ការជ្រើសរើសទឹកដោះគោ សម្រាប់ទទួលទានជាប្រចាំ ពិតជាសំខាន់ខ្លាំងណាស់ ខណៈនៅក្នុងទឹកដោះគោនេះមានផ្ទុក ទៅដោយសារជាតិពិសេសៗជាច្រើនដូចជា កាល់ស្យូម ប៉ូតាស្យូម ប្រូតេអ៊ីន នីអាស៊ីន វីតាមីន D សារជាតិខ្លាញ់ឆ្អែត និងវីតាមីនK ២ ដែលចាំបាច់បំផុតសម្រាប់ការថែរក្សាឆ្អឹង ធ្មេញឱ្យបានរឹង ខួរក្បាល និងចរន្តឈាមរត់ផងដែរ។

ដោយឡែកប្រសិនបើបងប្អូនក្រឡេកទៅមើលពីប្រភេទទឹកដោះគោដែលបានដាក់លក់នៅលើទីផ្សារ គឺមានច្រើនបែបច្រើនសណ្ឋាន ដោយអ្នកផលិតបង្កើតឡើងសម្រាប់បំពេញតម្រូវសុខភាពរបស់មនុស្សម្នាក់ ដើម្បីទទួលបាននូវសារធាតុចិញ្ចឹមឱ្យមានតុល្យភាពនៅក្នុងរាងកាយ។ តួយ៉ាង បើផ្អែកទៅតាមការចុះផ្សាយរបស់គេហទំព័រ USNews បានឱ្យដឹងថា ចំពោះទឹកដោះគោដែលគេដាក់លក់នៅលើទីផ្សារ អាចមានភាគរយនៃសារធាតុចិញ្ចឹមផ្សេងៗគ្នាដោយហេតុថា៖

១. ទឹកដោះគោសុទ្ធ៖ នៅក្នុងទឹកដោះគោ មានទឹកប្រហែល ៨៨%, ជាតិឡាក់តូស (lactose) ៥%, ខ្លាញ់ ៣% ប្រូតេអ៊ីន ៣% និងបរិមាណសារធាតុរ៉ែដ៏ល្អនៃប៉ូតាស្យូម និងផូស្វ័រ។ ចំពោះទឹកដោះគោប្រភេទនេះ គឺល្អបំផុតសម្រាប់សុខភាពក្មេងកំពុងលូតលាស់ ដើម្បីជួយទៅដល់ការលូតលាស់ឆ្អឹង មុខងារសាច់ដុំ nigដើរតួនាទីក្នុងការបញ្ចុះសម្ពាធឈាម។

២. ទឹកដោះគោមានជាតិខ្លាញ់ទាប៖ ការ​ញ៉ាំ​ទឹកដោះគោ​មាន​ជាតិ​ខ្លាញ់​ទាប ៨ អោន ផ្តល់នូវកម្រិតកាឡូរី ១០០កាឡូរី និង​ខ្លាញ់ ២,៥ក្រាម។ ទឹកដោះគោ មានជាតិខ្លាញ់ទាបមានប្រូតេអ៊ីនច្រើនជាងទឹកដោះគោសុទ្ធ និងមានជាតិកាល់ស្យូម ជាមួយនឹងវីតាមីន D ច្រើនជាងទឹកដោះគោសសុទ្ធ ប៉ុន្តែអាស៊ីតខ្លាញ់អូមេហ្គា ៣ គឺមានបរិមាណតិចជាង។ ចំពោះទឹកដោះមានជាតិខ្លាញ់ទាប គឺល្អបំផុតសម្រាប់អ្នកសម្រកទម្ងន់ ប៉ុន្តែសម្រាប់បុគ្គលដែលកំពុងជួបបញ្ហាមុខខ្លាញ់ងាយឡើងមុន សុំកុំជ្រើសយកទឹកដោះគោប្រភេទនេះសម្រាប់ទទួលទានជាប្រចាំពីព្រោះវាអាចបង្កឱ្យមុខឡើងមុនថែម។

៣. ទឹកដោះគោគ្មានប្រូតេអ៊ីន A1 beta casein៖ ទឹកដោះគោជាធម្មតាមានទាំងប្រូតេអ៊ីន A1 និង A2 beta casein ដែលជាប្រូតេអ៊ីន casein ដ៏សំខាន់។ Casein បង្កើតបានប្រហែល ៨០% នៃប្រូតេអ៊ីនសរុបនៅក្នុងទឹកដោះគោ។ ការស្រាវជ្រាវមួយចំនួនបានបង្ហាញថា A1 beta casein អាចត្រូវបានផ្សារភ្ជាប់ជាមួយនឹងភ្នាក់ងាររលាកដែលរួមចំណែកអាចប៉ះពាល់ទៅដល់បញ្ហាក្រពះពោះវៀន។ ដូច្នេះចំពោះអ្នកដែលងាយរងជួបនឹងបញ្ហាសុខភាពក្រពះពោះវៀន អាចជ្រើសយកជាប្រភេទទឹកដោះគោដែលគ្មានជាតិប្រូតេអ៊ីន A1 beta casein បាន។

ជារួមមកវិញ នៅក្នុងរឿងរ៉ាវនៃការទទួលទានទឹកដោះគោនេះ បងប្អូនគួរណាស់ស្វែងយល់ឱ្យបានច្បាស់ មុននឹងជ្រើសយកប្រភេទទឹកដោះគោណាមួយមកទទួលទានជាប្រចាំ ពីព្រោះថាសុខភាពរបស់មនុស្សម្នាក់ៗរមែងជួបប្រទះទៅនឹងជំងឺផ្សេងៗគ្នា។ ហេតុនេះហើយ របបអាហារនាសម័យថ្មីដែលត្រូវបានគេផលិតដាក់លក់នៅលើទីផ្សារសព្វថ្ងៃនេះ គឺតម្រូវទៅតាមសុខភាពរបស់មនុស្សនីមួយៗ៕