រមួលក្រពើ ជាការរមួលសាច់ដុំ សំដៅលើសាច់ដុំរមួលកំភួនជើង កើតមានឡើងនៅពេលយប់ ត្រូវគេហៅថា Nocturnal leg cramps ជាបញ្ហារមួលក្រពើពេលយប់ ។ ការរមួលនេះ តែងតែធ្វើឲ្យយើងភ្ញាក់ពីគេងភ្លាមៗ ហើយការរមួលកើតឡើងគ្រប់ពេល ទាំងយើងមិនបានធ្វើសកម្មភាពក៏ដោយ។ ក្រៅពីរមួលសាច់ដុំនៅកំភួនជើង ក៏អាចកើតមាននៅភ្លៅ ឬបាតជើងដូចគ្នា ដែលការកន្រ្តាក់សាច់ដុំ គឺឈឺចាប់ខ្លាំង អាចបណ្តាលឲ្យសាច់ដុំរងផលប៉ះពាល់ ធ្វើឲ្យយើងមានអារម្មណ៍ថាតឹង ឈឺ ឬដូចមាននរណាកំពុងមួលជើងយើង។ អាការៈ អាចមានរយៈពេលច្រើនវិនាទី ទៅច្រើននាទី ហើយភាគច្រើនកើតលើមនុស្សចាស់ អាយុលើសពី ៥០ ឆ្នាំ ប៉ុន្តែក៏អាចកើតមានលើមនុស្សពេញវ័យ និងក្មេងដែរ។
ទោះបីជាបញ្ហានេះមិនមែនជាជំងឺចម្បងដែលគួរឲ្យព្រួយបារម្ភក៏ពិតមែន ប៉ុន្តែពេលដែលវារមួលម្ដងៗគឺធ្វើឲ្យជើងរបស់ជើងឈឺចុកចាប់ជាខ្លាំង។ ដូច្នេះដើម្បីជាការចែករំលែកដល់អ្នកដែលតែងតែជួបបញ្ហានេះដោយផ្អែកលើប្រភពវែបសាយ geelongmedicalgroup ចាបបៃតងនឹងលើកយកវិធីសាស្រ្ដមួយចំនួនដែលអាចជួយព្យាបាលការរមួលក្រពើពេលកំពុងគេង ដូចខាងក្រោម៖
១. ម៉ាស្សាជើង៖ ទាញសាច់ដុំ និងម៉ាស្សាជ្រៅៗ អាចមានប្រយោជន៍ជួយដល់គ្នាយើងដែលរមួលក្រពើនៅពេលយប់បាន។ ដើម្បីទាញសាច់ដុំបាន ដំបូងយើងត្រូវអង្គុយសណ្តូកជើងឲ្យត្រង់ និងបត់ម្រាមជើងមកស្មងជើងអ្នក ចាំធ្វើការម៉ាស្សាលើសាច់ដុំ ដើម្បីបន្ធូរនូវការកន្រ្តាក់។
២. ដើរដោយប្រើកែងជើង៖ វិធីមួយនេះគឺវានឹងធ្វើឱ្យសាច់ដុំដែលនៅទល់មុខកំភួនជើងរបស់យើងមានភាពធូរស្រាលជាងមុន ហើយអនុញ្ញាតឲ្យសាច់ដុំអាចសម្រាកបានយ៉ាងល្អទៀតផង។
៣. ប្រើកំដៅ៖ យើងអាចយកកន្សែងដើម្បីស្អំទឹកក្តៅ ប្រើស៊ុតស្ងោរដោយទុកកម្ដៅឲ្យក្ដៅឧណ្ឌៗ ឬងូតទឹកក្ដៅ លាបក្រែមបំបាត់ការឈឺចាប់នៅលើកំភួនជើងក៏អាចជួយឲ្យយើងភាពធូរស្រាលផងដែរ។
៤. ផឹកទឹកក្រូចឆ្មារ៖ ការសិក្សាជាច្រើនបានបង្ហាញក្នុងអំឡុងពេលដែលយើងកំពុងរមួលក្រពើហើយផឹកទឹកក្រូចឆ្មារក្នុងបរិមាណតិចតួចនោះក៏អាចជួយបំបាត់ភាពឈឺចាប់ការរមួលក្រពើដែរ។
៥. លេបថ្នាំបំបាត់ការឈឺចាប់៖ ការលេបថ្នាំបំបាត់ការឈឺចាប់ដែលមានដូចជាថ្នាំ ibuprofen និង naproxen ក៏អាចជួយបន្ថយភាពឈឺចាប់បន្ទាប់ពីការរមួលក្រពើ។
អត្ថបទដោយ៖ ស្រីណុច
សរុបមកវិញបញ្ហារមួលក្រពើនេះបើយើងមិនចង់ជួបបញ្ហានេះទេគួរតែអនុវត្តនូវវិធីសាស្រ្ដមួយចំនួនដើម្បីបង្ការដូចជា ត្រូវឧស្សាហ៍ជិះកង់ ផឹកទឹកឲ្យបានច្រើន ចៀសវាងឈររយៈពេលយូរ ពាក់ស្បែកជើងណាទន់ៗងាយស្រួលបត់បែន ហើយបើចេះតែឈឺមិនបាត់ជារៀងរាល់យប់វិធីល្អគួរតែទៅពិគ្រោះជាមួយគ្រូពេទ្យដើម្បីទទួលយកការព្យាបាលក្នុងលក្ខខណ្ឌណាមួយ ៕