យោងតាមការណែនាំពីCDCអាមេរិកបានឱ្យដឹងថា កុមារតូចៗអាយុចាប់ពី៣ឆ្នាំដល់៥ឆ្នាំ ប៉ាម៉ាក់ត្រូវបង្រៀនកូនឱ្យមានសកម្មភាពបង្វឹកហាត់ចលនាឆ្អឹងដូចជា នាំកូនដើរឱ្យបានច្រើន នាំកូនរាំ ធ្វើលំហាត់ប្រាណឆ្អឹងឱ្យបាន១០ទៅ១៥នាទីរាល់ថ្ងៃដើម្បីឱ្យកូនស៊ាំជាមួសកម្មភាព។ បន្ទាប់មកនៅពេលកូនមានអាយុចាប់ពី៦ឆ្នាំឡើងទៅត្រូវទម្លាប់ឱ្យកូនហាត់ប្រាណដើម្បីសុខភាពឆ្អឹង ជំរុញឱ្យឆ្អឹងលូតលឿន ឆាប់ធំ។

ជាការពិតណាស់ យោងតាមការបញ្ជាក់គេហទំព័រ verywellfamily វេជ្ជបណ្ឌិត Duc P. Vo,M.D ឯកទេសផ្នែកឆ្អឹងបាននិយាយថា កុមារលូតកម្ពស់បានខ្ពស់ ឆ្អឹងវែងឬឆ្អឹងខ្លី អាស្រ័យទៅលើកត្តាជាច្រើនដូចជា ហ្សែនរបស់ប៉ាម៉ាក់ របបអាហារបស់ម៉ាក់ពេលពពោះ របបអាហារប្រចាំថ្ងៃរបស់កូន និងទម្លាប់ប្រចាំថ្ងៃដែលប៉ាម៉ាក់បានបង្រៀន។ កុមារដែលមានអាយុចាប់ពី៣ឆ្នាំឡើងទៅ គឺជាវ័យមួយដែលឆ្អឹងគ្រប់សារពាង្គកាយទាំងឆ្អឹងខ្នង ឆ្អឹងជើង ឆ្អឹងដៃ ត្រូវការលូតលាស់ខ្លាំង។ វិធីជំនួយដើម្បីឱ្យឆ្អឹងរបស់កុមារលូតលាស់បានលឿន ខ្ពស់ រឹងមាំ មិនក្រិន ឆាប់ធំមុនអាយុ គឺការហាត់ប្រាណ។ ខាងក្រោមនេះជាលំហាត់ប្រាណ៥ល្អបំផុតជួយពន្លូតឆ្អឹងរបស់កុមារ៖

១. ក្បាច់ឆ្អឹងខ្នង(cat-cow)៖ នេះជាលំហាត់ប្រាណដែលផ្តោតទៅលើឆ្អឹងខ្នងរបស់កុមារ ជួយឱ្យឆ្អឹងលាតសន្ធឹងបានល្អ លូតលាស់បានលឿន។ របៀបហាត់១៖ ដំបូងលុតជង្គង់ ច្រាត់ដៃទាំង២ទៅមុខ លាឆ្អឹងខ្នងឱ្យត្រង់ លាកំភួនជើងទៅក្រោយឱ្យត្រង់ដូចគ្នា រួចងើបក្បាលទៅលើ(ធ្វើបែបនេះដដែលរាប់ពីមួយដល់១០)។ របៀបទី២៖ លុតជង្គង់ ច្រាត់ដៃទាំង២ទៅមុខ លាកំភួនជើងទៅក្រោយ រួចសំកោកខ្នងឡើងចុះ(ដូចឆ្មារ) ធ្វើបែបនេះដដែលរាប់ពី១ដល់១០។

២. ក្បាច់ក្បាល៖ ក្បាច់ផ្តោតទៅលើចលនាឆ្អឹងផ្នែកក្បាល និងក សំខាន់បំផុតសម្រាប់កុមារ។ របៀបហាត់៖ ដំបូងត្រូវឈរឱ្យត្រង់ខ្លួន ដាក់ជើងទាំង២ទន្ទឹមគ្នា រួចលើកដៃទាំង២ឡើងទៅលើ ពត់ទៅឆ្វេង ពត់ទៅស្តាំ រាប់ពី១ដល់១០។

៣. ក្បាច់ស្មារ៖ ក្បាច់នេះផ្តោតសំខាន់ទៅលើឆ្អឹងស្មារ និងឆ្អឹងដៃ ។ របៀបហាត់៖ ឈរឱ្យត្រង់ខ្លួន បត់ដៃស្តាំទៅឆ្វេង រួចយកដៃឆ្វេងទ្រពីក្រោម(ធ្វើបែបនេះរាប់ពី១ដល់១០)។ បន្ទាប់មកបត់ដៃឆ្វេងទៅស្តាំយកដៃស្តាំទ្រពីក្រោម(ធ្វើបែបនេះរាប់ពី១ដល់១០)។

៤. ក្បាច់ជង្គង់៖ ក្បាច់ជង្គង់ផ្តោតទៅលើការលូតលាស់របស់ឆ្អឹងសន្លាក់ផ្នែកជង្គង់។ របៀបហាត់៖ លុតជង្គង់ជើងស្តាំ រួចបញ្ឈជើងឆ្វេងទៅមុខ(ធ្វើបែបនេះ១០ដង)។ បន្ទាប់មក លុតជង្គង់ជើងឆ្វេង បញ្ឈជើងស្តាំ(ធ្វើបែបនេះ១០ដង)។

៥. ក្បាច់កំភួនជើង៖ របៀបហាត់៖ អង្គុយឱ្យត្រង់ខ្លួន លាជើងស្តាំទៅមុខឱ្យត្រង់ រួចយកក្រមាមកទាញប្រអប់ជើងស្តាំដូចរូប រាប់ពី១ដល់១០សឹមឈប់។ ធ្វើជើងឆ្វេងដូចជើងស្តាំដែរ។

សរុបមកលំហាត់ប្រាណទាំង៥ក្បាច់ប៉ាម៉ាក់ដែលមានកូនចាប់ពីអាយុ៦ឆ្នាំឡើងទៅគួរឱ្យកូនហាត់ឱ្យបានរាល់ថ្ងៃ ដើម្បីសុខភាពឆ្អឹងរបស់កូនលូតលាស់លឿន រឹងមាំ កូនឆាប់ធំមុនអាយុ៕

អត្ថបទដោយ៖ គន្ធា