ចំណុចទាំង៤នេះដែលអ្នកទាំងអស់គ្នាមិនគួររំលង ព្រោះបើអ្នកទាំងអស់គ្នាមិនដឹង ហើយលាងមុខមិនបានត្រឹមត្រូវ អាចធ្វើឱ្យមុខកាន់តែស្ងួត រន្ធរោមបើកកាន់តែធំ។
ក្នុងមូលដ្ឋានគ្រឹះនៃការថែស្បែកគឺមាន៣ ខ្ញុំជឿថាបងប្អូនភាគច្រើនបានដឹងហើយ ចាប់ផ្ដើមដំបូងបំផុតជាមួយការលាងមុខ លាបគ្រែមផ្ដល់សំណើម និងលាបឡេការពារកម្ដៅថ្ងៃ តែថ្ងៃនេះយើងនឹងមកនិយាយគ្នាតែពីការលាងមុខប៉ុណ្ណោះ។
ស្បែករបស់យើងត្រូវការលាងសម្អាតឱ្យស្អាត ដើម្បីកម្ចាត់បាតេរី ធូលីដី ជម្រះគ្រឿងMAKE UP និងជម្រុះកោសិកាខូចៗចេញពីមុខ។ ប៉ុន្តែប្រសិនបើយើងធ្វើការលាងមុខមិនបានត្រឹមត្រូវ វាអាចធ្វើឱ្យស្បែករបស់យើងកាន់តែស្ងួត ធ្វើឱ្យមើលឃើញរន្ធរោមច្បាស់ៗធំៗ ប្រសិនបើស្បែកមានមុន វាក៏អាចងាយឆ្លងមេរោគកើតមុនកាន់តែខ្លាំងបានផងដែរ។
ដើម្បីលាងសម្អាតស្បែកស្អាត ហើយមិនធ្វើឱ្យស្បែកស្ងួត យើងត្រូវដឹងចំណុចទាំងអស់នេះ ៖
ចំណុចទី១ គិតពីរយៈពេលលាង៖ មិនមែនថាត្រូវតែលាងមុខឱ្យស្អាត លាងមុខ ដោះមុខយូរពេក ៣នាទី ៥នាទី ឬក៏យូរជាងនេះ នៅមិនទាន់លុបមុខចេញទៀត មិនមែនជារឿងល្អសម្រាប់ស្បែកទេ ព្រោះវាអាចធ្វើឱ្យបាត់បង់ទាំងជាតិសំណើម និងប្រេងខ្លាំងពេក ធ្វើឱ្យស្បែកស្ងួតកាន់តែខ្លាំង។ រយៈពេលលាងមុខដែលល្អបំផុត ត្រឹម៥០ទៅ៦០វិនាទី គ្រប់គ្រាន់ហើយ។
ចំណុចទី២ កុំលាងមុខច្រើនដងពេក៖ បងប្អូនខ្លះ ជាពិសេសបងប្អូនដែលគាត់មានស្បែកប្រេង គាត់គិតថាលាងមុខឱ្យច្រើនដងអាចសម្អាត ជាតិប្រេងចេញពីស្បែកគាត់បាន។ ធម្មតាស្បែកយើងមានទាំងជាតិសំណើម និងជាតិប្រេងដែរជួយទប់ជាតិសំណើមឱ្យនៅបានយូរ តែពេលដែលយើងប្រឹងលាងវាចេញអស់ច្រើនដងពេក ពេលលាងរួច១នាទី២ នាទីដំបូងយើងឃើញស្អាតមែននឹង តែក្រោយពីនោះ មុខរបស់យើងនឹងឃើញឡើងប្រេងកាន់តែខ្លាំងជាងមុនទៀត កាន់តែធ្វើឱ្យងាយកក់ស្ទះរន្ធរោម ឃើញរន្ធរោមកាន់តែធំៗ បង្កជាមុនផ្សេងទៀត។ ក្នុង១ថ្ងៃគួរលាងមុខ ២ដង ល្អបំផុត តែបើករណីថាអ្នកទាំងអស់គ្នាចេញក្រៅម្ដងម្កាល រងកម្ដៅថ្ងៃ ឬធូលីដីច្រើនពេក ពេលថ្ងៃក៏អាចលាងមុខចេញបានដែរ។
