បច្ចុប្បន្ននេះគ្រឿងភេសជ្ជៈកំប៉ុងគឺជាទីពេញនិយមបំផុតសម្រាប់កុមារគ្រប់រូប ខណៈដែលភេសជ្ជៈមួយចំនួនធំបានផ្ដល់ផលអាក្រក់សម្រាប់សុខភាពកុមារនាំឲ្យវិវត្តទៅជំងឺផ្សេងៗដូចជា ជំងឺទឹកនោមផ្អែម ឈឺក្រពះ ធ្មេញ និងរំខានដល់ការគេងរបស់កុមារជាដើម។
ជាក់ស្ដែងផ្អែកលើប្រភពវែបសាយ indiaparenting បានឲ្យដឹងថា មានភេសជ្ជៈចំនួន៥ បានបង្កហានិភ័យចំពោះសុខភាពកុមារយ៉ាងធ្ងន់ធ្ងរបើសិនជាឪពុកម្ដាយហ៊ានតែប្រហែសនៅតែបណ្ដោយឲ្យកូនៗផឹក។
១.ភេសជ្ជៈ Fizzy៖ ភេសជ្ជៈមួយប្រភេទនេះគឺជាភេសជ្ជៈដែលពេញនិយមបំផុតសម្រាប់កុមារដោយនៅក្នុងភេសជ្ជៈនោះមានផ្ទុកទៅដោយជាតិស្ករច្រើនលើសលប់ ខណៈដែលការផឹកភេសជ្ជៈមានជាតិស្ករច្រើនពេកអាចបណ្តាលឱ្យកើតទៅជាជំងឺទឹកនោមផ្អែម ធាត់ និងបញ្ហាសុខភាពផ្សេងទៀតចំពោះកុមារ។
២. ទឹកផ្លែឈើ៖ ផ្លែឈើគឺល្អខ្លាំងណាស់សម្រាប់កុមារ ប៉ុន្តែភេសជ្ជៈទឹកផ្លែឈើបែរជាមិនល្អ សម្រាប់កុមារទៅវិញ។ នេះក៏ព្រោះតែភេសជ្ជៈទឹកផ្លែឈើនេះមិនមែនផ្សំឡើងពីផ្លែឈើនោះទេ ពួកវាគ្រាន់តែជាសូដាដែលមិនមានជាតិកាបូណាត នឹងផ្សំជាមួយសារជាតិស្ករច្រើន ដូច្នេះមិនល្អចំពោះសុខភាពរបស់កុមារនោះទេ បើផឹកច្រើនយូរឆ្នាំកូនអ្នកអាចនឹងវិត្តន៍ទៅជាជំងឺទឹកនោមផ្អែមជាក់ជាមិនខាន។
៣. ភេសជ្ជៈប៉ូវកម្លាំង៖ ប្រភេទភេសជ្ជៈមួយនេះគឺមានមានផ្ទុកជាតិកាហ្វេអ៊ីនដ៏គ្រោះថ្នាក់ ហើយជួនកាលមានសារធាតុភ្ញោចមួយទៀតហៅថា Ephedrine ដែលបណ្តាលឱ្យមានការរំខានធ្ងន់ធ្ងរដល់ការគេងរបស់កុមារ។
៤. ភេសជ្ជៈពណ៌សិប្បនិម្មិត៖ ភាគច្រើននៃភេសជ្ជៈមួយប្រភេទនេះគឺមានពណ៌ទាក់ទាញគួរឲ្យចាប់អារម្មណ៍ណាស់ប៉ុន្តែធាតុពិតទៅគឺមានគ្រោះថ្នាក់បំផុតសម្រាប់កុមារ។ ពណ៌ដែលគេយកទៅលាយជាមួយភេសជ្ជៈនោះត្រូវបានកែច្នៃខ្ពស់ពីសារធាតុគីមីខណៈបើកុមារណាដែលមានបញ្ហាសុខភាពខ្សោយពេលណាដែលផឹកភេសជ្ជៈអាចបណ្ដាលឲ្យពុល រាក ក្អួតពេលខ្លះអាចនឹងដួលសន្លប់ថែមទៀតផង។
៥. កាហ្វេ៖ ជាតិកាហ្វេអ៊ីនមានឥទ្ធិពលយ៉ាងធ្ងន់ធ្ងរលើកុមារ ធ្វើឱ្យឈឺក្រពះ ពិបាកគេង ចង្វាក់បេះដូងកើនឡើង ពិបាកក្នុងការផ្តោតអារម្មណ៍។ល។ កាហ្វេត្រូវបានគេដឹងថាមានផ្ទុកជាតិកាហ្វេអ៊ីនច្រើន ដូច្នេះហើយកុមារគួរតែកុំផឹកសោះទើបជាការល្អ។
ជារួមមកវិញស្ថិតនៅក្នុងវ័យក្រោមអាយុ១៨ឆ្នាំ កុមារពិតជាត្រូវការមើលថែបំផុតពីសំណាក់ឪពុកម្ដាយ ដែលការហូបចុកទាំងប៉ុន្មានគឺទាមទារឲ្យអាណាព្យាបាលត្រូវតែតាមដានឲ្យបានដិតដល់ បើមិនដូច្នោះទេអនាគតទៅពួកគេនឹងប្រឈមនឹងបញ្ហាសុខភាពខ្លាំង បើសិនជាពួកគេផឹកភេសជ្ជៈ ហូបចំណីអាហារដែលគ្រោះថ្នាក់ ៕
អត្ថបទដោយស្រីណុច