មានពាក្យមួយគេពោលថា មុនដំបូងយើងបង្កើតទម្លាប់ រួចហើយទម្លាប់ដឹកនាំជីវិតអ្នកម្តង។ មានមនុស្សអាយុ ៩០ និង ១០០ ឆ្នាំធំឡើងទៅសុទ្ធតែមានទំនាក់ទំនងជាមួយទម្លាប់ទាំងបីនេះ ។ បើអ្នកចង់រស់នៅបានយូរ មានរាងស្អាត និងមានសុខភាពល្អ ទម្លាប់ ៣ នេះជួយអ្នកបាន។ នេះមេរៀនលោក Brian Tracy តើទម្លាប់មានអ្វីខ្លះ?
ជាង ៦០% នៃជនជាតិអាមេរិកសព្វថ្ងៃ “ មានភាពធាត់” ជាផ្លូវការ។ មធ្យោបាយតែមួយគត់ដើម្បីសម្រេចបាននូវសម្រកគីឡូ អ្នកត្រូវតែអភិវឌ្ឍទម្លាប់ការញ៉ាំតិច និងហាត់ប្រាណអោយបានច្រើនក្នុងមួយថ្ងៃ...។ ហើយអ្នកត្រូវចំណាយពេលវេលាជាច្រើន ដើម្បីសម្រកទម្ងន់ វាស្ថិតលើការសម្រេចចិត្តរបស់អ្នក។
១. ទម្លាប់បរិភោគអាហារត្រឹមត្រូវ៖ មនុស្សគ្រប់គ្នាដឹងថា ពួកគេគួរតែបរិភោគរបបអាហារមានតុល្យភាពដូចជាផ្លែឈើ បន្លែ និងផលិតផលគ្រាប់ធញ្ញជាតិ និងបរិភោបអាហារត្រឹមតែ ៨០%បានហើយ។ បន្ថែមពីលើការញ៉ាំអាហារត្រឹមត្រូវ អ្នកគួរតែបង្កើតទម្លាប់ក្នុងការកាត់បន្ថយសារធាតុនាំឱ្យឡើងគីឡូមានដូចជា ជាតិអំបិល ស្ករ និងម្សៅ។ ការផ្លាស់ប្តូររបបអាហាររបស់អ្នកគឺសាមញ្ញ ហើយវាមានឥទ្ធិពលខ្លាំងណាស់។ មានសិស្សរបស់ខ្ញុំជាច្រើនបានព្យាយាមធ្វើតាមនេះ ហើយវាពិតជាមានការភ្ញាក់ផ្អើលដែលពួកគេទទួលបានលទ្ធផលគួរឱ្យកត់សម្គាល់។
២. ទម្លាប់ហាត់ប្រាណឱ្យបានគ្រប់គ្រាន់៖ ការញ៉ាំអាហារឱ្យបានត្រឹមត្រូវ តែអ្នកគ្មានទម្លាប់ធ្វើលំហាត់ប្រាណទេ សុខភាពអ្នកនឹងមានបញ្ហា។ អ្នកត្រូវកសាងទម្លាប់ធ្វើលំហាត់ប្រាណឱ្យមានប្រសិទ្ធភាព មានមនុស្សជាច្រើនមិនសូវធ្វើលំហាត់ប្រាណតាំងពីវ័យជំទង់។
ការអភិវឌ្ឍទម្លាប់ធ្វើលំហាត់ប្រាណជាប្រចាំថ្ងៃ ជួយសម្រួលរាល់សន្លាក់នៅក្នុងខ្លួនរបស់អ្នក។ ការធ្វើចលនានេះបានជំរុញសាច់ដុំ និងសន្លាក់របស់អ្នកមានភាពរហ័សរហួន និងអាចបត់បែនបាន។ ការធ្វើលំហាត់ប្រាណទៀងទាត់ធានាថា អ្នកមានតុល្យភាព និងភាពចល័តកាន់តែខ្លាំង។ វាជួយកាត់បន្ថយលទ្ធភាពនៃការឈឺសាច់ដុំ សន្លាក់ និងបញ្ហា។
បង្កើតទម្លាប់នៃការធ្វើលំហាត់ប្រាណ ២០០ នាទីរៀងរាល់សប្តាហ៍។ អ្នកត្រូវដើរលេង ៣០ នាទីក្នុងមួយថ្ងៃជាប្រចាំ អ្នកនឹងក្លាយជាមនុស្សដែលមានសុខភាពល្អនៅក្នុងសង្គម។ បើអ្នកដាក់វិន័យលើខ្លួនអ្នកឱ្យជិះកង់ ហាត់ប្រាណលើម៉ាស៊ីន ហែលទឹក អ្នកចូលរួមលំហាត់ប្រាណណាដែលធ្វើចលនាសួត បេះដូង និងធ្វើឱ្យសរសៃឈាមរបស់អ្នកមានដំណើរការល្អ នោះកម្រិតសុខភាព និងថាមពលរបស់អ្នកនឹងប្រសើរឡើងក្នុងរយៈពេលដ៏ខ្លី។
៣. ទម្លាប់គេងឱ្យបានគ្រប់គ្រាន់៖ អ្នកត្រូវការសំរាប់សុខភាពល្អ គឺទម្លាប់នៃការសម្រាកឱ្យបានត្រឹមត្រូវ។ អ្នកត្រូវការគេង ៧ ទៅ ៨ ម៉ោងរាល់យប់ដើម្បីទទួលបានលទ្ធផលល្អបំផុត។ បើអ្នកគេងតិចជាង ៦ ទៅ ៧ ម៉ោងក្នុងមួយយប់ ហើយអ្នកនៅតែខំប្រឹងធ្វើការដូចធម្មតា អ្នកនឹងមានបញ្ហាសុខភាពមកពី“ កង្វះដំណេក” ឱ្យគ្រប់គ្រាន់ ។ ការគេងមិនគ្រាប់គ្រាន់ វាធ្វើឱ្យប៉ះពាល់ដល់ផ្លូវអារម្មណ៍មិនល្អ។ អ្នកត្រូវអភិវឌ្ឍទម្លាប់នៃការចូលគេងមុនម៉ោង ១០ យប់ រៀងរាល់យប់ និងគេងលក់ស្កប់ស្កល់។
អត្ថបទដោយ៖ ទ្រ សុភាព