មិនមែនតែមនុស្សធំ មនុស្សចាស់នោះទេ សូម្បីកុមារតូចៗក៏អាចមានបញ្ហាផ្លូវចិត្តបានផងដែរ។ បញ្ហាផ្លូវចិត្តអាចធ្វើឱ្យប៉ះពាល់ដល់សុខភាពរាងកាយ អាកប្បកិរិយា ការសិក្សា និងការលូតលាស់របស់ពួកគេ។ បញ្ហាផ្លូវចិត្តរបស់កុមារអាចកើតឡើងដោយសារមជ្ឈដ្ឋានរស់នៅ រឿងដែលប៉ះទង្គិចផ្លូវចិត្តម្ដងបន្តិចៗរាល់ថ្ងៃ ពីឳពុកម្ដាយ មិត្តភក្តិ ឬសាលារៀនជាដើម។ បើមិនចង់ឱ្យកូនរបស់អ្នកមានបញ្ហាផ្លូវចិត្តទាំងក្មេង ក្លាយជាក្មេងដែលគ្មានភាពក្លាហាន ខ្លាចគេ បាក់ស្បាត ទន់ខ្សោយ ជារឿងចាំបាច់បំផុតដែលឳពុកម្ដាយត្រូវសង្កេតអាការសុខភាពផ្លូវចិត្តរបស់កូនជារៀងរាល់ថ្ងៃ។

ផ្អែកតាមគេហទំព័រ Healthshots បានឱ្យដឹងពីសញ្ញាសំខាន់ៗបង្ហាញពីផ្លូវចិត្តរបស់ក្មេង អាណាព្យាបាលត្រូវសង្កេតជាដាច់ខាត៖

១ ព្យាយាមផ្ដាច់ខ្លួន៖ ប្រសិនបើអ្នកសង្កេតឃើញកូនរបស់អ្នកព្យាយាមនៅឆ្ងាយពីក្រុមគ្រួសារ មិត្តភក្តិ មិនចង់ចេញក្រៅ ចូលចិត្តនៅស្ងាត់ម្នាក់ឯង ខុសពីធម្មតា អ្នកគួរតែព្យាយាមចូលជិត ព្យាយាមនិយាយជាមួយពួកគេ។ ធ្វើឱ្យពួកគេមានអារម្មណ៍ថាជឿទុកចិត្តលើអ្នក បើកចិត្តនិយាយ និងមានអារម្មណ៍ថាសុវត្ថិភាព។

២ ថប់អារម្មណ៍៖ ប្រសិនបើកូនរបស់អ្នកមើលទៅមានការព្រួយបារម្ភខ្លាំងពេក និងមានអារម្មណ៍តានតឹង បាត់បង់ការគិតញឹកញាប់បំផុត ឬភ័យខ្លាច វាមានន័យថាពួកគេកំពុងតស៊ូដើម្បីដោះស្រាយអារម្មណ៍របស់ពួកគេ ឬក៏ព្យាយាមគេចពីអ្វីមួយដែលប៉ះពាល់ផ្លូវចិត្តរបស់ពួកគេ។

៣ ឆាប់ខឹង៖ សង្កេតឃើញពួកគេឆាប់ខឹង បញ្ចេញកំហឹងខ្លាំងភ្លាមៗ ឬមានកំហឹងជាមួយក្រុមគ្រួសារជាញឹកញាប់ ជាសញ្ញាដែលឳពុកម្ដាយពុំគួរមើលរំលងទេ។ គួរព្យាយាមដោះស្រាយបែបត្រជាក់ បែបស្ងប់ ជាមួយពួកគេ កុំបន្ថែមកំហឹងនឹងធ្វើឱ្យផ្លូវចិត្តក្មេងកាន់តែធ្ងន់ធ្ងរខ្លាំង។

៤ ខ្វះការផ្ដោតអារម្មណ៍៖ អាចសង្កេតមើលការសិក្សា ការលេង មើលទៅហាក់ដូចជាពួកគេពិបាកនិងផ្ដោតអារម្មណ៍នឹងធ្វើអ្វីមួយឱ្យសម្រេចបាន។

៥ សកម្មភាពរាងកាយផ្លាស់ប្តូរ៖ ឈឺពោះញឹកញាប់ ឈឺក្បាល ក្អួត ឬពួកគេតែងតែត្អូញពីការឈឺចាប់ផ្សេងៗទៀតលើរាងកាយ សូម្បីតែពួកគេនោមដាក់កន្លែងគេងញឹកញាប់ បៀមមេដៃជាប្រចាំ សុទ្ធតែជាសញ្ញាត្រូវសង្កេត។

៦ មិនសូវមានទំនាក់ទំនង៖ កូនមិនសូវនិយាយ ចាប់ផ្ដើមយំ ចាប់ផ្ដើមខឹង ពេលដែលអ្នកព្យាយាមនិយាយជាមួយពួកគេ មិនរីករាយដូចមុន។

ជារួមមកទាំងនេះជាសញ្ញាខ្លះៗ ដែលឳពុកម្ដាយ គួរតាមដានជាប្រចាំថ្ងៃ។ ករណីសង្កេតឃើញកូនរបស់អ្នកខុសធម្មតា គួរតែព្យាយាមចូលជិតពួកគេ ដោយសន្តិវិធី កុំធ្វើឱ្យពួកគេខ្លាច។ ម្យ៉ាងវិញទៀត អ្នកក៏គួរនាំពួកគេទៅជួបគ្រួពេទ្យជំនាញ ដើម្បីចៀសវាងទុកកូនឱ្យមានបញ្ហាសុខភាពកាន់តែធ្ងន់ធ្ងរ៕

អត្ថបទដោយ​៖ Senghong