មានមតិផ្ទុយគ្នាខ្លះបានលើកឡើង រវាងគុណសម្បត្តិ និងគុណវិបត្តិ នៃទម្លាប់ទំពារស្ករកៅស៊ូជាប្រចាំអាចប៉ះពាល់ទៅដល់សុខភាពធ្មេញ ពីព្រោះថា ស្ករកៅស៊ូមានផ្ទុកទៅដោយជាតិផ្អែមដែលបណ្ដាលឱ្យធ្មេញងាយពុកខូច ខណៈពេលដែលមតិផ្សេងទៀតហើយបានបង្ហាញថា ស្ករកៅស៊ូមានអត្ថប្រយោជន៍ពិសេសក្នុងការជួយសម្អាតមាត់ធ្មេញ កាត់បន្ថយភាពតានតឹងថែមទៀត។

យ៉ាងណាមិញ ផ្សារភ្ជាប់ជាមួយនឹងគំនិតចោទមានខាងលើ បើផ្អែកទៅតាមប្រភពចេញ Today’s Dentel បានលើកឡើងបង្ហាញពីគុណសម្បត្តិចម្បងៗ ដែលស្ករកៅស៊ូអាចជួយដល់សុខភាពមាត់ធ្មេញអ្នកទទួលទានបាន៖

១. កាត់បន្ថយបាក់តេរី៖ ស្ករកៅស៊ូដែលមិនមានជាតិស្ករ គឺអាចជួយកាត់បន្ថយនូវបាក់តេរីដែលមាននៅក្នុងមាត់ មិនបណ្ដាលឱ្យធ្មេញងាយពុកប្រហោង និងជួយការពារអញ្ចាញធ្មេញ។

២. មានសារធាតុxylitol៖ សារធាតុមានតួនាទីសំខាន់ក្នុងការសម្លាប់បាក់តេរី និងការពារការពុកធ្មេញរហូតដល់ ៩០%។ ទន្ទឹមនឹងនេះទៀតសោត វាថែមទាំងជួយបង្កើតសារធាតុរ៉ែការពារក្នុងស្រទាប់ធ្មេញទៀតផង។

៣. ជួយសម្អាតកាកសំណល់អាហារ៖ ការទំពារស្ករកៅស៊ូ បន្ទាប់ពីញុំាអាហាររួច វាអាចជួយទាញយកកាកសំណល់អាហារដែលតោងជាប់នៅចន្លោះធ្មេញ និងកាត់បន្ថយការឡើងកំបោរធ្មេញដូចគ្នា។

៤. បំបាត់មាត់ស្ងួត៖ ការទំពារស្ករកៅស៊ូ មិនត្រឹមតែអាចជួយបន្ថយមេរោគបាក់តេរីមាត់ទេ វាក៏មានសមត្ថភាពបន្ថែមក្នុងការជួយកុំឱ្យមាត់ស្ងួតផងដែរ ពីព្រោះថា មូលហេតុចម្បងនៃមាត់ស្ងួតដែលផលិតទឹកមាត់មិនគ្រប់គ្រាន់ ដូច្នេះ ស្ករកៅស៊ូ ជួយបង្កើតទឹកមាត់ច្រើន នឹងថែមទាំងអាចបន្សាបជាតិអាស៊ីតនៅក្នុងមាត់។

ប្រភពដដែលក៏បានបន្ថែមដែរថា ការទំពារស្ករកៅស៊ូជាប្រចាំថ្ងៃនេះ អាចមានអត្ថប្រយោជន៍ផ្សេងៗទៀតដូចជា បង្កើនការចងចាំ ស្រកទម្ងន់ ធ្វើឱ្យខ្យល់ដង្ហើមស្រស់ថ្លា លើសពីនេះ ចំពោះបុគ្គលដែលចង់ឈប់បារី ការជ្រើសរើសស្ករកៅស៊ូមកទំពារជាប្រចាំ គឺជាវិធីសាស្ត្រមួយជួយឱ្យផ្តាច់បារីបានលឿនផងដែរ។ ដោយឡែក ការញុំាស្ករកៅស៊ូពិតជាជួយដល់បញ្ហាមាត់ធ្មេញក៏ពិតមែន ក៏ប៉ុន្តែក្នុងលក្ខខណ្ឌនេះ បងប្អូនគួរជ្រើសរើសនូវប្រភេទស្ករកៅស៊ូណាដែលមានកម្រិតជាតិស្ករតិច និងគួរមានទម្លាប់ថែរក្សាមាត់ធ្មេញជាប្រចាំដោយការប្រើវិធីសាស្ត្រដុះសម្អាតឱ្យបានត្រឹមត្រូវ។ ហើយជាការលើកទឹកចិត្តបន្ថែមបងប្អូន គួរតែទៅពិនិត្យសុខភាពមាត់ធ្មេញជាមួយនឹងទន្តពេទ្យយ៉ាងណាស់កន្លះឆ្នាំម្តង​ ដើម្បីពិនិត្យមើលពីបញ្ហាសុខភាពមាត់ធ្មេញទូទៅ ចៀសវាងកើតបញ្ហាត្រូវព្យាបាលក្នុងកម្រិតធ្ងន់ធ្ងរណាមួយដែលនឹងកើតមានឡើយជាយថាហេតុ៕

 អត្ថបទដោយ៖ ប៉ែត ធីតា