ចំណុចទី៣ ពេលវេលាលាងមុខ ៖ ចំណុចមួយដែលបងប្អូនជាច្រើននៅតែឆ្ងល់ មតិខ្លះថាព្រឹកឡើងមិនបាច់លាងហ្វូមទេ លាងតែទឹកធម្មតាបានហើយ ចាំល្ងាចចាំលាងជាមួយនឹងហ្វូម។ រីឯមរិខ្លះទៀតថា អត់ទេព្រឹកក៏ត្រូវលាងហ្វូមដែរ បើមិនលាងបែបហ្នឹងទេកើតមុន។ ចម្លើយសម្រាប់ពីខ្ញុំ យល់ថាត្រូវទាំង២នឹង ដោយសារតែវាអាស្រ័យតាមស្ថានភាពស្បែករបស់បងប្អូនរៀងៗខ្លួនទេ។ ធម្មតាពេលយប់យើងលាបក្រែមផ្ដល់សំណើម មិនមានរងធូលីដីអីច្រើនទេ ចឹងវាជ្រាបចូលមុខអស់ព្រឹកឡើងយើងលាងតែទឹកក៏បានដែរ ប៉ុន្តែការលាងតែទឹកនេះ ខ្ញុំគិតថាវាល្អសម្រាប់អ្នកដែលគាត់មានស្បែកមុខស្ងួត និងធម្មតាតែប៉ុណ្ណោះ។
ឧទាហរណ៍ បទពិសោធន៍របស់ខ្ញុំផ្ទាល់ ស្បែកមុខរបស់ខ្ញុំជាប្រភេទស្បែកមុខចម្រុះ (ប្រេង&ស្ងួត) ព្រឹកឡើងពេលខ្លះខ្ញុំលាងតែទឹកធម្មតាទេ តែពេលខ្លះខ្ញុំក៏លាងហ្វូមដែរ មូលហេតុពេលខ្លះពេលយើងគេងអាកាសធាតុក្នុងបន្ទប់យើងរាងក្ដៅធ្វើឱ្យយើងបែបញើស ព្រឹកឡើងមកមុខរបស់យើងមើលទៅប្រេងច្រើម ហើយជាធម្មតាភួយខ្នើយ របស់យើងច្បាស់ជាមានធូលីដីខ្លះដែលយើងមើលមិនឃើញហេតុនេះដើម្បីបង្កាខ្លាចស្ទះរន្ធរោមឡើងមុន ខ្ញុំក៏លាងមុខជាមួយហ្វូម នៅថ្ងៃណាឃើញសង្កេតឃើញថាមុខរបស់ខ្ញុំមានឡើងប្រេងច្រើនជាងធម្មតា ប៉ុន្តែខ្ញុំប្រើពពួក Gental foam។
សរុបមកវិញ ព្រឹកឡើងគួរលាងហ្វូមឬមិនលាង សូមបងប្អូនសង្កេតមើលស្បែកមុខខ្លួនឯង តាមស្ថានភាពជាក់ស្ដែង។
ចំណុចទី៤ របៀបលាងមុខ៖ កុំប្រើដៃធ្ងន់ពេក គួរតែប្រើចុងម្រាមដៃម៉ាស្សាស្រាលៗ ជាពិសេសព្យាយាមលាងសម្អាតឱ្យបានល្អត្រង់ថ្ពាល់ ថ្ងាស់ និងច្រមុះ។ មួយចំណុចទៀតទាក់ទងនិងការលាងមុខ២តង់ (Double Cleansing) មិនមែនគ្រប់គ្នាសុទ្ធតែគួរលាងមុខ២តង់នោះទេ ជាទូទៅគេណែនាំសម្រាប់អ្នកដែលផាត់មុខជាប្រចាំ ប្រើ Physical Sunscreen មួយចំនួន ដែលហ្វូមធម្មតាមិនអាចលាងបានស្អាតល្អ និងអ្នកដែលមានស្បែកប្រេងខ្លាំងប៉ុណ្ណោះ ហើយសូមជ្រើសរើសឱ្យត្រូវតាមប្រភេទស្បែកផងដែរ៕
អត្ថបទដោយ៖ សេងហុង-Senghong