ជាបន្ទាន់៕

អត្ថបទដោយ ៖ ប៉ែត ធីតា