មុននឹងចូលទៅដល់ការចែករំលែកលម្អិតរបស់ទន្តបណ្ឌិតឯកទេសនៅថ្ងៃនេះ ចង់សួរទៅកាន់អ្នកអានគ្រប់រូបថា ធ្លាប់ឆ្លុះកញ្ចក់ពិនិត្យមើលឬទេថា តើធ្មេញមានដង្កូវស៊ី (ពុកធ្មេញ) ដែរឬទេ? បើមានតើពុកអស់ប៉ុន្មានគ្រាប់ហើយ? តើអ្នកដឹងទេថា ការទុកឱ្យមានធ្មេញពុកឬដង្កូវស៊ីនៅក្នុងមាត់បែបនេះយូរឆ្នាំនឹងបង្កបញ្ហាដូចជា មានក្លិនមាត់អាក្រក់ យូរៗទៅអាចខូចទៅដល់ឬសធ្មេញ ឬករណីធ្ងន់អាចបង្កជាខ្ទុះនៅក្នុងអញ្ចាញធ្មេញទៀតផង។
ដូចនេះប្រសិនបើមានពុកធ្មេញ គួរតែជួបទន្តបណ្ឌិតជំនាញឱ្យបានលឿនបំផុតតាមដែលអាចធ្វើទៅបាន ប៉ុន្តែចុះអ្វីទៅជាកត្តាធ្វើឱ្យធ្មេញពុកខូចបែបនេះ? កត្តាទី១គឺការសម្អាតមិនគ្រប់គ្រាន់ ហើយកត្តាធំបំផុតគឺចំណីរអាហារតែម្តង។ ជាមួយគ្នានេះ ទន្តបណ្ឌិត ស៊ឺ សោមករា បានប្រាប់ចាបបៃតងពីពពួកអាហារមួយក្រុមដែលងាយបង្កឱ្យពុកធ្មេញលឿនបំផុត។
នៅក្នុងកិច្ចសម្ភាសផ្ទាល់រវាងចាបបៃតង និង ទន្តបណ្ឌិត ស៊ឺ សោមករា ដែលជាគ្រូពេទ្យបង្គោលនិងជាអនុប្រធានបច្ចេកទេស នៅក្នុងពេទ្យធ្មេញខេមរាព្រែកលៀប បានឱ្យដឹងថា “ពពួកអាហារដែលមានរសជាតិផ្អែម និងស្អិត ជាអាហារដែលងាយទៅបំផ្លាញធ្មេញឱ្យមានការពុកផុយលឿនបំផុត។ អាហារទាំងនោះរួមមានដូចជា ភេសជ្ជៈកំប៉ុង ភេសជ្ជៈផ្អែម អាហារផ្អែម នំផ្អែម និងអាហារដែលបងប្អូនសម្គាល់ឃើញមានភាពស្អិតនិងផ្អែមសុទ្ធតែជាភ្នាក់ងារបង្ករោគពុកធ្មេញ។”
ទន្តបណ្ឌិត ស៊ឺ សោមករា ក៏បានបញ្ជាក់ឱ្យដឹងដែលថា មូលហេតុដែលអាហារផ្អែមនិងអាហារស្អិតងាយធ្វើឱ្យពុកធ្មេញ ដោយសារតែពពួកអាហារទាំងនេះវាចូលទៅតោងតាមចន្លោះធ្មេញ ហើយតោងជាប់ធ្មេញជាងអាហារផ្សេងៗ។ ហេតុនេះនៅពេលដែលយើងមិនបានដុសសម្អាតធ្មេញបានល្អ មិនបានប្រើអំបោះទាក់តាមចន្លោះធ្មេញដែលជាកន្លែងវីរុសបាត់តេរីរស់នៅនោះទេ យូរៗទៅបង្កជារោគពុកធ្មេញនេះតែម្តង។ មកដល់ត្រង់ចំណុចនេះ តើអ្វីគឺជារោគពុកធ្មេញ តើវាបង្កឡើងពីដង្កូវស៊ីធ្មេញរបស់យើងពិតដែរឬទេ?
តាមការលើកឡើងរបស់ទន្តបណ្ឌិត ស៊ឺ សោមករា គឺរោគពុកធ្មេញ ជាការខូចខាតរចនាសម្ព័ន្ធនៃធ្មេញ ដែលគេហៅថាជំងឺពុកធ្មេញ។ ភាគច្រើនវាកើតឡើងទៅលើមនុស្សគ្រប់វ័យទាំងអស់ ហើយវាកើតឡើងដោយសារតែបាក់តេរីទៅតោងនៅលើធ្មេញរយៈពេលយូរកើតទៅជាអាស៊ីតដែលបំប្លែងមកពីអាហារដូចជាអាហារដែលយើងញ៉ាំចូលទៅក្នុងមាត់រួមមានដូចជា ជាតិស្អិតនិងផ្អែម ។ អាហារដែលចូលទៅក្នុងមាត់ ក្នុងចន្លោះធ្មេញ មិនបានសម្អាតនឹងក្លាយទៅជាអាស៊ីត ហើយអាស៊ីតនេះហើយដែលធ្វើឱ្យធ្មេញពុកម្តងបន្តិចៗ រហូតដល់អស់ធ្មេញរហូតដល់ឬសធ្មេញក៏មានដែរ។
សូមរម្លឹកផងដែរថា ទន្តបណ្ឌិត ស៊ឺ សោមករា មានជំនាញព្យាបាលធ្មេញរាប់ឆ្នាំមកហើយ ជំនាញសំខាន់ៗដែលលោកទន្តបណ្ឌិតកំពុងបម្រើការមានដូចជា ជំនាញកែសម្ផស្សស្នាមញញឹម, ដាក់ធ្មេញសេរ៉ាមិច និងZirconia, ប៉ះធ្មេញដូចពណ៌ធ្មេញធម្មជាតិ និងព្យាបាល ដក វ៉ះកាត់ធ្មេញកប់ក្នុងឆ្អឹងផងដែរ។ ជាចុងក្រោយ បើអ្នកកំពុងមានធ្មេញពុកខូច កុំទុកឱ្យខ្លួនឯងមានក្លិនមាត់មិនល្អ មានបញ្ហាទៅថ្ងៃក្រោយ ជួបពិនិត្យជាមួយគ្រូពេទ្យឱ្យបានត្រឹមត្រូវ។ ពិនិត្យសុខភាពមាត់ធ្មេញម្តងអស់ត្រឹមតែ៤ម៉ឺនរៀលទៅ៨ម៉ឺនរៀលតែប៉ុណ្ណោះ សម្រាប់ការព្យាបាលវិញ តិចឬច្រើនទៅតាមស្ថានភាពធ្ងន់ឬស្រាលនៃធ្មេញរបស់អ្នក។ ព្យាបាលកាន់តែលឿន អស់លុយកាន់តែតិច បញ្ហាឬជំងឺផ្សេងៗក៏ព្យាបាលបានជាសះស្បើយលឿនដូចគ្នា៕
អត្ថបទដោយ៖ កញ្ញា លីហួយ
