អាចនិយាយបានថាអាហារក៏អាចជាអាវុធមុខ២ដែរ នៅពេលដែលយើងញុំាត្រូវគឺជួយទ្រទ្រង់រាងកាយ ប៉ុន្តែនៅពេលយើងញុំាខុស ទៅជាបង្កបង្កើតជាជំងឺជាច្រើនមុខវិញបាន។
បងប្អូនយើងភាគច្រើនគឺផ្តោតថាអាហារដែលមានជាតិគីមីគឺបង្កបញ្ហាដល់សុខភាព ប៉ុន្តែមិនមែនមានតែរឿងមួយនេះទេ គឺពាក់ព័ន្ធនឹងរសជាតិ កម្រិតគ្រឿងទេសដែលជាទម្លាប់ទទួលទានប្រចាំថ្ងៃរបស់បងប្អូនក៏អាចបង្កជាជំងឺរុំារ៉ៃពេលវ័យច្រើនបន្តិចដែរ។
តាមការឱ្យដឹងពីអង្គការសុខភាពពិភពលោកបានឱ្យដឹងថា ការបរិភោគអាហារដែលមានរសជាតិ ប្រៃពេក និងផ្អែមពេក អាចនាំឱ្យកើតជំងឺរុំារ៉ៃ បានពិសេសជំងឺធ្ងន់ៗ មហារីក ជំងឺលើបេះដូង ជំងឺទឹកនោមផ្អែម ជំងឺដាច់សរសៃឈាមខួរកក្បាលជាដើម។
ដើម្បីកាត់បន្ថយកម្រិតជាតិប្រៃនិងផ្អែមបងប្អូនអាចត្រូវបង្កើនការប្រុងប្រយ័ត្នលើភេសជ្ជៈ អាហារកែច្នៃ ហើយត្រូវពិនិត្យកម្រិតសារជាតិនីមួយៗលើផលិតផលដែលបងប្អូនទទួលទានឬប្រើប្រាស់។ពិសេសបងប្អូនគួរព្យាយាមទទួលទានអាហារដែលចម្អិនដោយខ្លួនឯងហើយ ព្យាយាមប្រើកម្រិតរសជាតិឱ្យសមល្មម និងកាត់បន្ថយចានទឹកជ្រលក់ ឬទឹកត្រី ការថែមស្ករ ថែមទឹកដោះគោ លើអាហារឬបង្អែមដែលបងប្អូនទម្លាប់ទទួលទានទានញឹក។
ចំពោះកម្រិតជាតស្ករបងប្អូនអាចទទួលទានកម្រិតសមល្មមក្នុងមួយថ្ងៃគឺ ៥ក្រាមឬតិចជាងនេះ ក្នុងមួយថ្ងៃ ឯស្ករគឺពី ៦ទៅ៩ស្លាបព្រា ឬពី២៦ក្រាមទៅ៣៦ក្រាមក្នុងមួយថ្ងៃដោយមិនលើសពីនេះឡើយ ហើយក្មេងអាយុកាន់តែតិចអាចព្យាយាមបន្ថយចំនួនបន្ថែមទៀតកាន់តែល្អ។
គួរកត់សម្គាល់ដែរថាសម្រាប់ការប្រើប្រាស់ស្ករសូមបងប្អូនព្យាយាមចៀសស្ករកែច្នៃឱ្យបានច្រើន ហើយប្រើស្ករបែបធម្មជាតិ និងផលិតត្រឹមត្រូវតាមស្ដង់ដារសុខភាពវិញ។
តើគួរទទួលទានទម្រង់អាហាររបៀបណាដើម្បីសុខភាពល្អមិនងាយកើតជំងឺ?
តាមបង្ហាញរបស់ប្រភពដដែលបានផ្ដល់ជាក្បួនរៀបចំអាហារដើម្បីទទួលទានឱ្យមានប្រសិទ្ធភាពល្អដូចជា៖
-រាល់ពេលទទួលទានអាហារត្រូវមានបន្លែទទួលទានអមជាមួយ
-អាហារសម្រន់បើមានជាផ្លែឈើឬបន្លែស្រស់កាន់តែល្អ
-បន្លែឬផ្លែឈើត្រូវញុំាឱ្យត្រូវតាមរដូវ ផ្លែផ្ការបស់វា ព្រោះអាហារដែលផ្លែផ្កាត្រូវតាមរដូវគឺល្អសម្រាប់សុខភាពណាស់ ហើយត្រូវទទួលទានចម្រុះគ្នាជានិច្ច ទាំងពណ៌ និងប្រភេទនីមួយៗ
-កាត់បន្ថយអាហារដែលមានខ្លាញ់មិនល្អ ការចម្អិតជាមួយខ្លាញ់ មកជាស្ងោរឬចំហុយវិញជាដើម
មួយវិញទៀតសូមបងប្អូនត្រូវតែប្រយ័ត្នចំពោះរសជាតិដិតៗពេក ទោះបីពេលខ្លះវាត្រូវមាត់របស់បងប្អូន និងធ្វើឱ្យមានរសជាតិឆ្ញាញ់យ៉ាងណាត្រូវព្យាយាមកាត់បន្ថយបន្តិចម្ដងៗ ហើយសូមគិតដល់ថ្ងៃមុខ ដែលនឹងប្រឈមបញ្ហាសុខភាពច្រើនមុខ លេបថ្នាំជំនួសអាហាររាល់ថ្ងៃវិញបាន។