មនុស្សពេញវ័យ ត្រូវការគេងឱ្យបានគ្រប់គ្រាន់ពី ៧ទៅ៨ម៉ោងក្នុង១ថ្ងៃ។ ជាអកុសលអ្វី មនុស្សជាច្រើនបែរជាមិនបានគេងលក់ស្ងប់គ្រប់គ្រាន់ ចូលគេងយឺតម៉ោង១២ ម៉ោង១ ឬ២យប់ជារៀងរាល់ថ្ងៃហើយ នៅពេលចូលគេងថែមទាំងគេងមិនលក់ យល់សប្តិទល់ភ្លឺថែមទៀត។ បញ្ហានេះហើយ បានធ្វើឱ្យម្នាក់ៗងាយឈឺ មុខចាស់ជាងអាយុ មិនទាន់ចាស់ផងតែជំងឺរុំខ្លួន ទឹកនោមផ្អែម លើសឈាម ជំងឺបេះដូង បញ្ហាតម្រងនោម ខ្សោយខួរក្បាលទាំងវ័យក្មេង។ដោយឃើញពីបញ្ហាបង្កគ្រោះដល់សុខភាពបែបនេះ ចាបតៃបងសូមលើកយកក្បួនជួយឱ្យឆាប់គេងលក់២របៀប ដែលអ្នកជំនាញបានណែនាំដូចខាងក្រោម។

ក្បួនគេងលក់ត្រឹម២នាទី៖ ក្បួននេះបានផ្ទុះល្បីខ្លាំងដោយគ្រូបង្វឹកកាយសម្បទាលោកJustin Agustin បានយកមកចែករំលែកក្នុងTikTok របស់គាត់ ពីក្បួនគេងលក់ត្រឹម២នាទី តាមបែបទាហាន។ ដូចបានដឹងហើយ ទាហានឬកងទ័ពពួកគាត់ត្រូវបំពេញបេកកម្មច្រើន ឆ្លងកាត់ព្រៃភ្នំ ធ្វើសង្គ្រាមជាដើម ពួកគេត្រូវការក្បួនជួយឱ្យឆាប់គេងឱ្យបានលក់ស្ងប់ទើបរក្សាកម្លាំងបាន។ ក្បូននោះគឺ គេងហើយដាក់ឱ្យត្រង់ស្របខ្លួន ឃ្លាតឆ្ងាយពីដងខ្លួនបន្តិច បិទភ្នែក បន្ទាប់មកចាប់ផ្ដើមបន្ធូរសាច់ដុំ។ បន្ធូរសាច់ដុំពីថ្ងាស ភ្នែក ថ្ពាល់របស់អ្នក ហើយព្យាយាមផ្ដោមលើការដកដង្ហើម មួយៗវែង ផ្លុំខ្យល់ចេញតាមមាត់។

ព្យាយាមបន្ធូរសាច់ដុំបែបនេះ ឱ្យទម្លាក់សម្ពាធចេញពីខ្លួនអ្នក ដេញចេញពីថ្ងាស ស្មារ ដៃ រហូតដល់ចុងជើង។ គេងមិនលក់ដោយសារខួរក្បាលគិតច្រើនរឿងបញ្ចូលគ្នា ច្របូកច្របល់ចុះឡើងធ្វើឱ្យអារម្មណ៍មិនស្ងប់ ហេតុនេះសំខាន់បំផុត ត្រូវគ្រប់គ្រងអារម្មណ៍និងចិត្តឱ្យបាន។ ព្យាយាមឱ្យខ្លួនឯងផ្ដោតលើរឿងតែ១ បន្ទប់គេងត្រូវតែងងឹត បន្ធូរភាពតានតឹងចេញប្រាប់ខ្លួនឯងថា កុំគិត កុំគិត កុំគិត។ ធ្វើបែបនេះអ្នកនឹងផ្តោតលើរឿងតែ១ប៉ុណ្ណោះ អារម្មណ៍ស្ងប់ល្អឆាប់គេងលក់លឿន។ ក្បួននេះមិនអាចធ្វើភ្លាមជោគជ័យភ្លាមៗទេ គួរព្យាយាមបង្វឹកខ្លួនឯងឱ្យបាន៦សប្ដាហ៍ឡើង នោះអ្នកនឹងចំណាយពេលត្រឹម២នាទីប៉ុណ្ណោះ ក្នុងការធ្វើឱ្យខ្លួនឯងគេងលក់។

