យោងតាមរយៈការចែករំលែករបស់វេជ្ជបណ្ឌិត ប៉ែន ចាន់រស្មី ឯកទេសជំងឺទូទៅជំងឺថ្លើម ក្រពះពោះវៀន នៅមន្ទីរពេទ្យ ព្រះកេតុមាលា វេជ្ជបណ្ឌិតបានបញ្ចប់ការសិក្សាកាលពីឆ្នាំ២០១៨ នៅសារធារណៈរដ្ឋសង្គមនិយមវៀតណាម ។ លោកវេជ្ជបណ្ឌិត បានប្រាប់មកក្រុមការងារចាបបៃតងទាក់ទងនិង រោគសញ្ញាជំងឺក្រិនថ្លើម ដោយបានបន្តថា ជាទូទៅជំងឺនេះមិនបានបញ្ចេញជារោគសញ្ញានៅដំណាក់កាលដំបូងឱ្យដឹងមុននោះទេ ហើយកម្រិតគ្រោះថ្នាក់ខ្លាំង ព្រោះភាគច្រើនអ្នកដែលកើតមានជំងឺក្រិនថ្លើមនេះ មកពេទ្យគឺចូលជាសញ្ញាធ្ងន់ហើយព្រោះអ្នកជំងឺមិនបានដឹង។

ពោលជំងឺក្រិនថ្លើម អាចបណ្ដាលឱ្យមានគ្រោះថ្នាក់ខ្លាំងដល់អាយុជីវិត ប្រសិនណាព្យាបាលមិនទាន់ពេលវេលា ឬក៏មកព្យាបាលនៅពេលស្ថានភាពជំងឺ បានវិវត្តិក្លាយជាកម្រិតធ្ងន់ធ្ងរទៅហើយ។

លោកវេជ្ជបណ្ឌិតបានបញ្ជាក់ប្រាប់ក្រុមការងារចាបបៃតងថា ជំងឺក្រិនថ្លើមធ្ងន់ធ្ងរបានចេញជារោគសញ្ញាឱ្យអ្នកជំងឺដឹង ហើយរោគសញ្ញាទាំងនោះមានដូចជា៖

-អស់កម្លាំងល្ហិតល្ហៃ

-ហូបអាហារមិនបាន ហូបមិនឆ្ញាញ់

-ស្រកគីឡូ

-ស្បែកនិងភ្នែកមានពណ៌លឿង

-ទឹកនោមប្រែជាពណ៌លឿងជាំ

-ធំពោះហើមពោះ

-ហើមដៃហើមជើង ឬហើមពេញខ្លួន

-បាតដៃអ្នកជំងឺមានពណ៌ក្រហម

-ងាយហូរឈាមជាងអ្នកធម្មតា

-ចេញស្នាមក្រហមដូចពីងពាង លើដងខ្លួន

-ស្វីតសាច់ដុំ ក្អួតឈាម

-លាមកមានលាយពណ៌ខ្មៅ ឬលាយឈាម

-វង្វេងវង្វាន់ ឬអាចសន្លាប់បាត់ស្មារតី

-រដូមិនទៀង សម្រាប់បុរសវិញ អាចខ្សោយផ្លូវភេទ សុដន់រីកធំខុសប្រក្រតី ពងស្វាស អាចរួមតូចបាន។

ចំពោះវិធីការពារជំងឺក្រិនថ្លើម លោកវេជ្ជបណ្ឌិតបានណែនាំដូចជា៖

-កុំផឹកគ្រឿងស្រវឹងលើសកំណត់ពេក

-កុំប្រើប្រាស់ថ្នាំគ្មានការណែនាំពីគ្រូពេទ្យជំនាញ។

ជាចុងក្រោយលោកវេជ្ជបណ្ឌិត ប៉ែន ចាន់រស្មី បានផ្ដាំផ្ញើថា ដើម្បីការពារថ្លើម ពីជំងឺផ្សេងៗ សម្រាប់អ្នកមិនទាន់មានអង់ទីគ័រការពារជំងឺថ្លើមប្រភេទបេ អាចទៅចាក់បានជាការល្អ ដើម្បីការពារមេរោគរលាកថ្លើមប្រភេទបេ មួយវិញទៀតការពិនិត្យសុខភាព រកមើលជំងឺថ្លើមប្រភេទបេគឺជារឿងល្អ ព្យាយាមកាត់បន្ថយគ្រឿងស្រវឹង លេបថ្នាំផ្ដេសផ្ដាស ក៏អាចកាត់បន្ថយហានិភ័យស្លាប់បាត់បង់ជីវិតដោយសារជំងឺថ្លើមដូចគ្នា ៕

អត្ថបទដោយ៖ ប៉ែត​ ធីតា