ការរៀបការគឺជារឿងសំខាន់ ហើយមនុស្សដែលអ្នករើសធ្វើជាគូជីវិតក៏រិតតែសំខាន់ដូចគ្នា ព្រោះជាមនុស្សដែលអ្នកត្រូវចំណាយពេលរស់នៅជាមួយពេញមួយជីវិត បើកាលណាអ្នករើសខុសនោះកន្លះជីវិតក្រោយ បន្ទាប់ពីរៀបការប្រាកដជាឥតន័យ។ ដូច្នេះបើអ្នកកំពុងតែលង់ស្រលាញ់បុរសម្នាក់ ដែលមានលក្ខណៈដូចខាងក្រោមនេះ សូមគិតឡើងវិញមុនសម្រេចចិត្តចាប់ផ្ដើមគ្រួសារជាមួយគ្នា៖
១. បុរសគ្មានឆន្ទៈ៖ បុរសដែលគ្មានឆន្ទៈប្រៀបដូចនឹងទូកគ្មានចង្វារ ដែលរសាត់តាមចរន្តទឹកដោយគ្មានទិសដៅ។ បុរសប្រភេទនេះប្រហែលជាស្រលាញ់អ្នកខ្លាំង ប៉ុន្តែនៅពេលប្រឈមមុខនឹងបញ្ហា ឬភាពលំបាកក្នុងជីវិត គាត់អាចងាយនឹងបោះបង់ ឬដេកត្អូញត្អែរជំនួសឱ្យការរកដំណោះស្រាយ។ នៅក្នុងជីវិតប្រចាំថ្ងៃ អ្នកនឹងក្លាយជាមនុស្សតែម្នាក់ដែលត្រូវស្ទុះស្ទារ រកប្រាក់ ថែទាំគ្រួសារ និងដោះស្រាយគ្រប់បញ្ហាទាំងអស់ ខណៈដៃគូរបស់អ្នកអង្គុយរងចាំតែគេជួយ។
២. បុរសចិត្តក្តៅ ចូលចិត្តប្រើហឹង្សារ៖ ប្រសិនបើអ្នកជួបបុរសដែលម្ដងត្រជាក់ម្ដងក្ដៅ នាំឈ្លោះព្រោះរឿងតូចតាច វាយអ្នក ឬបំផ្លាញ់របស់របរក្នុងផ្ទះ ហើយបន្ទាប់មកក៏សូមទោសអ្នក ហើយសន្យាថា «វានឹងមិនកើតឡើងទៀតទេ» អ្នកគួរតែពិចារណាឡើងវិញ ព្រោះការសិក្សាជាច្រើនបញ្ជាក់ថា អំពើហឹង្សាក្នុងគ្រួសារមិនអាច "ព្យាបាលដោយស្នេហា" បានទេ។ ស្នេហាមិនគួរមានការឈឺចាប់ ឬការភ័យខ្លាច បើគាត់ធ្លាប់វាយអ្នក ឬប្រើពាក្យសម្ដីបំពាន កុំសង្ឃឹមថាគាត់នឹងផ្លាស់ប្តូរ ហើយពាក្យសន្យាដែលគាត់ឱ្យអ្នកក៏អាចនឹងមានម្ដងហើយម្ដងទៀតនៅពេលអនាគត ជម្រើសល្អគួរតែចាកចេញទៅរកកន្លែងសុវត្ថិភាពសម្រាប់ខ្លួនឯង។
៣. បុរសដែលមិនរក្សាពាក្យសន្យា៖ សន្យាដែលមានត្រឹមពាក្យសម្ដី តែគាត់មិនដែលធ្វើបានតាមសន្យាសូម្បីម្ដង ប៉ុន្តែបន្តក្បត់ និងបោកប្រាស់ ម្ដងហើយម្ដងទៀត។ ការរស់នៅជាមួយមនុស្សប្រភេទនេះ គឺជាជីវិតដែលពោរពេញដោយការសង្ស័យ និងការបារម្ភ។ មនុស្សដែលមិនគោរពពាក្យសន្យា គឺជាមនុស្សដែលបំផ្លាញ “ជំនឿទុកចិត្ត” ដែលជាមូលដ្ឋាននៃចំណងអាពាហ៍ពិពាហ៍។ បើគាត់អាចបំពានសន្យាជាមួយមិត្តភក្តិ ឬការងារគាត់ គាត់ក៏អាចបំពានសន្យាជាមួយអ្នកដែរ។ ស្នេហាមិនអាចដើរទៅមុខបានទេបើគ្មានការជឿទុកចិត្ត កុំឱ្យពាក្យសន្យាដ៏ទន់ភ្លន់មកបំផ្លាញអនាគតអ្នក។
៤. បុរសដែលមានតែក្ដីសុបិន្ត តែមិនធ្វើ៖ ការដែលមានក្ដីសុបិន្តគឺជារឿងល្អហើយ ប៉ុន្តែបើអ្នកជួបបុរសដែលមានតែក្ដីសុបិន្តតែខ្វះសកម្មភាព ជីវិតជាមួយបុរសប្រភេទនេះ អ្នកនឹងត្រូវជាអ្នកសម្រេចគ្រប់យ៉ាង ខណៈដែលគាត់រស់តែជាមួយក្ដីសុបិន្ត មានតែពាក្យថាចាំ ស្អែកហើយស្អែកទៀតតែមិនព្រមធ្វើ។ ហើយនៅពេលអនាគតមិនបានដូចអ្វីដែលគាត់គិត គាត់នឹងបន្ទោសពិភពលោកថា "មិនយុត្តិធម៌"។ បុរសល្អ គាត់មិនត្រឹមតែមានក្ដីសុបិន្តទេ តែគាត់ធ្វើឱ្យសុបិន្តក្លាយជាការពិតដោយការ ខិតខំ ប្រើកម្លាំងញើសឈាមរបស់គាត់។
ស្ត្រីជាច្រើនគិតថា «ស្នេហាអាចផ្លាស់ប្តូរគេបាន» ប៉ុន្តែជីវិតពិតមិនដូចក្នុងរឿងទេ។ ស្នេហាគួរតែជាអ្វីដែលបង្កើនកម្លាំង និងសុភមង្គល មិនមែនជាអ្វីឱ្យអ្នកហត់នឿយគ្រប់ពេល ព្រួយបារម្ភគ្រប់គ្រប់ ឬសង្ស័យគ្រប់ពេលទេ។ សូមស្រឡាញ់ដោយចិត្ត ប៉ុន្តែរៀបការដោយហេតុផល៕
អត្ថបទដោយ៖ សារួ