ក្បួនគេងតាមវេជ្ជបណ្ឌិត៖ សាស្ត្រាចារ្យវេជ្ជបណ្ឌិត Colin Espie អ្នកជំនាញផ្នែកការគេងនិងជំនាញនៅក្នុងគ្លីនិកសរសៃប្រសាទនៅសាកលវិទ្យាល័យOxford បានចែករំលែកគន្លឹះកំពូល ដែលជួយឱ្យឆាប់គេងលក់លឿន ស្ងប់ទល់ភ្លឺក្នុងប្រភពmentalhealth។ ទី១ ហាមគេងពេលថ្ងៃឬពេលសម្រាក ប្រសិនបើអ្នកមានបញ្ហាគេងមិនលក់ពេលយប់ មិនគួរទម្លាប់ខ្លួនគេងពេលថ្ងៃទេ។ ពេលថ្ងៃល្វើយគួរព្យាយាមក្រោកដើរ ធ្វើសកម្មភាព ឱ្យរាងកាយមានកម្លាំងឡើងវិញ។ ទី២ កុំបង្ខំខ្លួនឯងឱ្យគេង បើអ្នកគេងមិនលក់ហើយព្យាយាមប្រឹងគេង ទាំងដែលខ្លួនឯងគេងមិនលក់រាប់ម៉ោង និងធ្វើឱ្យអ្នកមានអារម្មណ៍ថាថប់អារម្មណ៍ឬឈឺក្បាល។ បើគេងមិនលក់សោះ ក្រោកឡើងវិញសិន អាចបន្ធូរអារម្មណ៍អង្គុយឬដើរបន្តិច ផឹកទឹកតិចតួច ហើយចូលចាំចូលគេងវិញម្ដងទៀត ចូរកុំព្យាយាមឱ្យខ្លួនឯងតានតឹង នាំតែគេងមិនលក់លើសដើម។

ទី៣ ដាក់ផែកការសុខភាព បើមានបញ្ហាគេងមិនលក់រ៉ាំរ៉ៃ គួរពិចារណាឡើងវិញនូវអាហារដែលញ៉ាំប្រចាំថ្ងៃ គួរព្យាយាមញ៉ាំអាហារបែបសុខភាព មានបន្លែ ផ្លែឈើ គ្រាប់ធញ្ញជាតិឱ្យបានច្រើន ហើយធ្វើលំហាត់ប្រាណ វាអាចកាត់ភាពតានតឹងជំរុញឱ្យឆាប់គេងលក់។ ទី៤ កំណត់ហេតុការគេង គួរមើលឡើងវិញ ពីសម្លេងរំខាន ពន្លឺ ពេលវេលាក្នុងការញ៉ាំឬមរិមាណអាហារដែលអ្នកញ៉ាំ មានច្រើនពេកទេ? ញ៉ាំយប់ជ្រៅពេកទេ? ញ៉ាំអាហារដែលប៉ះពាល់ការគេងពេកទេ? ផឹកកាហ្វេអ៊ីន ឬជាតិអាកុលច្រើនពេកឬអត់? សូម្បីតែសីតុណ្ហភាពក្នុងបន្ទប់ក័អ្នកគួរតែកំណត់កុំឱ្យក្ដៅពេក ឬត្រជាក់ពេកផងដែរ។

សង្ឃឹមថា វិធីសាស្ត្រទាំង២ខាងលើនេះអាចជួយសម្រួលដល់ការគេងរបស់អ្នកបាន។ អនុវត្តមួយណាក៏បានដែលគិតថាងាយស្រួល ឬអនុវត្តម្ដងទាំង២ក៏បានជាជម្រើសរបស់អ្នក៕

អត្ថបទដោយ៖ Senghong