រដូវភ្លៀងបែបនេះ សុខភាពយើងម្នាក់ៗប្រឈមមុខជាមួយនឹងជំងឺផ្តាសាយណាស់ ប្រសិនអ្នកជាបុគ្គលដែលមានសុខភាពខ្សោយស្រាប់ទៀត ទោះមិនត្រូវទឹកភ្លៀងក៏ដោយ ក៏អាចផ្តាសាយបានដែរ។ ដូច្នេះដើម្បីបង្កើនភាពស៊ាំក្នុងខ្លួនរបស់អ្នកឱ្យខ្លាំង ការពារជំងឺ ក្នុងដំណាក់កាលនេះអ្នកចាំបាច់ត្រូវតែជ្រើសរើសអាហារដែលជួយបង្កើនភាពស៊ាំ។
ជាការពិតណាស់ យោងតាមការណែនាំពីគេហទំព័រ medicalnewstoday អាហារដែលអ្នកគួរតែញ៉ាំដើម្បីការពារជំងឺផ្តាសាយ ក្នុងអំឡុងពេលអាកាសធាតុប្រែប្រួល និងភ្លៀងរាល់ថ្ងៃបែបនេះ មានដូចខាងក្រោម៖
១. តែខ្ញី៖ តែខ្ញីជាអាហារសុខភាពដែលជួយបណ្តេញជាតិពុលចេញពីរាងកាយ ធ្វើឱ្យភាបស៊ាំនៅក្នុងរាងកាយកើនឡើងផងដែរ។ ជាពិសេសនៅពេលដែលអ្នកត្រូវទឹកភ្លៀងមានអារម្មណ៍ថាតឹងច្រមុះ និងឈឺក្បាល អ្នកគួរតែឆុងទឹកតែខ្ញីមួយកែវផឹក ដោយជ្រើសយកខ្ញីផ្នែកគល់មកធ្វើទើបមានប្រសិទ្ធភាពខ្ពស់។
២. ក្រូច៖ ក្រូចសម្បូរជាប្រភពនៃវីតាមីន C ដែលជាសារធាតុចិញ្ចឹមសំខាន់ជួយធ្វើឱ្យប្រព័ន្ធភាពស៊ាំក្នុងរាងកាយកើនឡើងខ្លាំង ការពារជំងឺផ្សេងៗជាពិសេសគឺ ជំងឺផ្តាសាយ។
៣. ទឹក៖ ជាធម្មតានៅពេលអាកាសធាតុត្រជាក់ឬភ្លៀងធ្វើឱ្យអ្នកមិនមានអារម្មណ៍ថាស្រេកទឹកដូចអាកាសធាតុក្តៅនោះទេ ប៉ុន្តែអ្នកត្រូវតែព្យាយាមផឹកទឹកឱ្យបានច្រើន ចៀសវាងផឹកទឹកកកជាដាច់ខាត ត្រូវផឹកទឹកក្តៅទើបអាចការពារជំងឺផ្តាសាយបាន។
៤. តែបៃតង៖ តែបៃតងត្រូវបានគេរកឃើញថាវាមានផ្ទុកជាមួយនឹងសារធាតុ flavonoids ដែលជាសារធាតុប្រឆាំងអុកស៊ីតកម្ម បង្កើនភាពស៊ាំ និងមានលក្ខណៈសម្បត្តិប្រឆាំងនឹងការរលាក ប្រឆាំងអុកស៊ីតកម្ម ហើយអាចសម្លាប់បាក់តេរីផ្តាសាយបានផងដែរ។ ផឹតតែបៃតងក្តៅឧណ្ហៗមួយកែវនៅពេលព្រឹកល្អបំផុត។
៥. ស៊ុត៖ សម្បូរទៅដោយសារធាតុចិញ្ចឹមពង្រឹងភាពស៊ាំ ស៊ុតមានបរិមាណវីតាមីន D ខ្ពស់ ដែលជាវីតាមីនដ៏សំខាន់ក្នុងការគ្រប់គ្រង និងពង្រឹងភាពស៊ាំ។
គូសបញ្ជាក់ផងដែរថា រដូវភ្លៀងបែបនេះអ្នកត្រូវយកចិត្តទុកដាក់ការពារសុខភាព គួរញ៉ាំអាហារណាដែលមានប្រយោជន៍ បង្កើនភាពស៊ាំឱ្យរាងកាយរឹងមាំទើបរាងកាយយើងមិនប្រឈមជាមួយនឹងជំងឺផ្តាសាយ និងជំងឺរាតត្បាតផ្សេងៗ៕
អត្ថបទដោយ៖ មឿន គន្ធា