មានព័ត៌មានខ្លះនិយាយថាស្ត្រីមិនគួរញ៉ាំសណ្តែកសៀងទេ វាអាចបង្កជាមហារីកសុដន់បាន។ តើនេះជាការពិតទេ? បើយោងតាមគេហទំព័រសុខភាព Vnexpress បានចុះផ្សាយថា សណ្តែកសៀងមានផ្ទុកសារធាតុ isoflavones ជាប្រភេទ phytoestrogen មានរចនាសម្ព័ន្ធស្រដៀងនឹងអរម៉ូនអ៊ឹស្ត្រូសែន។ មានអ្នកយល់ច្រឡំថា ជំងឺមហារីកសុដន់ជារឿយៗងាយឡើងជាមួយអរម៉ូនអ៊ឹស្ត្រូសែនក្នុងការញ៉ាំសណ្តែកសៀង។
ការពិត! ការញ៉ាំសណ្តែកសៀងមិនបង្កើនហានិភ័យនៃជំងឺមហារីកសុដន់នោះទេ។ ការសិក្សាលើស្ត្រីជនជាតិចិនជាង ៧៣.០០០នាក់បានបោះពុម្ពផ្សាយនៅវេជ្ជសាស្ត្រជាតិរបស់សហរដ្ឋអាមេរិកបានរកឃើញថា អ្នកញ៉ាំប្រូតេអ៊ីនពីសណ្តែកសៀងយ៉ាងហោចណាស់ ១៣ក្រាមក្នុងមួយថ្ងៃមានហានិភ័យ ១១%នៃជំងឺមហារីកសុដន់តិចជាងអ្នកញ៉ាំតិចជាង ៥ក្រាម។ ព្រោះសណ្តែកសៀងសម្បូរទៅដោយប្រូតេអ៊ីនមានសុខភាពល្អ ជាតិសរសៃ និងវីតាមីនផ្តល់អត្ថប្រយោជន៍ជាច្រើនដល់ប្រព័ន្ធការពារសុខភាព និងកាត់បន្ថយកូឡេស្តេរ៉ុល។
បើយោងតាមប្រភពចេញផ្សាយ medicalnewstoday បានបង្ហាញឱ្យដឹងថាសណ្តែកនេះដើរតួយ៉ាងសំខាន់ជាសារធាតុប្រឆាំងអុកស៊ីតកម្ម និងភ្នាក់ងារប្រឆាំងនឹងការរលាក។ តាមការស្រាវជ្រាវពីអាហារូត្ថម្ភធម្មជាតិដែលបោះពុម្ពផ្សាយក្នុងឆ្នាំ ២០១៥ បានវិភាគឃើញលទ្ធផលថា ការញ៉ាំសណ្តែកមានសារធាតុប្រឆាំងអុកស៊ីតកម្មជួយប្រឆាំងនឹងជំងឺមហារីកពោះវៀនខ្ពស់និងការពារការីករាលដាលនៃរោគមហារីកក្នុងកោសិកាថែមទៀត។
ការញ៉ាំសណ្តែកសៀងធម្មជាតិក្នុងកម្រិតមធ្យមប្រហែល ២៥-៣០ក្រាមនៅក្នុងមួយថ្ងៃ។ អ្នកអាចបន្ថែមអាហារមានសុខភាពល្អដូចជាបន្លែបៃតង ផ្លែឈើ គ្រាប់ធញ្ញជាតិ ល្អសម្រាប់សុខភាព។ ជាពិសេសបន្លែដូចជា ប្រូខូលី ខាត់ណា ស្ពៃក្តោប និងផ្កាខាត់ណា មានសមាសធាតុមានប្រយោជន៍ជាច្រើនជួយរាងកាយក្នុងការបន្សាបជាតិពុល និងការពារកោសិកាពីការខូចខាតអុកស៊ីតកម្ម។ ខ្លាញ់ល្អពីប្រេងអូលីវ ផ្លែបឺរ គ្រាប់ Walnut ឬខ្លាញ់ត្រីក៏ដើរតួយ៉ាងសំខាន់ក្នុងការកាត់បន្ថយការរលាក ការពារកោសិកាមហារីក និងកាត់បន្ថយហានិភ័យនៃជំងឺមហារីកសុដន់ផងដែរ៕ អត្ថបទដោយ៖ ទ្រ សុភាព