មនុស្សជាច្រើនបានលើកឡើងថា អាហារពេលព្រឹកពិតជាសំខាន់បំផុតប្រចាំថ្ងៃ។ ប៉ុន្ដែតាមពិតទៅ អាហារពេលល្ងាចក៏សំខាន់ដែរ ស្របពេលមានមនុស្សមួយចំនួនសុខចិត្តមិនញ៉ាំអាហារ ក្រោមហេតុផលចង់រក្សារាង ឬជាប់រវល់ជាដើម។
យោងតាមវេបសាយសុខភាព Healthshots បានឱ្យដឹងថា ការមិនញ៉ាំអាហារពេលល្ងាច អាចជះឥទ្ធិពលអវិជ្ជមានដល់សុខភាព និងសុខុមាលភាពទូទៅរបស់អ្នក ដោយធ្វើឱ្យរាងកាយរបស់អ្នកបាត់បង់សារធាតុចិញ្ចឹមសំខាន់ៗ និងបណ្តាលឱ្យមានអតុល្យភាពនៃកម្រិតជាតិស្ករក្នុងឈាម។ ចំណុចសំខាន់ៗអំពីការមិនញ៉ាំអាហារពេលល្ងាចរួចមាន៖
១. ជាតិស្ករក្នុងឈាមទាប៖ នៅពេលអ្នកមិនញ៉ាំអាហារពេលល្ងាច កម្រិតជាតិស្ករក្នុងឈាមរបស់អ្នកធ្លាក់ចុះ បណ្តាលឱ្យអស់កម្លាំង វិលមុខ និងឆាប់ខឹង។
២. បញ្ហារំលាយអាហារ៖ របបអាហារមិនទៀងទាត់ អាចបង្កបញ្ហាដល់ប្រព័ន្ធរំលាយអាហាររបស់អ្នកដូចជា ហើមពោះ ទល់លាមក និងរមួលក្រពើ។
៣. កង្វះសារធាតុចិញ្ចឹម៖ រាងកាយរបស់អ្នក នឹងមិនទទួលបានសារធាតុចាំបាច់សម្រាប់ដំណើរការត្រឹមត្រូវ។ សារធាតុចញ្ចឹមសំខាន់ៗដែលអ្នកធ្វើឱ្យខ្វះនៅពេលមិនញ៉ាំអាហារពេលល្ងាចមាន វីតាមីន B complex ជាតិដែក កាល់ស្យូម ម៉ាញ៉េស្យូម ស័ង្កសី និងជាតិសរសៃ។
៤. ការប្រែប្រួលអ័រម៉ូន៖ ឥទ្ធិពលនៃការផ្លាស់ប្តូរអ័រម៉ូន ធ្វើឱ្យអ្នកមានអារម្មណ៍ស្រេកឃ្លាន និងចង់ញ៉ាំអាហារច្រើន ហើយអាចនាំឱ្យឡើងទម្ងន់។ ក្រៅពីនេះ វាក៏ធ្វើឱ្យអារម្មណ៍របស់អ្នកតានតឹងផងដែរ៕