១. ការញ៉ាំគ្រាប់ Walnut មានផ្ទុកជាតិអាស៊ីតខ្លាញ់អូមេហ្គា ៣ច្រើន មានសារធាតុប្រឆាំងអុកស៊ីតកម្មជួយការពារការរលាក និងជំរុញសុខភាពខួរក្បាលឱ្យស្ងប់។ ព្រោះវាមានសារធាតុប្រូតេអ៊ីន មានជាតិសរសៃ និងសមាសធាតុរុក្ខជាតិនៅក្នុងគ្រាប់ Walnut ដែលមានប្រយោជន៍សម្រាប់សុខភាពទូទៅឱ្យអ្នកឆាប់គេងលក់ស្រួល។

២. ត្រីដែលមានជាតិខ្លាញ់ល្អសម្រាប់ឱ្យអ្នកគេងលក់ស្រួលនោះ មានដូចជា ត្រីសាលម៉ុន ត្រីសាឌីន និងត្រីធូណា សុទ្ធតែផ្តល់អាស៊ីតខ្លាញ់អូមេហ្គា៣ រួមទាំងមានជាតិអាស៊ីតអ៊ីកូសាប៉ង់តាអ៊ីណូអ៊ីក (EPA) និងអាស៊ីតដូកូសាហិចហ្សាអ៊ីណូអ៊ីក (DHA) ដែលមានគុណសម្បត្តិប្រឆាំងការរលាកស្រោមខួរក្បាល ឱ្យខួរក្បាលអ្នកស្ងប់មុនចូលគេង។

៣. អយស្ទ័រ​ជាមុខម្ហូបដ៏ពេញនិយមមួយមិនត្រឹមតែជួយសុខភាពផ្លូវភេទទេ ថែមទាំងជួយឱ្យអ្នកឆាប់គេងផងដែរ។ ព្រោះវាសម្បូរជាតិ​អូមេហ្គា ៣ វីតាមីន B12 និង​ស័ង្កសី​ដើម្បីធ្វើឱ្យខួរក្បាលរបស់អ្នកស្ងប់។

៤. សណ្តែកសៀងជប៉ុន (edamame) ជាសណ្តែកសៀងសម្បូរទៅដោយអាស៊ីតខ្លាញ់អូមេហ្គា៣ មានជាតិប្រូតេអ៊ីន មានជាតិសរសៃ និងសារធាតុចិញ្ចឹមរុក្ខជាតិយ៉ាងច្រើនដល់ខួរក្បាលដើម្បីឱ្យអ្នកគេងលក់លឿនជាងមុន។

៥. សារ៉ាយសមុទ្រមានជីវជាតិខ្ពស់ រួមទាំងប្រភពដ៏សម្បូរបែបនៃអាស៊ីតខ្លាញ់អូមេហ្គា៣ ហើយសម្បូរទៅដោយប្រូតេអ៊ីនដែលជួយជម្រុញអារម្មណ៍អ្នកឆាប់ងងុយ។

អ្នកគួរហូបអាហារនេះឱ្យបានមុនម៉ោង៩ ឬមុនចូលគេងចំនួន ២ម៉ោងដើម្បីឱ្យអាហារនេះរលាយបានល្អ។ ហើយអ្នកគួរឆ្លៀតធ្វើលំហាត់ប្រាណ សមាធិមុនចូលគេង ១០នាទី អ្នកគេងលក់កាន់តែលឿនជាងពេលធម្មតាផងដែរ៕ អត្ថបទដោយ៖ ទ្រ សុភាព