យោងតាមវេបសាយសុខភាព Healthhub បានឱ្យដឹងថា ការធ្វើលំហាត់ប្រាណទៀងទាត់ និងរបបអាហារដែលមានសុខភាពល្អ អាចជួយគ្រប់គ្រងសម្ពាធឈាមតាមបែបធម្មជាតិ។ ចំពោះរបបអាហារដែលអ្នកជំងឺលើសឈាមគួរទទួលទានរួមមាន៖ 

១. អាហារសម្បូរជាតិសរសៃ៖ គ្រាប់ធញ្ញជាតិ ផ្លែឈើ និងបន្លែមានជាតិសរសៃខ្ពស់ រួមទាំងម៉ាញ៉េស្យូម និងប៉ូតាស្យូម ដែលជាអាហារមានអត្ថប្រយោជន៍កាត់បន្ថយសម្ពាធឈាម។

២. ជាតិខ្លាញ់របស់ត្រី៖ ត្រីដែលសម្បូរជាតិខ្លាញ់រួមមានត្រីសាម៉ុង ត្រីធូណា និងត្រីសាឌីនជាដើម។ ពួកវាមានប្រភពសម្បូរទៅដោយអាស៊ីតខ្លាញ់អូមេហ្គា៣ ដែលអាចជួយបន្ថយការរលាក និងសម្ពាធឈាម។ សូម្បីតែអាហារបំប៉នដែលចម្រាញ់ចេញពីខ្លាញ់ត្រី ក៏មានប្រសិទ្ធភាពផងដែរ។

៣. សាច់គ្មានជាតិខ្លាញ់៖ ខ្លាញ់សត្វ បង្កើនហានិភ័យនៃជំងឺសរសៃឈាម ដែលរួមចំណែកដល់សម្ពាធឈាមខ្ពស់។ ចំពោះសាច់មានជាតិខ្លាញ់ទាប នឹងជួយកាត់បន្ថយជាតិខ្លាញ់ឆ្អែត និងកូលេស្តេរ៉ុល។

៤. ទឹកដោះគោ៖ ការ​ផឹក​ទឹកដោះគោ​មាន​ជាតិ​ខ្លាញ់​តិច ឬ​គ្មាន​ជាតិ​ខ្លាញ់ អាច​ជួយ​បញ្ចុះ​សម្ពាធ​ឈាម។ ទឹកដោះគោមានសារធាតុចិញ្ចឹមដូចជា កាល់ស្យូម ម៉ាញេស្យូម និងប៉ូតាស្យូម ដែលអាចជួយរក្សាសម្ពាធឈាមឱ្យមានសុខភាពល្អ។

៥. កម្រិតជាតិខ្លាញ់៖ ជាតិខ្លាញ់ បានរួមចំណែកដល់ការលើសសម្ពាធឈាម។ ចូរជ្រើសរើសប្រេងដែលសម្បូរទៅដោយខ្លាញ់មិនឆ្អែត ដូចជាប្រេងអូលីវ ប្រេងផ្លែបឺរ ឬប្រេងកាណូឡាក្នុងកម្រិតមធ្យម៕